Wu Lei បង្ហាញខ្លួនដំបូងនៅ La Liga ស្រូបបាន Fan ចិន៤០លាននាក់
ការផ្ទេររបស់កីឡាករ Wu Lei ពីក្លិប Shanghai SIPG មកកាន់ក្លិប Espanyol កាលពីខែមករាកន្លងទៅ ប្រហែលមិនសូវមានការចាប់អារម្មណ៍ខ្លាំង ប៉ុន្តែនៅប្រទេសចិនពិតជារឿងមោទកភាព។ Lei បានបង្ហាញខ្លួនដំបូង ក្នុងនាមជាកីឡាករបម្រុងកាលពីថ្ងៃអាទិត្យសប្ដាហ៍មុន ពេលប្រកួតស្មើគ្នា ២-២ ជាមួយ Villarreal។ តាមការរាយការណ៍របស់ Espanyol ចំនួនអ្នកទស្សនាពីប្រទេសចិនមានដល់៤០លាននាក់ សម្រាប់ការលេងរយៈពេលបង្ហាញខ្លួន១២នាទីរបស់ Lei។
សម្រាប់ការប្រកួតដូចគ្នានេះ អ្នកទស្សនាតាមទូរទស្សន៍នៅប្រទេសអេស្ប៉ាញមានតែ១៧៧០០០។ យោងតាមកាសែតអេស្ប៉ាញ Marca ចំនួនអ្នកទស្សនារបស់ Espanyol បូកចូលគ្នាសម្រាប់១៧ប្រកួត ក្នុងរដូវកាលនេះ មានត្រឹមតែ៧លានប៉ុណ្ណោះ។ បច្ចុប្បន្ន Espanyol មានម្ចាស់ក្លិបជាមួយសេដ្ឋីចិនឈ្មោះ Chen Yansheng ហើយចាប់តាំងពីផ្ទេរ Lei ដែលគេឲ្យរហស្សនាមជា Maradona ចិន ក្លិប Espanyol កើនអ្នកគាំទ្រច្រើនមែនទែនពីប្រទេសចិន៕ម.ន