សិក្ខាសាលាពិគ្រោះយោបល់ស្តីពីផែនការកំណត់អាទិភាព និងកិច្ចការសម្របសម្រួលការអនុវត្តកម្មវិធីទឹកស្អាតជនបទនៅខេត្តកំពង់ធំ
កំពង់ធំ៖មន្ទីរអភិវឌ្ឍន៍ជនបទខេត្តកំពង់ធំ បានបើកសិក្ខាសាលាពិគ្រោះយោបល់ស្តីពីការកំណត់អាទិភាព និងកិច្ចការសម្របសម្រួលការអនុវត្តកម្មវិធីទឹកស្អាតជនបទរបស់មន្ទីរអភិវឌ្ឍន៍ជនបទនៅសាលប្រជុំមន្ទីរអភិវឌ្ឍន៍ជនបទខេត្តកំពង់ធំ ។
សិក្ខាសាលាពេញមួយថ្ងៃ កាលពីថ្ងៃទី២៣ ខែមេសាប្រព្រឹត្តទៅក្រោមអធិបតីភាពលោក ទង គឹមតុល នាយករងរដ្ឋបាលសាលាខេត្ត ,អនុប្រធានក្រុមការងារPWGខេត្តកំពង់ធំ និងលោកស្រី ង៉ូវ គឹមសែន អនុប្រធាននាយកដ្ឋានតំណាងលោក ស្រ៊ិន ពុទ្ធី ប្រធាននាយកដ្ឋានផ្គត់ផ្គង់ទឹកជនបទ និងជាប្រធានក្រុមការងារបច្ចេកទេស វិស័យផ្គត់ផ្គងទឹកនិងអនាម័យជនបទ ។សិក្ខាសាលាក៏មានការចូលរួមពី ប្រធាន អនុប្រធានមន្ទីរ អង្គភាពជុំវិញខេត្ត អភិបាលរងក្រុង ស្រុក មន្រ្តីរដ្ឋបាលសាលាស្រុកទទួលបន្ទុកការងារសេវាសង្គម និងអង្គការដៃគូអភិវឌ្ឍន៍ផ្នែក សុខភាពអនាម័យ ដែលមានការិយាល័យក្នុងខេត្តមួយចំនួនទៀត។
លោក ធន់ សូរិយា មន្ត្រីជំនាញទឹកស្អាត និងអនាម័យនៃអង្គការយូនីសេហ្វ(UNICEF)បានលើកឡើងថា រាជរដ្ឋាភិបាលបានដាក់គោលដៅឆ្នាំ២០៣០ ឱ្យប្រជាជនទទួលបានទឹកស្អាតប្រើប្រាស់១០០ភាគរយនៅទូទាំងប្រទេស។
ចំណែកលោកស្រី ង៉ូយគឹមសែន បាននិយាយថាសិក្ខាសាលាពិគ្រោះយោបល់ជាឱកាសពិគ្រោះយោបល់ផ្តល់អនុសាសន៍ផ្តល់ធាតុចូលនិងផ្តល់ទិន្នន័យមួយចំនួនដែលជាតម្រូវការសម្រាប់ប្រើប្រាស់សំដៅពន្លឿនក្នុងការអនុវត្តកម្មវិធីទឹកស្អាតជនបទដែល មានអត្រាកំណើននៅមានកម្រិតនៅឡើយ ។ខេត្តកំពង់ធំគឺជាខេត្តស្ថិតក្នុងគោលដៅរបស់អង្គការយូនីសេហ្វបានផ្តល់ចំណេះដឹង ពិធីសារនិងការរៀបចំផែនការយុទ្ធសាស្ត្រក្នុងការចាត់ចំណាត់ថ្នាក់អាទិភាពការផលិតទឹកស្អាតជនបទក្នុងការរៀបចំផែនការប្រចាំឆ្នាំនិងការកំណត់គោលដៅតំបន់អាទិភាពសម្រាប់ដៃគូអភិវឌ្ឍន៍គម្រោងទឹកស្អាត ។
លោក ទង គឹមតុល នាយករងរដ្ឋបាលសាលាខេត្ត តំណាងឱ្យអនុប្រធានក្រុមការងារPWG បានបញ្ជាក់ថា ដើម្បីឆ្លើយតបឱ្យ មានប្រសិទ្ធភាពសូមគ្រប់ភាគីពាក់ព័ន្ធទាំងអស់ចូលរួមអនុវត្តផែនការសកម្មភាពសម្រាប់ឆ្នាំ២០៣០នាពេលខាងមុខនេះឱ្យទទួលបានជោគជ័យដូចការរំពឹងទុក៕
អត្ថបទនិងរូបភាព៖ប៊ុន រដ្ឋា