កម្ពុជានិងថៃត្រៀមចរចាលើតំបន់មានប្រេងកាតត្រួតគ្នាឡើងវិញ
បើទោះបីជាមិនទាន់កំណត់ថ្ងៃជាក់លាក់មែន ប៉ុន្តែរដ្ឋាភិបាលកម្ពុជាបានអះអាងថា ជំនួបចរចាលើតំបន់ត្រួតស៊ីគ្នារវាងកម្ពុជានិងថៃនឹងត្រូវធ្វើឡើងក្រោយជំងឺកូវីដ១៩។ នេះគឺជាការបញ្ជាក់ពីអគ្គនាយកប្រេងកាតនៃក្រសួងរ៉ែនិងថាមពលជាមួយកាសែតក្នុងស្រុកកាលពីពេលថ្មីៗនេះ។
តំបន់ដែលត្រួតគ្នានេះ មានផ្ទៃក្រឡា ២៦.០០០ ម៉ែតការ៉េ ដែលត្រូវបានកាន់កាប់ដោយប្រទេសទាំងពីរចាប់តាំងពីទសវត្សទី ៧០មក ហើយការកាន់កាប់នេះមានការចុះអនុស្សារណយោគយល់ដែលធ្វើឡើងក្នុងឆ្នាំ ២០០១ តែត្រូវអាក់ខានដោយសារជម្លោះនយោបាយផ្ទៃក្នុងថៃកាលពីឆ្នាំ២០០៩។ ប្រទេសទាំងពីរធ្លាប់ជួបចរចាជាមួយគ្នាចំនួន២លើកគឺនៅក្នុងឆ្នាំ២០១១ និងឆ្នាំ២០១៤ ប៉ុន្តែគ្មានលទ្ធផល។
បើតាមការវាយតម្លៃតំបន់ត្រួតស៊ីគ្នានេះ មានប្រេងប្រមាណ៥០០លានបារ៉ែល។ដោយសារតែបញ្ហាខ្វែងគំនិតគ្នាលើតំបន់ត្រួតស៊ីគ្នានេះ ប្រទេសទាំងពីរនៅមិនទាន់បានទាញយកដំណក់ប្រេង និងឧស្ម័ននៅឡើយទេ។ យ៉ាងណាក៏ដោយរដ្ឋាភិបាលកម្ពុជាតាមរយៈក្រសួងរ៉ែនិងថាមពល រំពឹងថាការចរចានឹងអាចកើតឡើងឆាប់ៗពេលដែលកូវីដបញ្ចប់៕
