កីឡាករឆ្នើម Mesut Ozil ប្រកាសចាកចេញពីជម្រើសជាតិ អាល្លឺម៉ង់
កីឡាករឆ្នើមរបស់ក្រុមជម្រើសជាតិអាល្លឺម៉ង់ Mesut Ozil ទទួលរងពាក្យរិះគន់យ៉ាងច្រើនចំពោះរូបថតជាមួយប្រធានាធិបតីតួកគីលោក Tayyip Erdogan ខ្សែបម្រើប្រយុទ្ធរូបនេះ បាននិយាយនៅថ្ងៃអាទិត្យ ទី២២ ខែកក្កដាកន្លងទៅនេះ ថា គេនឹងចាកចេញពីក្រុមជម្រើសជាតិអាល្លឺម៉ង់ ។
កីឡាករឆ្នើមវ័យ ២៩ឆ្នាំ រូបនេះបានបង្ហោះសារមួយនៅលើបណ្តាញសង្គម Twitter របស់ខ្លួនថា ៖ «ជាមួយនឹងបេះដូងដ៏ធ្ងន់មួយ និងការពិចារណាយ៉ាងច្រើនលើហេតុការណ៍ថ្មីៗនេះ ខ្ញុំនឹងមិនចូលរួមលេងឱ្យក្រុមជម្រើសជាតិអាល្លឺម៉ង់ ទៀតទេលើឆាកអន្តរជាតិ ខណៈខ្ញុំមានអារម្មណ៍នៃការរើសអើងជាតិសាសន៍ និងភាពមិនមានការគោរព» ។
រូបគេបានទម្លាយចំៗថា គេមានបេះដូងពីរចំណែកគឺមួយចំណែកសម្រាប់អាល្លឺម៉ង់ និងមួយចំណែកទៀតសម្រាប់តួកគី ហើយវាពិតជាគួរឱ្យស្ដាយបើសិនគេមិនបានទៅជួបប្រធានាធិបតីតួកគីនោះទេ ។ សូមបញ្ជាក់ដែរថា កីឡាករ Mesut Ozil គឺជាកីឡាករដែលធ្លាប់ឈ្នះពាន កីឡាករអាល្លឺម៉ង់ឆ្នើមជាងគេចំនួន៥ឆ្នាំ ហើយក៏ជាអតីតសមាជិករបស់ក្រុម Schalke, Werder Bremen និង Real Madrid ។