កម្ពុជាបានទទួលពានរង្វាន់ជាគោលដៅទេសចរណ៍វប្បធម៌ឈានមុខគេ នៅអាស៊ី២ឆ្នាំជាប់ៗគ្នាដែលជាមោទកភាពជាតិខ្មែរ
(ភ្នំពេញ)៖ ក្រសួងទេសចរណ៍នៅថ្ងៃទី២៧ ខែកុម្ភៈ ឆ្នាំ២០២៤ បានអបអរសាទរ ព្រះរាជាណាចក្រកម្ពុជាដែលបានទទួល ពាន់រង្វាន់ជាគោលដៅទេសចរណ៍វប្បធម៌ឈានមុខគេ នៅអាស៊ីជាថ្មីម្តងទៀតក្នុងឆ្នាំ ២០២៣។ការឈ្នះពានរង្វាន់ ជាគោលដៅទេសចរណ៍វប្បធម៌ ឈានមុខ គេ នៅ អាស៊ីនេះដែរធ្វើឡើងដោយគេហទំព័រទេសចរណ៍ដ៏ល្បីនៅលើពិភពលោក World Travel Awards ដោយក្នុងនេះបានធ្វើការបោះឆ្នោតឲ្យកម្ពុជាគឺជាទិសដៅទេសចរណ៍វប្បធម៌ឈានមុនគេនៅតំបន់អាស៊ីប្រចាំឆ្នាំ ២០២៣។
សូមបញ្ជាក់ដែរថា នេះវាគឺជាលើកទី២ ផងដែរដែលប្រទេសកម្ពុជាបានទទួលបានតំណែងជាទិសដៅទេសចរណ៍វប្បធម៌ឈានមុខគេនៅតំបន់អាស៊ី ។ សម្រាប់ក្នុងឆ្នាំ២០២២ កម្ពុជាក៏ទទួលបានតំណែងនេះម្តងរួចមកហើយដែរ ។
ការទទួលបានតំណែងលេខ ១ ក្នុងនាមជាប្រទេសមានគោលដៅទេសចរណ៍វប្បធម៌ល្អដាច់គេបំផុតប្រចាំតំបន់អាស៊ីរយៈពេល ២ ឆ្នាំជាប់ៗគ្នានេះត្រូវបានគេចាត់ទុកថាជាមោទកភាពជាតិខ្មែរយ៉ាងធំធេង។សម្រាប់ប្រទេសចំនួន ៦ ដែលនៅពីក្រោយកម្ពុជាក្នុងឆ្នាំ២០២៣កន្លងមកមានដូចជា៖ ឥណ្ឌា ជប៉ុន នេប៉ាល់ ស្រីលង្កា ថៃ និងវៀតណាម ។
ក្រសួងទេសចរណ៍បានបញ្ជាក់ថា”សម្រាប់សមិទ្ធិផលដ៏គួរឱ្យកត់សម្គាល់នេះ បញ្ជាក់សារជាថ្មីអំពីភាពទាក់ទាញរបស់យើង ថាជាគោលដៅទេសចរណ៍ដែលដាច់ខាតត្រូវតែទៅទស្សនា សម្រាប់អ្នកមានចំណាប់អារម្មណ៍អំពីវប្បធម៌”។
គួរបញ្ជាក់ដែរថា ប្រទេសដែលទទួលបានដំណែងជាទិសដៅទេសចរណ៍វប្បធម៌ឈានមុខគេនៅតំបន់អាស៊ីក្នុងរយៈពេល ៥ឆ្នាំចុងក្រោយនេះមានដូចជា៖ប្រទេសកម្ពុជា ឆ្នាំ២០២៣,កម្ពុជាឆ្នាំ២០២២,ប្រទេសថៃ ឆ្នាំ២០២១,វៀតណាម ឆ្នាំ២០២០,និងវៀតណាមឆ្នាំ២០១៩។
សូមរំលឹកថាបើតាមមន្រ្តីជាន់ខ្ពស់នៃក្រសួងទេសចរណ៍បានឱ្យដឹងថាក្នុង ឆ្នាំ២០២៣ កម្ពុជាទទួលបានទេសចរអន្តរជាតិ ប្រមាណ ៥,៤៥លាននាក់ កើនឡើង ៣២.៨ភាគរយ ធៀបនឹងឆ្នាំ២០២២ និងទេសចរជាតិចំនួន ១៨,៥លាននាក់ ដែលបង្កើនចំណូលចូលជាតិប្រមាណ ៣០០០លានដុល្លារ ។ សម្រាប់នៅឆ្នាំ២០២៤ កម្ពុជារំពឹងថា ចំនួនទេសចរនឹងកើនឡើងជាងឆ្នាំ២០២៣បន្ថែមទៀត ៕
ដោយ ៖ ម៉ាដេប៉ូ