កាសែត The Nation របស់ថៃបានចេញផ្សាយ កាលពីថ្ងៃអាទិត្យថា ក្រុមហ៊ុនអាកាសចរណ៍ថៃ Thai Airways បានប្រកាសលក់យន្តហោះចាស់ៗចំនួន១៨គ្រឿង ហើយនឹងជំនួសមកវិញដោយយន្តហោះបារំាង Airbus ដ៏ទំនើបដែល បំពាក់ម៉ាស៊ីន Rolls-Royce។

យន្តហោះដែលត្រូវបានដាក់លក់ដំបូងគេគឺយន្តហោះអាមេរិក Boeing 747-400 ដែលលើសអាយុកាលប្រើប្រាស់។ ក្រៅពីនោះ មានយន្តហោះបារំាង Airbus A380 និង Boeing 777។

នាយកប្រតិបត្តិក្រុមហ៊ុន Thai Airways លោក Chai Iamsiri រំពឹងថា នឹងលក់ដាច់អស់ ក្នុងពេលឆាប់ៗនេះព្រោះពេលនេះក្រុមហ៊ុនកំពុងចរចារជាមួយអ្នកទិញមួយចំនួន។

ដើម្បីជំនួសយន្តហោះចាស់ៗ Thai Airways ចាប់ផ្តើមដំណើរការ ជាបណ្តើរៗ នូវយន្តហោះ Airbus A350s ដែលបំពាក់ដោយម៉ាស៊ីន Rolls-Royce Trent XWB ។ ចាប់ពីត្រីមាសទី ៤ ឆ្នាំ ២០២៥ តទៅ ក្រុមហ៊ុនគ្រោងនឹងចាប់ផ្តើមដំណើរការយន្តហោះ Airbus A321neo ហើយគ្រោងនឹងបង្កើន ចំនួនយន្តហោះ ប្រភេទនេះ នៅឆ្នាំបន្តបន្ទាប់ទៀត៕

ប្រភពពី The Nation ប្រែសម្រួល៖ សារ៉ាត