ក្រុមបាល់ទាត់ SCG Muangthong United បានចែករំលែកបទពិសោធន៍ ដល់ក្មេងជាង២០០នាក់ ក្នុងកម្មវិធី Kick and Share by SCG
ក្រុមខ្លាំងរបស់លីគកំពូលថៃ Muangthong United បានចែករំលែកបទពិសោធន៍ ថ្ងៃ ដល់កុមារកម្ពុជា ជាង២០០នាក់ ក្នុងកម្មវិធី Kick and Share by SCG នៅលើទីលានពហុកីឡដ្ឋានជាតិ បន្ទាប់ពីមកបានមកដល់ប្រទេសកម្ពុជាកាលពីម្សិលមិញ មុនការប្រកួតជាលក្ខណៈមិត្តភាពសប្បុរសធម៌ ជាមួយក្រុម K Cement All Stars របស់កម្ពុជា។
លោក ពង់ថាណា ដេវីតាយ៉ាផន នាយកផ្នែកលក់ និងទីផ្សាររបស់ក្រុមហ៊ុន អេសស៊ីជី ប្រចាំកម្ពុជា បានមានប្រសាសន៍ថា វគ្គបណ្តុះបណ្តាលនេះជាផ្នែកមួយនៃកម្មវិធី SCG Muangthong United Asean Tour 2019 ជួយផ្តល់ជំនាញ ក្នុងការលេងបាល់ទាត់សម្រាប់យុវជនកម្ពុជា ដើម្បីឲ្យពួកគេសម្រេចក្តីសុបិនផ្នែកកីឡាបាល់ទាត់ និងលើកទឹកចិត្តឲ្យពួកគេចូលរួមក្នុងសកម្មភាពដែលមានប្រយោជន៍។ លោកបន្តថា អេសស៊ីជី តាំងចិត្ត ជួយលើកកម្ពស់ការរស់នៅរបសើប្រជាជនក្នុងសហគមន៍ និងប្រទេសដែលយើងធ្វើប្រតិបត្តិការអាជីវកម្ម ។ លោកមានជំនឿមុតមាំថា កីឡា និងការកម្សាន្តគឺជាផ្នែកមួយដ៏មានតម្លៃក្នុងជីវិត ដូច្នេះហើយតើបក្រុមហ៊ុន អេសស៊ីជី បានផ្តួចផ្តើមនូវគម្រោងជាច្រើន រាប់បញ្ជូលទាំងគម្រោង Kick and Share by SCG នេះ ដើម្បីនាំមកនូវអនាគតកាន់តែភ្លឺស្វាងសម្រាប់ប្រជាជន ជាពិសេសជំរុញទឹកចិត្តកុមារអោយចូលរួមលេងកីឡា ដើម្បីសម្រេចក្តីស្រម៉ៃពួកគេ ចង់ក្លាយជាកីឡាបាល់ទាត់អាជីពតំណាងឲ្យកម្ពុជានាថ្ងៃអនាគត។
គួររំលឹកថា កម្មវិធីហ្វឹកហាត់បាល់ទាត់ ដែលរៀបចំដោយក្រុមហ៊ុន អេសស៊ីជី គឺធ្វើជាច្រើនឆ្នាំមកហើយ ដោយមានការសហការជាមួយសហព័ន្ធកីឡាបាល់ទាត់កម្ពុជា ក្នុងនោះក៏បានផ្តល់សម្ភារកីឡាជូនដល់ក្មេងៗផងដែរ។ សូមបញ្ជាក់ថា តាមរយៈកម្មវិធីជាច្រើន ដូចជា វគ្គហ្វឹកហាត់បាល់ទាត់នេះ គឺជាផ្នែកមួយនៃការងារផ្នែកអប់រំរបស់ក្រុមហ៊ុន អេសស៊ីជី បានផ្តល់អាហារូបករណ៍ជាងមួយពាន់កន្លែងដល់យុវជនកម្ពុជា តាមរយៈកម្មវិធីអាហាររូបករណ៍ អេសស៊ីជី ចែករំលែកក្តីសុបិន៕ម.ន