ស្ថានទូតអាមេរិកប្រចាំកម្ពុជារៀបចំពិព័រណ៍អប់រំសម្រាប់អ្នកចាប់អារម្មណ៍ចង់សិក្សានៅសាកលវិទ្យាល័យអាមេរិក
ភ្នំពេញ៖ស្ថានទូតអាមេរិកប្រចាំកម្ពុជា នឹងរៀបចំពិព័រណ៍អប់រំ EducationUSA Fair ឆ្នាំ២០២៣ របស់បណ្តាញប្រឹក្សាអប់រំរបស់ក្រសួងការបរទេសអាមេរិកសម្រាប់សិស្សានុសិស្សកម្ពុជាដែលមានចំណាប់អារម្មណ៍បន្តការសិក្សានៅសាកលវិទ្យាល័យនានានៅសហរដ្ឋអាមេរិក ។ពិធីនេះនឹងមានតំណាងជាង ២០ មហាវិទ្យាល័យ និងសាកលវិទ្យាល័យល្បីៗរបស់អាមេរិកចូលរួមក្នុងពិព័រណ៍។
យោងតាមសេចក្តីប្រកាសពីស្ថានទូតអាមេរិកប្រចាំកម្ពុជាកាលពីថ្ងៃទី២៥ ខែកញ្ញា បានឱ្យដឹងថា ស្ថានទូតនឹងមានការរៀបចំពិព័រណ៍អប់រំមួយពាក់ព័ន្ធនឹងឱកាសសិក្សានៅសហរដ្ឋអាមេរិក។ ពិព័រណ៍នេះនឹងប្រព្រឹត្តទៅនៅថ្ងៃទី២៨ ខែកញ្ញា ខាងមុខនេះ នៅសណ្ឋាគារ Hyatt Regency Phnom Penh ចាប់ពីវេលាម៉ោង ២រសៀល ដល់ម៉ោង ៦ល្ងាច។
សេចក្តីប្រកាស បញ្ជាក់ថា តំណាងនៃមហាវិទ្យាល័យ និងសាកលវិទ្យាល័យជាង២០ នឹងមានវត្តមាននៅកម្មវិធីនេះ ដើម្បីផ្តល់យោបល់ និងសំណេះសំណាលជាមួយសិស្សានុសិស្សកម្ពុជាពាក់ព័ន្ធនឹងកម្មវិធីស ញ្ញាបត្រ តម្រូវការចូលរៀន និងឱកាសអាហារូបករណ៍។ ពិព័រណ៍នឹងផ្តល់ព័ត៌មានអំពីទិដ្ឋាការសិស្ស កម្មវិធីផ្លាស់ប្តូរការសិក្សារបស់រដ្ឋាភិបាលអាមេរិកផងដែរ។
ប្រភពដដែលបានរំលេចថា ៖ «ពិព័រណ៍នេះធ្វើឡើងក្នុងគោលបំណងលើកកម្ពស់គុណភាពនៃការអប់រំ និងពង្រីកឱកាសសិក្សា និងឱកាសការងារសម្រាប់ប្រជាជនកម្ពុជា។ ពិព័រណ៍នេះក៏ផ្តល់កន្លែងពិសេសមួយសម្រាប់ប្រជាជនកម្ពុជាក្នុងការតភ្ជាប់ទំនាក់ទំនងជាមួយស្ថាប័នឧត្តមសិក្សារបស់សហរដ្ឋអាមេរិក និងដើម្បីស្វែងយល់អំពីអត្ថប្រយោជន៍នៃការទទួលបានការអប់រំនៅសាកលវិទ្យាល័យនៅសហរដ្ឋអាមេរិក»។
សូមបញ្ជាក់ថា តំណាងសាកលវិទ្យាល័យ និងមហាវិទ្យាល័យជាង២០ របស់សហរដ្ឋអាមេរិក មានដូចជាសាកលវិទ្យាល័យ New York, Washington State, Tacoma Community College, Bellevue College, Northeastern University, University of Arizona និងសាកលវិទ្យាល័យ និងមហាវិទ្យាល័យនានាទៀត។
ពាក់ព័ន្ធនឹងការតាំងពិព័រណ៍នេះ លោក ឈត ប៊ុនថង មន្ត្រីស្រាវជ្រាវផ្នែកអប់រំ ទេសចរណ៍ និងវប្បធម៌ នៃរាជបណ្ឌិត្យសភាកម្ពុជា សាទរចំពោះការរៀបចំពិព័រណ៍អប់រំនេះឡើង ដើម្បីពង្រឹងទំនាក់ទំនងនៃប្រទេសទាំង២ផង និងផ្តល់លទ្ធភាពដល់ប្រជាជនខ្មែរក្នុងការបន្តការសិក្សានៅទឹកដីអាមេរិកផង។
លោក ឈត ប៊ុនថង ប្រាប់ថា ៖ «បើស្ថានទូតបានរៀបចំ វាល្អសម្រាប់សិស្សានុសិស្សខ្មែរដែលចង់សិក្សានៅអាមេរិក អាចត្រៀមខ្លួន យល់ដឹងពីតម្រូវការ ស្វែងយល់ពីលក្ខខណ្ឌនានា ហើយទំនាក់ទំនងវិស័យអប់រំក៏សំខាន់ផងដែរ សម្រាប់រឹតចំណងការទូតប្រទេសទាំង២ បន្ថែមលើវិស័យវប្បធម៌ ពាណិជ្ជកម្ម ជាដើម» ។
សូមបញ្ជាក់ដែរថា បណ្តាញ EducationUSA គឺជាបណ្តាញរបស់ក្រសួងការបរទេសអាមេរិកដែលមានមជ្ឈមណ្ឌលប្រឹក្សានិស្សិតអន្តរជាតិសម្រាប់ប្រទេសប្រមាណ ១៧០ប្រទេស៕
ដោយ៖សំបាន ច័ន្ទដារ៉ា