អ្នកតំណាងរាស្ត្រ,សប្បុរសជននៃក្រុមហ៊ុនបុរីThe Park Villa និងសប្បុរសជននៃមន្ទីរពេទ្យសូរិយា បាននាំយកអំណោយចែកជូនដល់ប្រជាពលរដ្ឋរងគ្រោះដោយទឹកជំនន់១០០គ្រួសារ នៅសង្កាត់វាលស្បូវ ខណ្ឌច្បារអំពៅរាជធានីភ្នំពេញ។អំណោយដែលនាំយកមកចែកជូនដល់ប្រជាពលរដ្ឋរងគ្រោះកាលពីថ្ងៃទី២៥តុលាបានអញ្ជើញចូលរួមដោយអ្នកតំណាងរាស្ត្រមណ្ឌលភ្នំពេញលោកជំទាវគ្រួច សំអាននិងក្រុមសប្បុរសជនតំណាងដោយលោក ហោ សេរីវឌ្ឍន៍ ប្រធានផ្នែកក្រៅប្រព័ន្ធ និងជាសមាជិកអចិន្ត្រៃយ៍នៃ យុវជន គណបក្សប្រជាជន កម្ពុជាថ្នាក់កណ្តាល និងលោកស្រី វ៉ាន់ សម្ភស្ស។

លោកជំទាវ គ្រួច សំអាន អ្នកតំណាង រាស្ត្រមណ្ឌលភ្នំពេញ បានថ្លែងនូវការអរគុណចំពោះម្ចាស់គម្រោង The Park Villa ដែលមិនត្រឹមតែអភិវឌ្ឍគម្រោងបង្កើតសោភណភាពនិងហេដ្ឋារចនាសម្ព័ន្ធ ក្នុងតំបន់សង្កាត់វាលស្បូវ នេះទេ ថែមទំាងនៅបានចូលរួមចំណែកជួយដល់ប្រជាពលរដ្ឋក្រីក្រនិងប្រជាពលរដ្ឋរងគ្រោះ ក្នុងតំបន់ថែម ទៀត។ អំណោយមនុស្សធម៌ ដែលបានចែកជូន ប្រជាពលរដ្ឋរងគ្រោះចំនួន ១០០ គ្រួសារ នាពេលនោះ គឺក្នុង១ គ្រួសារទទួលបាន: អង្ករ ១០គីឡូក្រាម, មី១កេះ, ទឹកសុទ្ធ១កេះ, ទឹកត្រី១ដុំ, ត្រីខ១យួរ, ថ្នាំពេទ្យ១កញ្ចប់ និងថវិកា ១ ម៉ឺនរៀល ផងទៀត។

ខណ្ឌច្បារអំពៅ មានសង្កាត់ចំនួន៦ ដែលបានរងផលប៉ះពាល់ដោយទឹកជំនន់ គឺសង្កាត់និរោធ, សង្កាត់វាលស្បូវ, សង្កាត់ក្បាលកោះ, សង្កាត់ព្រែកឯង, សង្កាត់ព្រែកថ្មី, សង្កាត់ព្រែកប្រា។ ប្រជាពលរដ្ឋដែលរងផលប៉ះពាល់នៃ សង្កាត់ទំាង៦ មានចំនួន ១ពាន់២៥០ គ្រួសារ៕