នាយករដ្ឋមន្ត្រីអូស្ត្រាលី លោក Anthony Albanese បាននិយាយថា លោក Elon Musk គឺជា «មហាសេដ្ឋីដ៏ក្រអឺតក្រទម» និង មិនបើកភ្នែកដែលបណ្តោយឲ្យវីដេអូកាប់សម្លាប់មនុស្ស ចែកចាយ ពេញបណ្តាញសង្គម X។

ថ្មីៗនេះ បុព្វជិតម្នាក់ត្រូវបានជនសង្ស័យ អាយុ១៦ ឆ្នាំសម្លាប់ ក្នុងពេលទេសនា ដែលមានការផ្សាយផ្ទាល់ ក្នុងទីក្រុងស៊ីដនី។ កាលពីថ្ងៃចន្ទ ស្ថាប័នឃ្លាំមើលអ៊ីនធឺណិតរបស់អូស្រា្តលី ហៅកាត់ eSafety បានសម្រេចរក្សាដីកា បង្ខំឱ្យ X លុបវីដេអូ នេះចេញ។ ប៉ុន្តែ លោកមហាសេដ្ឋី Elon Musk ឆ្លើយតបថា អូស្ត្រាលីកំពុងទាមទារគ្រប់គ្រងអ៊ីនធឺណិតទាំងមូល ក្នុងប្រទេសរបស់ខ្លួន ដែលនេះគឺជាក្តីបារម្ភ។ លោកអះអាង ក្រុមហ៊ុន X របស់លោក នឹងប្តឹងឧទ្ធរណ៍ ចំពោះការសម្រេចនេះ។ យ៉ាងណាមិញ X បានលុបវីដេអូនេះ ក្នុងប្រទេសអូស្ត្រាលី តែ នៅតែអាចមើលឃើញ នៅតំបន់ផ្សេងៗ ជុំវិញពិភពលោក។

នាយករដ្ឋមន្ត្រីអូស្ត្រាលីបានអះអាងថា វីដេអូវាយប្រហារបង្ហូរឈាម ដែលផ្សព្វផ្សាយយ៉ាងទូលំទូលាយ ត្រូវបានអាជ្ញាធរអូស្ត្រាលីចាត់ទុកថា ជាការផ្តល់នូវភាពតានតឹង ក្នុងសហគមន៍។ អ្វីដែលគួរឲ្យកត់សម្គាល់ ហេតុការណ៍កាប់សម្លាប់នេះ បានបង្កឲ្យមានកុប្បកម្ម នៅតាមព្រះវិហារនានា ក្នុងប្រទេសអូស្ត្រាលី។

សំណុំរឿងរវាង X និង eSafety របស់អូស្ត្រាលីនេះ គ្រោងនឹងត្រូវបញ្ជូនត្រឡប់ ទៅតុលាការវិញ នៅចុងសប្តាហ៍នេះ។ កាលពីឆ្នាំមុន eSafety ធ្លាប់ប្តឹង X ទាមសំណងជាង៦០ម៉ឺនដុល្លារ ដោយសារតែ X មិនបានដោះស្រាយ រឿងបំពានកុមារ លើអ៊ីនធឺណិត ប៉ុន្តែ X ក៏បានចាប់ផ្តើមដំណើរការ តាមផ្លូវតុលាការ ដើម្បីតទល់វិញ នេះបើតាម The Guardian៕

ប្រភពពី AFP និង The Guardian