វ៉ាស៊ីនតោន៖ ក្រសួងការបរទេសអាមេរិក នៅថ្ងៃព្រហស្បតិ៍នេះ បានបញ្ជាក់ថា រដ្ឋមន្ត្រីការបរទេសអាមេរិក លោក អាន់ថូនី ប្លីងគែន បានស្នើឱ្យប្រមុខការទូតចិន និងសមភាគីផ្សេងទៀត ប្រើប្រាស់ឥទ្ធិពលរបស់ពួកគេ រារាំងអ៊ីរ៉ង់ពីការវាយលុកលើអ៊ីស្រាអែល។

អ្នកនាំពាក្យក្រសួងការបរទេសអាមេរិក លោក Matthew Miller បានប្រាប់អ្នកយកព័ត៌មានថា លោក ប្លីងគែន នៅថ្ងៃព្រហស្បតិ៍នេះ បានសន្ទនាតាមទូរស័ព្ទជាមួយរដ្ឋមន្រ្តីការបរទេសចិន តួកគី អារ៉ាប៊ីសាអូឌីត និងអឺរ៉ុប ដើម្បីបញ្ជាក់ឱ្យច្បាស់ថា ការកើនឡើងជម្លោះរវាងអ៊ីស្រាអែល និងអ៊ីរ៉ង់ មិនមែនជាផលប្រយោជន៍របស់នរណាម្នាក់ឡើយ ហើយថា ប្រទេសនានាគួរតែជំរុញឱ្យអ៊ីរ៉ង់បោះបង់ចោលការសងសឹកអ៊ីស្រាអែល។

លោក Miller បន្តថា លោក ប្លីងគែន ក៏បាននិយាយទូរស័ព្ទជាមួយរដ្ឋមន្ត្រីការពារជាតិអ៊ីស្រាអែល លោក Yoav Gallant ដើម្បីបញ្ជាក់ឡើងវិញនូវការគាំទ្រដ៏រឹងមាំរបស់អាមេរិកចំពោះអ៊ីស្រាអែល ប្រឆាំងនឹងការគំរាមកំហែងណាមួយពីអ៊ីរ៉ង់ផងដែរ។ ការអំពាវនាវរបស់ប្រមុខការទូតអាមេរិក កើតឡើងបន្ទាប់ពីមេដឹកនាំអ៊ីរ៉ង់បានប្តេជ្ញាសងសឹកវិញ បន្ទាប់ពីការវាយប្រហាររបស់អ៊ីស្រាអែលកាលពីថ្ងៃទី០១ ខែមេសាមកនេះ បានវាយលុកអគារការទូតអ៊ីរ៉ង់នៅទីក្រុងដាម៉ាស់ ក្នុងប្រទេសស៊ីរី ដោយបានសម្លាប់សមាជិក ៧នាក់នៃកងកម្លាំងឆ្មាំបដិវត្តន៍វរៈជនអ៊ីរ៉ង់ រួមទាំងឧត្តមសេនីយ៍ចំនួនពីរនាក់។

គួរបញ្ជាក់ថា សហរដ្ឋអាមេរិកបានធ្វើការអំពាវនាវជាសាធារណៈម្តងហើយម្តងទៀតដល់ប្រទេសចិន ដែលត្រូវបានគេមើលឃើញថា ជាគូប្រជែងពិភពលោកដ៏យូរអង្វែងរបស់ខ្លួន ឱ្យធ្វើការងារបន្ថែមទៀត ដើម្បីដោះស្រាយវិបត្តិនៅមជ្ឈិមបូព៌ា រួមទាំងការដាក់សម្ពាធលើអ៊ីរ៉ង់ ដែលជាខ្នងបង្អែករបស់ក្រុមហាម៉ាស់។ ប៉ុន្តែទោះបីជាយ៉ាងណា ចិនបានរិះគន់សហរដ្ឋអាមេរិកថា មានភាពលម្អៀងទៅខាងអ៊ីស្រាអែល៕ ប្រភព៖ AFP ប្រែសម្រួលដោយ៖ ឈឹម ទីណា