AKP ភ្នំពេញ ថ្ងៃទី២៦ ខែតុលា ឆ្នាំ២០២០–
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា គម្រោងអភិវឌ្ឍន៍កោះនរាបានរួមចំណែកដល់ផលិតផលក្នុងស្រុកសរុបប្រមាណជា ២២៥លានដុល្លារក្នុងមួយឆ្នាំ ដែលស្មើនឹង០,៩ភាគរយ នៃផលិតផលក្នុងស្រុកសរុបនាពេលបច្ចុប្បន្ន។
ក្នុងពិធីបើកការដ្ឋានស្ថាបនាស្ពានតភ្ជាប់ពីទីក្រុងរណបកោះពេជ្រ ទៅកាន់តំបន់ អភិវឌ្ឍន៍កោះនរា ឆ្ពោះទៅផ្លូវជាតិលេខ១ ស្ថិតក្នុងភូមិសាស្ត្រ សង្កាត់និរោធ ខណ្ឌច្បារអំពៅ រាជធានីភ្នំពេញ នាព្រឹកថ្ងៃទី២៦ ខែតុលាឆ្នាំ២០២០ សម្ដេចតេជោ ហ៊ុន សែន បានថ្លែងនូវការកោតសរសើរចំពោះក្រុមហ៊ុនវិនិយោគទុនអាណិកជនកម្ពុជា (OCIC) ក៏ដូចជាបណ្ដាក្រុមហ៊ុនវិនិយោគទាំងអស់នៅកម្ពុជា ដែលបានបន្តដំណើរការរបស់ខ្លួន បើទោះបីជាប្រឈមនឹងកូវីដ១៩ ប៉ុន្តែបានបង្កើតការងារ និងប្រាក់ចំណូល ព្រមទាំងបង្កើតនៅការវិនិយោគថ្មីៗបន្ថែមទៀតសម្រាប់ប្រជាពលរដ្ឋកម្ពុជា។ សម្តេចតេជោនាយករដ្ឋមន្ត្រីបាន លើកឡើងថា ការសាងសង់ស្ពានតភ្ជាប់ថ្មី ដែលជាសមិទ្ធផលរបស់ជាតិនេះ កើតចេញការអភិវឌ្ឍ ដោយប្រើប្រាស់រូបមន្តយកស្លឹកត្នោត ខ្ចប់ស្ករត្នោត។ ត្រង់ចំណុចនេះ បានសេចក្តីថា គឺជាការយកថវិកាពីអភិវឌ្ឍន៍ទីក្រុងកោះនរា របស់ក្រុមហ៊ុន OCIC ដើម្បីសាងសង់ស្ពានតភ្ជាប់ពីកោះពេជ្រ មកកោះនរា និងពីកោះនរា ទៅផ្លូវជាតិលេខ១នេះ។ សម្ដេចតេជោបានអះអាងថា ការអភិវឌ្ឍន៍ទីក្រុងកោះពេជ្រ ទីក្រុងរណបជ្រោយចង្វារ និងទីក្រុងកោះនរានេះ បានយកផលចំណេញ ទៅកសាងសំណង់ផ្លូវស្ពាន និងសំណង់ផ្សេងៗ នៅរាជធានីភ្នំពេញបានជាច្រើន។ សម្តេចតេជោ ហ៊ុន សែន បានកោតសរសើរ និងជំរុញរដ្ឋបាលរាជធានីភ្នំពេញ ត្រូវតែបន្តអភិវឌ្ឍន៍តាមរូបមន្តយកស្លឹកត្នោត ខ្ចប់ស្ករត្នោតនេះ។
លោកឧកញ៉ា ពង់ ឃាវសែ ប្រធានក្រុមហ៊ុនវិនិយោគទុនអាណិកជនកម្ពុជា (OCIC) បានឱ្យដឹងថា គម្រោងអភិវឌ្ឍន៍«កោះនរា»ក្នុងទំហំផ្ទៃដី១២៥ហិកតា ដែលមានតម្លៃវិនិយោគប្រមាណ៥៥០លានដុល្លារអាម៉េរិក របស់ក្រុមហ៊ុនវិនិយោគទុនអាណិកជនកម្ពុជា (OCIC) នឹងរួមចំណែកដល់ផលិតផលក្នុងស្រុកសរុប(GDP) ចំនួន២២៥លានដុល្លារក្នុងមួយឆ្នាំៗ ដែលជិតស្មើ០.៩ភាគរយនៃ GDP ប្រទេសកម្ពុជានាពេលបច្ចុប្បន្ន។ លោកឧកញ៉ាបានបញ្ជាក់ថា សម្រាប់ថវិកាវិនិយោគ ៥៥០លានដុល្លារអាម៉េរិកនៃការសាងសង់ហេដ្ឋារចនាសម្ព័ន្ធ ក្នុងរយៈពេល៣ឆ្នាំដំបូង ពោលចាប់ពីខែមករាឆ្នាំ២០២០ ដល់ឆ្នាំ២០២៣ បានផ្តល់អត្ថប្រយោជន៍ជាច្រើនដល់សង្គម និងសេដ្ឋកិច្ចជាតិ។ បច្ចុប្បន្នគម្រោងអភិវឌ្ឍន៍«កោះនរា» កំពុងប្រើប្រាស់កម្លាំងពលកម្មប្រមាណ៧០០នាក់ ហើយកើនដល់ ៧ ០០០នាក់ ពេលគម្រោងមានការសាងសង់ពេញទំហឹង។
លោកឧកញ៉ាបានបន្តថា បន្ទប់ពីបញ្ចប់ការដ្ឋានសាងសង់ស្ពានក្នុងគម្រោងអភិវឌ្ឍន៍«កោះនរា»នេះ នឹងបង្កើតឱកាសការងារដល់ប្រជាពលរដ្ឋ បានប្រមាណ១ម៉ឺនកន្លែង ក្នុងដំណើរប្រតិបត្តិការប្រចាំថ្ងៃ។ ជាមួយគ្នានេះ គម្រោងអភិវឌ្ឍន៍«កោះនរា»នេះ អាចអនុញ្ញាតឱ្យប្រជាពលរដ្ឋរស់នៅបានចំនួន៥ម៉ឺននាក់ ដោយគ្រោងចំណាយថវិកាសរុបចំនួន២,៥០០លានដុល្លារអាម៉េរិក។
សូមបញ្ជាក់ផងដែរថា សព្វថ្ងៃនេះ ក្រុមហ៊ុន OCIC កំពុងសាងសង់ស្ពានបេតុងឆ្លងទន្លេចំនួន២ខ្សែ ដោយស្ពានទី១ មានតម្លៃ១,៦លានដុល្លារអាម៉េរិក ដែលជាប្រភេទស្ពានបេតុងយោងខ្សែកាប ហើយតភា្ជប់ពីផ្លូវជាតិលេខ១ ទៅកាន់តំបន់អភិវឌ្ឍន៍កោះនរា។ ស្ពាននេះ មានបណ្តោយ៦០ម៉ែត្រ និងទទឹង២១ម៉ែត្រ។ ស្ពានបេតុងយោងខ្សែកាបទី២ មានតម្លៃ៣៨លានដុល្លារអាម៉េរិក ដែលតភ្ជាប់ពីតំបន់អភិវឌ្ឍន៍កោះនរាទៅកាន់ទីក្រុងកោះពេជ្រ។ ស្ពាននេះមាន បណ្តាយ ៨២៤ម៉ែត្រ ទទឹង២៤,៥ម៉ែត្រ។ គម្រោងស្ពានបេតុងនេះ ធ្វើឡើងជាស្ពានមានលក្ខណៈ ទ្វេទិស ដែលមានគន្លងសម្រាប់រថយន្ត២ទៅ និងគន្លង សម្រាប់រថយន្ត២មក មានប្រវែង ៣,២៥ម៉ែត្រ ក្នុងមួយគន្លង។ ក្រៅពីរថយន្ត ស្ពានថ្មីនេះ ក៏មានគន្លងទទឹងប្រវែង ១,២៥ម៉ែត្រ សម្រាប់ទោចក្រយានទៅមកផងដែរ៕
