មន្រ្តីនាយកដ្ឋានប្រយុទ្ធនឹងជំងឺឆ្លងអំពាវនាវសារជាថ្មីឱ្យប្រជាពលរដ្ឋប្រុងប្រយ័ត្នក្នុងកំលុងទឹកឡើង
ភ្នំពេញ៖ មន្រ្តីជាន់ខ្ពស់នៃនាយកដ្ឋានប្រយុទ្ធនឹងជំងឺឆ្លងបានអំពាវនាវសារជាថ្មីដល់ប្រជាពលរដ្ឋឱ្យប្រុងប្រយ័ត្នក្នុងកំលុងពេលទឹកឡើង ព្រោះវាអាចបង្កជាជំងឺផ្សេងៗមកពីពពួកមេរោគ និងមកពីប្រភេទសត្វមានពិសនានា ដែលធ្វើឱ្យប៉ះពាល់ដល់សុខភាព និងអាយុជីវិត។
លោក លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានថ្លែងឱ្យដឹងនៅថ្ងៃទី១៥ ខែសីហាថា ដល់រដូវដែលមានជំនន់កើតឡើង ប្រជាពលរដ្ឋអាចប្រឈមនូវជំងឺជាច្រើនប្រភេទក្នុងអំឡុងពេលនេះ ដែលជំងឺទាំងនោះអាចមាន ជំងឺគ្រុនឈាម គ្រុនចាញ់ គ្រុនផ្តាសាយ គ្រុនក្តៅ និងជំងឺឆ្លងពីចំណីអាហារ ជំងឺអាសន្នរោគជាដើម។
លោកបានបន្តថា ក្នុងករណីដែលទីតាំង ភូមិ ឃុំ និងសហគមន៍មូលដ្ឋានដែលកំពុងមានទឹកជំនន់ ក៏តែងតែប្រឈមនូវប្រភេទសត្វមានពិសផងដែរ។ ដូច្នេះសូមឱ្យប្រជាពលរដ្ឋត្រូវមានការប្រុងប្រយ័ត្ន ពីព្រោះប្រភេទសត្វមានពិសទាំងនោះ វាតែងតែឡើងតាមទឹក ហើយអាចនឹងបង្កគ្រោះថ្នាក់មកដល់អាយុជីវិត ប្រសិនជាសត្វនោះបានចឹក ឬខាំ។
លោក លី សូវ៉ាន់ បញ្ជាក់ថា ក្នុងករណីប្រជាពលរដ្ឋណាទទួលរងដោយសារពស់ចឹក សូមបញ្ជូនគាត់ទៅរកមណ្ឌលសុខភាព ឬមន្ទីរខេត្ត ដែលមានឧបករណ៍សង្គ្រោះបន្ទាន់ ដើម្បីអាចឱ្យក្រុមគ្រូពេទ្យដែលរៀនបានត្រឹមត្រូវ និងមានជំនាញធ្វើការព្យាបាលពស់ចឹកនេះ។ប្រសិនមានបញ្ហាសុខភាពណាមួយកើតឡើង ដើម្បីទទួលបានការព្យាបាលទាន់ពេលវេលា។ម្យ៉ាងវិញទៀតនៅពេលមានទឹកជំនន់បែបនេះ ប្រជាពលរដ្ឋមិនគួរយកទឹកដែលជន់លិចនោះ យកមកបរិភោគនិងប្រើប្រាស់ដោយគ្មានការបង្ការ សម្លាប់មេរោគ សម្លាប់គីមី ឬមួយក៏មិនបានដាំទឹកឱ្យពុះនោះទេ។
មន្រ្តីនៃក្រសួងសុខាភិបាលរូបនេះ បានស្នើឱ្យប្រជាពលរដ្ឋដែលកំពុងស្នាក់នៅទាំងទីទួលសុវត្ថិភាព និងទាំងប្រជាពលរដ្ឋដែលកំពុងរស់នៅក្នុងតំបន់ទឹកលិច ត្រូវតែបង្កើនការថែទាំសុខភាពផងដែរ ដោយត្រូវឧស្សាហ៍លាងដៃឱ្យបានញឹកញាប់ជាមួយសាប៊ូ ឬទឹកស្អាត។ ជាពិសេសត្រូវមានអនាម័យក្នុងការបរិភោគចំណីណាដែលបានចម្អិនឆ្អិនល្អ។
លោក លី សូវ៉ាន់ បន្ថែមថា បើមិនចាំបាច់ទេ យើងសុំឱ្យគាត់កុំមេត្តាដើរឆ្លងកាត់ទឹកលិចទាំងអស់នោះ ពីព្រោះវាអាចធ្វើឱ្យយើងអាចឆ្លងនូវពពួកមេរោគម្យ៉ាងគេហៅថា លិបតូ ដែលវាឆ្លងចូលទៅក្នុងបាតជើងរបស់យើង នឹងធ្វើឱ្យយើងគ្រុនក្ដៅ ខូចតម្រងនោម ប៉ះពាល់ដល់ថ្លើមជាដើម។
លោកបានបន្តថា យើងគួរតែគេចឱ្យផុត។ចៀសឱ្យឆ្ងាយពីការឆ្លងកាត់ទឹកលិចហ្នឹង ហើយក៏ត្រូវស្វែករកទីទួលដែលមានសុវត្ថិភាពរហូតដល់ទឹកលិចហ្នឹងស្រកចុះវិញទើបយើងអាចធ្វើដំណើរបាន៕ដោយ៖ជា សុខនី