មន្ត្រីសុខាភិបាល៖ គិតពីខែមករា រហូតដល់ខែតុលានេះ រកឃើញករណីគ្រុនឈាមជាងពីរម៉ឺនករណី
ភ្នំពេញ៖ ប្រធានកម្មវិធីជាតិប្រយុទ្ធនឹងជំងឺគ្រុនឈាម នៃក្រសួងសុខាភិបាលលោក លាង ឬទ្ធា បានឱ្យដឹងថា គិតពីខែមករា រហូតដល់ខែតុលា ឆ្នាំ២០២៣នេះ រកឃើញករណីជំងឺគ្រុនឈាមជាង ២ម៉ឺនករណី ខណៈដែលចំនួនករណីទាំងនេះស្ថិតក្រោមការគ្រប់គ្រងបាន ក៏ប៉ុន្តែលោកអំពាវនាវឱ្យប្រជាពលរដ្ឋទាំងអស់ត្រូវបន្តការរក្សាអនាម័យជុំវិញលំនៅឋានរបស់ខ្លួន។
លោក លាង ឬទ្ធា បានថ្លែងប្រាប់ឱ្យដឹងថា គិតចាប់ពីដើមឆ្នាំ២០២៣ រហូតមកដល់ថ្ងៃទី១៩ ខែតុលានេះ គឺក្រសួងបានរកឃើញករណីគ្រុនឈាមសរុបចំនួន ២៣ ០០០ករណី ។ក្នុងនោះមានករណីស្លាប់មួយចំនួន តែវាមិនច្រើននោះទេ ខណៈដែលការរកឃើញចំនួនជំងឺគ្រុនឈាមឥឡូវនេះ ក៏មានការថយចុះផងដែរ។
លោកឱ្យបានឱ្យដឹងថា ករណីជំងឺគ្រុនឈាម ដែលរកឃើញមានច្រើនជាងគេគឺនៅរាជធានីភ្នំពេញ ខេត្តកណ្ដាល សៀមរាប និងខេត្តបន្ទាយមានជ័យ ។លោកបន្តថា ស្ថានភាពបច្ចុប្បន្ននេះ ការរកឃើញករណីជំងឺគ្រុនឈាមបានថយចុះ ដោយសារតែមានការយកចិត្តទុកដាក់ពីរដ្ឋមន្ត្រីក្រសួងសុខាភិបាល បានណែនាំ និងពង្រឹងវិធានការទៅដល់ខេត្តទាំងអស់។លោកបន្តថា ជំងឺគ្រុនឈាមដែលរកឃើញជាង ២ម៉ឺនករណីនេះ បើប្រៀបធៀបទៅនឹងឆ្នាំមុនរយៈពេលដូចគ្នា គឺមានការកើនឡើងចំនួនពីរដង។
លោកថា៖« ដូច្នេះទោះបីឆ្នាំនេះ ករណីជំងឺគ្រុនឈាមមានការកើនឡើងក៏ដោយ ប៉ុន្តែស្ថានភាពនេះស្ថិតក្នុងកម្រិតមួយដែលអាចគ្រប់គ្រងបាន ហើយវាមិនមានអ្វីធ្វើឱ្យជាការគួរព្រួយបារម្ភហួសពីសមត្ថភាព ក៏ដូចជាការឆ្លើយតប និងការទទួលខុសត្រូវរបស់ក្រសួងនោះទេ»។
លោកបានបញ្ជាក់ថា៖ « ស្ថានភាពនៅពេលនេះ គឺស្ថិតក្នុងកម្រិតមួយដែលយើងអាចគ្រប់គ្រងបាន ប៉ុន្តែយើងនូវតែបន្តអំពាវនាវឱ្យប្រជាជនត្រូវរស់នៅរក្សាអនាម័យ បរិស្ថាននៅជុំវិញផ្ទះហ្នឹង។ ហើយប្រសិនជាមាននរណាម្នាក់ ក្មេងក៏ដោយ ចាស់ក៏ដោយ ដែលក្ដៅខ្លួន សង្ស័យថាកើតជំងឺគ្រុនឈាមនោះ ដាច់ខាតត្រូវតែយកមកមន្ទីរពេទ្យឱ្យបានលឿនបំផុត»។
សូមបញ្ជាក់ថា កាលពីពេលថ្មីៗនេះ ឯកឧត្តម ឈាង រ៉ា រដ្ឋមន្ដ្រីក្រសួងសុខាភិបាល បានអំពាវនាវឱ្យអាជ្ញាធររាជធានី-ខេត្តទាំងអស់ ត្រូវបន្តពង្រឹងការអនុវត្តវិធានការសុខាភិបាលនានា ដើម្បីទប់ស្កាត់ការរាតត្បាតជំងឺគ្រុនឈាមឱ្យកាន់តែមានប្រសិទ្ធភាពខ្ពស់ ព្រមទាំងលើកកម្ពស់ការយល់ដឹង អំពីវិធានការបង្ការជំងឺឆ្លងនានាតាមរយៈបង្កើនការអប់រំផ្សព្វផ្សាយឱ្យកាន់តែទូលំទូលាយ ទៅដល់បុគ្គល គ្រួសារ សហគមន៍ និងសង្គមជាតិទាំងមូល៕
ដោយ៖ ជា សុខនី