(ភ្នំពេញ)៖ ឯកឧត្តម ទុយ រី ឯកអគ្គរាជទូតកម្ពុជា ប្រចាំប្រទេសជប៉ុន មានប្រសាសន៍ថា ការរៀបចំសង្ក្រាន្តដើម្បីអបអរពិធីបុណ្យចូលឆ្នាំថ្មីប្រពៃណីជាតិ គឺចង់ឲ្យ បងប្អូន ប្រជាពលរដ្ឋខ្មែរដែលកំពុងរស់នៅ និងធ្វើការក្នុងប្រទេសជប៉ុនទាំងអស់ បានមកជួបជុំគ្នាលេងល្បែងកម្សាន្ដប្រជាប្រិយខ្មែត ក៏ដូចជា បង្កើតបរិយាកាសឲ្យសប្បាយរីករាយ ជាការឆ្លុះបញ្ចាំង ពីសាមគ្គីភាព មិត្តភាព ក្នុងចំណោមមហាគ្រួសារខ្មែរ។

ការលើកឡើងនេះក្នុងឱកាសស្ថានទូតកម្ពុជាប្រចាំប្រទេសជប៉ុន សហការជាមួយក្រសួងការងារ និងបណ្តុះបណ្តាលវិជ្ជាជីវៈ និងក្រុមការងារ ESEA ទទួលបន្ទុកខេត្ត អ៊ីបារ៉ាគិ និងសមាគមរាជសីហ៍ បានរៀបចំពិធីអបអរបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស.២៤៦៧ នៅសួនគីយាគិ(keyaki Park) ខេត្តអ៊ីបារ៉ាគិ (Ibaraki)ប្រទេសជប៉ុន នាថ្ងៃអាទិត្យ ៦កើត ខែចេត្រ ឆ្នាំរោង ឆស័ក ព.ស.២៥៦៧ ត្រូវនិងថ្ងៃទី១៤ ខែមេសា ឆ្នាំ២០២៤ ។

ជាមួយគ្នានេះ ឯកឧត្តម ទុយ រី ក៏បានពាំនាំនូវសេចក្តីនឹករលឹក សួរសុខទុក្ខ និងការជូនពរឆ្នាំថ្មី ពីសំណាក់ ប្រមុខរាជរដ្ឋាភិបាលកម្ពុជា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនដល់បងប្អូនពលរដ្ឋខ្មែរ សិស្ស និស្សិត និងកម្មសិក្សាការី ដែលរស់នៅ សិក្សា និងធ្វើការក្នុងប្រទេសជប៉ុនទាំងអស់ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ។

ជាមួយគ្នានោះ ឯកអគ្គរាជទូត ក៏បានផ្ដាំផ្ញើដល់ក្មួយៗដែលជាកម្មសិក្សាការី សិស្សនិស្សិត ពលករជំនាញ និងប្រជាពលរដ្ឋដែលរស់នៅ ធ្វើការក្នុងប្រទេសជប៉ុនទាំងអស់ ត្រូវចេះស្រលាញ់គ្នា សាមគ្គីគ្នាជាខ្មែរតែមួយ ត្រូវខិតខំប្រឹងប្រែងរៀនសូត្រ នឹងបំពេញការងារជូនក្រុមហ៊ុនឲ្យបានល្អ កុំចាញ់បោកកាអូសទាញរបស់មេខ្យល់ កុំរត់ចោលក្រុមហ៊ុននាំឲ្យប្រឈមនឹងផ្លូវច្បាប់ នឹងនាំឲ្យបាត់បង់ឱកាសបំពេញការងារបន្តទៀត ត្រូវគិតដើម្បីខ្លួនឯង គ្រួសារ នឹងប្រទេសជាតិ ហើយជៀសឆ្ងាយពីការប្រើប្រាស់គ្រឿងញៀន ក៏ដូចជាអំពើអបាយមុខផ្សេងៗ ។ ឯកឧត្តមបានបន្ថែមថា បងប្អូនកូនក្មួយទាំងអស់ ដែលរស់នៅធ្វើការក្នុងប្រទេសជប៉ុន បើមានការអ្វីត្រូវទាក់ទង់មកស្ថានទូតជាបន្ទាន់ ។

សូមបញ្ជាក់ថា ៖ ជាមួយនឹងសង្ក្រាន្តអបអរពិធីបុណ្យចូលឆ្នាំថ្មីប្រពៃណីជាខ្មែរ ក៏មានការរាប់បាត្រ ពូនភ្នំខ្សាច់ បង្សុកូល ប្រគេនចង្ហាន់ព្រះសង្ឃ ទៅតាមប្រពៃណីទំនៀមទម្លាប់ព្រះពុទ្ធសាសនារបស់ខ្មែរ និងមានស្តង់លក់ម្ហូបអាហារខ្មែរ ផលិតផលខ្មែរជាច្រើន ដូចជានំអន្សម នំគម ម្រេចខ្មែរ សម្លៀកបំពាក់ប្រពៃណីខ្មែរ និងលេងល្បែងប្រជាប្រិយចោលឈូង ទាញព្រ័ត្រ កន្លែងទាញព្រ័ត និងរាំលេងកំសាន្ត ប្រកបដោយបរិយាកាស សប្បាយ រីករាយ ស្និទ្ធស្នាល និងសាមគ្គីភាព ៕

ដោយ / គ្រី សម្បត្តិ