សារមន្ទីរជាតិទទួលបានហូលពិដាន និងផ្ទាំងកំណាត់សូត្រជាលើកទី២ ជាង៤០ផ្ទាំងពីក្រុមការងារពិដានជនជាតិជប៉ុន
ភ្នំពេញ៖ សារមន្ទីរជាតិតាមរយៈរយៈក្រសួងវប្បធម៌ និងវិចិត្រសិល្បៈ បានទទួលនូវហូលពិដាន និងផ្ទាំងកំណាត់សូត្រជាលើកទី២ ជាង៤០ផ្ទាំងបន្ថែមទៀត ពីក្រុមការងារពិដានជនជាតិជប៉ុន ដែលការប្រគល់ ទទួលនេះបានធ្វើឡើងកាលពីថ្ងៃទី៨ ខែសីហា ក្រោមអធិបតីភាពនៃថ្នាក់ដឹកនាំក្រសួងវប្បធម៌ និងវិចិត្រសិល្បៈផ្ទាល់។
ការប្រគល់នូវហូលពិដាន និងផ្ទាំងកំណាត់សូត្រនេះដោយក្រុមការងារពិដានជនជាតិជប៉ុន ដែលដឹកនាំដោយលោកស្រី YONEKURA Yukiko និងលោកស្រី MIYAMOTO Kazuko ដែលទទួលការអនុញ្ញាតចូលរួមសម្តែងការគួរសមជាមួយនឹងលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នៅទីស្តីការក្រសួង។
តាមរយៈសារមន្ទីរជាតិបានឱ្យដឹងថា ក្នុងជំនួបនោះ ក្រុមការងារជប៉ុន បានប្រគល់ហូលពិដាន និងផ្ទាំងកំណាត់សូត្រលើកទី២ សរុបចំនួន ៤១ផ្ទាំង ជូនក្រសួង ដើម្បីរក្សាទុកជាសម្បត្តិរដ្ឋនៅសារមន្ទីរជាតិកម្ពុជា។
សារមន្ទីរជាតិបានលើកឡើងថា ៖ «កាលពីកំឡុងទសវត្សរ៍ឆ្នាំ២០០០ ក្រុមការងារពិដាននេះ បានប្រគល់ផ្ទាំងកំណាត់សូត្រចំនួន២៥ផ្ទាំងរួចម្តងមកហើយ។ សមុច្ច័យទាំង៤១ផ្ទាំងនេះ ជាបណ្តុំសមុច្ច័យដ៏សំខាន់ដែលបានឆ្លុះបញ្ចាំងពីភាពសំបូរបែបនៃការបន្តមរតកបេតិកភណ្ឌអរូបីនៃវិស័យតម្បាញខ្មែរ នារយៈពេលជាងមួយសតវត្សរ៍កន្លងមកនេះ»។
សារមន្ទីរជាតិ ក៏បានបញ្ជាក់ដែរថា គោលបំណងចម្បងនៃការប្រគល់នេះ ដើម្បីធានាបាននូវនិរន្តរភាពនៃការអភិរក្ស ថែរក្សា និងផ្សព្វផ្សាយពីភាពប្រណិត និងល្អឯក នៃមរតកតម្បាញសូត្រខ្មែរ។ ក្បាច់លម្អ ដែលមាននៅលើផ្ទាំងសូត្របាន រម្លេចពីទិដ្ឋភាពទូទៅនៃជីវភាពប្រចាំថ្ងៃ និងជំនឿនានា ដែលខ្មែរគោរពប្រតិបត្តិ ជាពិសេស គឺផ្ទាំងរឿងទាក់ទងនឹងពុទ្ធប្រវត្តិ។
ប្រភពដដែលបន្តថា ៖ «ក្រុមការងារចង់ផ្តល់លទ្ធភាព និងភាពងាយស្រួលដល់ក្រុមអ្នកតម្បាញសូត្រខ្មែរ ដែលមានបំណងចង់សិក្សាឈ្វេងយល់ពីទម្រង់ និងក្បាច់រចនានានានៅលើផ្ទាំងសូត្រ អាចចូលមកពិនិត្យផ្ទាល់បាននៅសារមន្ទីរជាតិ ដោយទាក់ទងផ្ទាល់មកសារមន្ទីរជាមុន ដើម្បីក្រុមការងារអាចរៀបចំសមុច្ច័យទាំងនោះទាន់ពេលវេលា ដោយពុំចាំបាច់ចំណាយពេលវេលារង់ចាំ»។
លោក ឆាយ វិស្សុត ប្រធានសារមន្ទីរជាតិ ប្រាប់ឱ្យដឹងនៅថ្ងៃទី៩ ខែសីហាថា សមុច្ច័យដែលមានតម្បាញសូត្រនេះ កន្លងមកក៏ធ្លាប់ទទួលបានពីជនជាតិអូស្រ្តាលីមួយរូបដែរ ដែលធ្លាប់បានប្រមូលទិញពីសម័យសង្គ្រាមនៅឆ្នាំ១៩៧០ ប៉ុន្តែក្រោយបញ្ចប់សង្គ្រាម គាត់ក៏ប្រគល់មកសារមន្ទីរដើម្បីថែរក្សា។
លោកបន្តថា ក្រោយមកទៀត ក្នុងអំឡុងឆ្នាំ២០១១-២០១៤ ក្រុមការងារជប៉ុននេះ ក៏បានប្រគល់នូវ ផ្ទាំងកំណាត់សូត្រចំនួន ២៥ ផ្ទាំង លើកទី១ និងបានដាក់តាំងបង្ហាញទៅតាមប្រភេទផ្សេងនៃពិដានដែលបានប្រើប្រាស់នៅតាមសហគមន៍វត្តអារាមផងដែរ។
លោកបានឱ្យដឹងទៀតថា មួយវិញទៀតសារមន្ទីរជាតិក៏ធ្លាប់ទទួលបានពីអ្នកតម្បាញ និងតាមផែនការ សារមន្ទីរនឹងបញ្ជាទិញនូវវាយនភណ្ឌតម្បាញសូត្រពីក្រុមតម្បាញដើម្បីយកមករក្សាទុកផងដែរ ព្រោះមុនឆ្នាំ១៩៧៥ សមុច្ច័យមានចំនួន ជាង ៦០០ ផ្ទាំង ប៉ុន្តែត្រូវបានបាត់បង់ជាងពាក់កណ្តាល។
លោក ឆាយ វិស្សុត មានប្រសាសន៍ថា ៖ «ដើម្បីរក្សាបាននូវសមុច្ច័យទាំងអស់នេះ សារមន្ទីរគ្រោងនឹងទិញចូលនូវសមុច្ច័យកម្រៗ ដែលមានក្បាច់ណាមានសារៈប្រយោជន៍ទៅថ្ងៃក្រោយ»។
ចំពោះសារៈប្រយោជន៍នៃការរក្សាទុកនូវសមុច្ច័យ វាយនភណ្ឌទាក់ទងនឹងតម្បាញសូត្រនេះ លោកបានប្រាប់ថា ដោយសារសមុច្ច័យទាំងនេះ កំពុងប្រឈមនឹងការបាត់បង់ ព្រោះវាផលិតចេញពីធនធានធម្មជាតិ ដែលមិនប្រើគីមី និងមួយចំនួនទៀតដែលមានក្បាច់មួយចំនួននៅក្នុងសូត្រនោះស្ទើតែប្រឈមនឹងការបាត់បង់ផងដែរ។
លោកថ្លែងថា ៖ «អីចឹង! វាជាឱកាសមួយសម្រាប់យើងរក្សាទុករបស់ទាំងអស់ហ្នឹងធ្វើការផ្សព្វផ្សាយ ហើយនឹងផ្តល់ជូនទៅដល់សាធារណជន ពិសេសអ្នកតម្បាញដែលមានបំណងចង់សិក្សាស្វែងយល់ពីទំហំ ប្រភេទ ក្បាច់លម្អ ក្បាច់គោម និងក្បាច់ភ្ជីៗ ដែលប្រើប្រាស់នៅលើក្រណាត់សូត្ររបស់យើងអាចសិក្សាបាន»។
បើតាម លោក ឆាយ វិស្សុត ក្រៅពីនេះ សារមន្ទីរជាតិក៏នឹងរៀបចំដាក់តាំងពិព័រណ៍មិនអចិន្ត្រៃយ៍ ខណៈពេលដែលកាលពីកន្លងទៅ ក៏បានរៀបចំពិធីនេះដែរជាមួយក្រុមការងារជប៉ុននេះ ដែលពេលនេះ ក្រុមការងារជប៉ុនបានប្រគល់មកទៀត ដូចនេះ ក្រុមការងារសារមន្ទីរនឹងធ្វើការរៀបចំបោះពុម្ព ផ្សព្វផ្សាយជាសាធារណៈ និងរៀបចំពិព័រណ៍ដោយជ្រើសរើសសមុច្ច័យណាដែលល្អៗ សម្រាប់ដាក់តាំងបង្ហាញជូនពលរដ្ឋបានទស្សនាផងដែរ៕ដោយ៖គឹម យុត្ថារ៉ូ
