អ្នករៀបចំព្រឹត្តិការណ៍ប្រណាំងកង់ភ្នំកម្ពុជា លោក Pierre  Yves Catry បានបង្ហាញជំនឿចិត្តខ្ពស់ថា ប្រណាំងកង់ភ្នំ នៅ ខេត្តកែប ឆ្នាំ២០១៨នេះ នឹងមានអ្នកចូលរួមប្រមាណ ២០០នាក់ ដែលចំនួននេះច្រើនជាងការប្រកួតទីលានផ្សេងៗ ដោយសារមើលឃើញពីភាពទាក់ទាញ និងស្ថានភាពប្រកួតប្រជែងមានកម្រិតខ្ពស់ អ្នករៀបចំ ព្រឹត្តិការណ៍កង់ភ្នំកម្ពុជា ។ 

អ្នករៀបចំព្រឹត្តិការណ៍ប្រណាំងកង់ភ្នំ បន្តថា ព្រឹត្តិការណ៍ជុំទី២ នៅខេត្តកែប ដែលជាទីលានថ្មី នឹងអាចទាក់ទាញបានអ្នកចូលរួមកានតែច្រើន ពោលគឺអាចទាក់ទាញបានចន្លោះ ពី១៥០ ទៅ ២០០នាក់ ដ្បិតលោកយល់ថា ទីលានថ្មីនេះ មានកម្រិតប្រកួតប្រជែងខ្ពស់ជាលក្ខណៈស្តង់ដា ទៅតាមវិញ្ញាសា ប្រកួតរបស់ព្រឹត្តការណ៍ ឯបរិកាសក៏ល្អប្រសើរ ពីព្រោះវាជាតំបន់អេកូទេសចរ នៅជាប់មាត់សមុទ្រផងដែរ ។ លោក Pierre Yves Catry  បញ្ជាក់ទៀតថា ចំនួនអ្នកចុះឈ្មោះនាពេលនេះ មិនទាន់ដឹងច្បាស់ថាប៉ុន្មាននាក់នៅឡើយទេ ប៉ុន្តែលោកសង្ឃឹមខ្ពស់ថា អ្នកចូលរួមនិងមានការកើនឡើង  ពីព្រោះតំបន់ថ្មី ទីលានថ្មី ផ្លូវប្រកួតប្រកបដោយភាពទាក់ទាញ។ 

ជាមួយគ្នានេះគ្រូបង្វឹកជម្រើសជាតិទោចក្រយាន្តកម្ពជា លោក Frank បានចាត់ទុក ការរៀបចំ ប្រកួតប្រជែងនៅតំបន់កែបនេះ គឺជាឱកាសល្អ សម្រាប់កីឡាករ កីឡាការិនីជំនាញ ពង្រឹងសមត្ថភាពជាមួយនឹងស្ថានភាពផ្លូវដ៏លំបាក ក្នងការប្រកួតប្រជែង ។  លោក រំពឹងខ្ពស់ថា ការប្រកួតប្រជែងនៅតំបន់កែប នឹងផ្តល់ឱកាសដល់ជម្រើសជាតិជិះកង់កម្ពុជា អាចបង្កើនពង្រឹងសមត្ថភាពខ្លួនតាមរយៈការប្រកួតប្រជែងលើស្ថានភាពផ្លូវដ៏លំបាកនៅខេត្តនេះ ។ ហើយលោក រីករាយដែលអត្តពលិកទាំងអស់ រួមទាំងអ្នករៀបចំសិតតែមានឆន្ទៈ ក្នុងការចូលរួមអភិវឌ្ឍន៍វិស័យកីឡាប្រណាំងកង់ លោកជឿជាក់ថា ២ទៅ៣ឆ្នាំទៀត វិញ្ញាសាប្រណាំងនឹងអាចប្រជែងមេដាយ ពីព្រឹត្តការណ៍អន្តរជាតិជាក់ជាមិនខានបាន។

សូមបញ្ជាក់ថា ព្រឹត្តិការណ៍ Mountain Bike Series 2018 ជុំទី២ នៅខេត្តកែប នឹងប្រព្រឹត្តទៅ នៅថ្ងៃទី២៤ ខែមិថុនា ខណៈវិញ្ញាសាប្រកួតប្រជែងមានចំនួន៩ ៕