ក្រសួងកិច្ចការនារី និងក្រុមហ៊ុនកូកា-កូឡាកម្ពុជាបានចុះអនុស្សរណៈយោគយល់គ្នាស្តីពី «ភាពជាដៃគូលើការលើកកម្ពស់ភាពជាអ្នកដឹកនាំនិងការអភិវឌ្ឍសហគ្រិនភាពរបស់ស្រ្តី» ដើម្បីរៀបចំផែនការរួមផ្តល់វគ្គបណ្តុះបណ្តាល អភិវឌ្ឍន៍សហគិ្រនភាពរបស់ស្ត្រី ជាពិសេសអ្នកតំណាងចែកចាយផលិតផល និងការគាំទ្រនានាដល់ស្រ្តី ជាម្ចាស់អាជីវកម្ម ខ្នាតតូច នៅថ្នាក់ជាតិ និងថ្នាក់ក្រោមជាតិ។
សម្រាប់ការចុះអនុស្សរណៈនេះ ភាគីទាំងពីរបានប្រកាសពីឆន្ទៈយ៉ាងច្បាស់ ក្នុងការបង្កើនភាពអង់អាចផ្នែកសេដ្ឋកិច្ចដល់ស្ត្រី ភាពជាអ្នកដឹកនាំរបស់ស្រ្តី និងជំរុញឱ្យស្រ្តីប្រើប្រាស់សក្តានុពលរបស់ខ្លួនឱ្យអស់លទ្ធភាព ក្នុងការចូលរួមលើកស្ទួយសេដ្ឋកិច្ច-សង្គមជាតិប្រកបដោយបរិយាប័ន្ន។
ថ្លែងក្នុងពិធីចុះហត្ថលេខាលើអនុស្សារណៈយោគយល់គ្នាស្តីពី«ភាពជាដៃគូលើការលើកកម្ពស់ភាពជាអ្នកដឹកនាំនិងការអភិវឌ្ឍសហគ្រិនភាពរបស់ស្រ្តី» នារសៀលថ្ងៃទី២៦ ខែតុលា ឆ្នាំ២០២០ នៅទីស្ដីការក្រសួងកិច្ចការនារី លោកជំទាវ គង់ សូរីតា អនុរដ្ឋលេខាធិការក្រសួងកិច្ចការនារីបានមានប្រសាសន៍ថា សម្រាប់រាជរដ្ឋាភិបាលកម្ពុជា ការលើកកម្ពស់ភាពជាអ្នកដឹកនាំ និងសហគ្រិនភាពគឺជាយុទ្ធសាស្រ្ដគន្លឹះធំពីរនៃក្របខ័ណ្ឌការងារបង្កើនភាពអង់អាចក្លាហានដល់ស្រីនិងក្មេងស្រី ក្នុងគោលដៅដើម្បីឈានទៅលុបបំបាត់គម្លាតយេនឌ័រនៅកម្ពុជា ជាពិសេសដូចមានកំណត់នៅក្នុងយុទ្ធសាស្រ្ដចតុកោណដំណាក់កាលទី៤ នៃផែនការជាតិ និងអភិវឌ្ឍន៍យុទ្ធសាស្រ្ដផែនការយុទ្ធសាស្រ្ដនារីរតនៈទី៥ ឆ្នាំ២០១៩-២០២៣។ លោកជំទាវបានបន្ថែមថា កិច្ចសហការគ្នានេះគឺជារូបមន្ដ និងសក្ដានុពលថ្មីមួយទៀត ក្នុងការពង្រីកដៃគូ សម្រាប់លើកកម្ពស់សមភាពយេនឌ័រ ជាពិសេសក្នុងវិស័យសេដ្ឋកិច្ច ការអភិវឌ្ឍសហគ្រិនភាព ភាពជាអ្នកដឹកនាំ និងការគាំទ្របរិយាកាសការងារ សម្រាប់ស្រ្ដីក្នុងវិស័យឯកជន។
លោកស្រី ឡាវ ស្រីដែត នាយិកាផ្នែកពាណិជ្ជកម្មប្រចាំប្រទេសរបស់ក្រុមហ៊ុនកូកា-កូឡាកម្ពុជាបានគូសបញ្ជាក់ថា “នៅក្រុមហ៊ុនកូកា-កូឡាកម្ពុជា យើងបានកំណត់គោលដៅជាក់លាក់នៅក្នុងចក្ខុវិស័យ២០២០-២០២៥ គឺត្រូវអនុវត្តន៍គ្រប់យុទ្ធសាស្ត្រដើម្បីឱ្យមានបុគ្គលិកជាស្ត្រី ៥០ភាគរយ នៃចំនួនបុគ្គលិកសរុបនៅត្រឹមឆ្នាំ២០២៥”។ លោកស្រីបានបន្ដថា ពិពិធភាព និងបរិយាប័ន្នរវាងស្ត្រី និងបុរសនៅក្នុងក្រុមហ៊ុន នឹងជំរុញឱ្យមានភាពច្នៃប្រឌិត នវានុវត្តន៍ ការជជែកគាំទ្រនៅក្នុងក្រុមហ៊ុន ក៏ដូចជាផ្សាភ្ជាប់អាជីវកម្មយើងទៅក្នុងសហគន៍ដែលយើងប្រតិបត្តិការ។ លោកស្រីបានបញ្ជាក់បន្ថែមថា “ការចុះអនុស្សរណៈនាថ្ងៃនេះ មិនមែនជាការចាប់ផ្តើមកិច្ចសហការលើកដំបូងរវាងក្រសួងកិច្ចការនារី និងក្រុមហ៊ុនកូកា-កូឡានោះទេ តែថ្ងៃនេះគឺសក្ខីភាពនៃការរឹតចំណងកិច្ចសហប្រតិបត្តិការរបស់ពួកយើង និងជាការបញ្ជាក់អំពីការប្តេជ្ញារបស់ក្រុមហ៊ុន ក្នុងការចូលរួមជាមួយរាជរដ្ឋាភិបាលលើការបង្កើនភាពអង់អាចដល់ស្រ្តី”។
គួរបញ្ជាក់ផងដែរថា តាមរយៈខ្លឹមសារនៃអនុស្សរណៈនេះ ភាគីទាំងពីរនឹងធ្វើកិច្ចសហប្រតិបត្តិការលើការពង្រឹងភាពជាអ្នកដឹកនាំរបស់ស្រ្តី ដែលជាថ្នាក់ដឹកនាំ និងបង្កើនចំនួនបុគ្គលិកជាស្រ្តីក្នុងក្រុមហ៊ុនកូកា-កូឡា ដើម្បីឈានទៅសម្រេចគោលដៅ ៥០-៥០ភាគរយ នៅឆ្នាំត្រឹម២០២៥។ អភិវឌ្ឍន៍សហគិ្រនភាពរបស់ស្ត្រី ជាពិសេសអ្នកតំណាងចែកចាយផលិតផល រៀបចំផែនការរួម ដើម្បីផ្តល់វគ្គបណ្តុះបណ្តាល និងការគាំទ្រនានាដល់ស្រ្តី ជាម្ចាស់អាជីវកម្មខ្នាតតូច នៅថ្នាក់ជាតិ និងថ្នាក់ក្រោមជាតិ។ លើសពីនេះទៀត អនុស្សរណៈនេះក៏អនុវត្តន៍គម្រោងគាំទ្រដល់អាជីវករខ្នាតតូច ជាពិសេសអ្នកលក់ដូរតាមដងផ្លូវក្នុងការបង្កើនគុណភាពចំណីអាហារ អនាម័យ និងអភិវឌ្ឍន៍អាជីវកម្ម។
លោកជំទាវ គង់ សូរីតា បានចាត់ទុកកិច្ចសហប្រតិបត្តិការរវាងក្រសួងកិច្ចការនារី និងក្រុមហ៊ុនកូកា-កូឡាកម្ពុជានេះសបញ្ជាក់ពីការសហការយ៉ាងស្អិតរមួតរវាងវិស័យសាធា រណៈ ជាមួយនឹងវិស័យឯកជន រួមចំណែកផ្តល់ការលើកកម្ពស់ភាពអង់អាចផ្នែកសេដ្ឋកិច្ច ដល់ស្ត្រី រួមបញ្ចូលទាំងបណ្តុះស្មារតីជាសហគ្រិនភាព និងភាពជាអ្នកដឹកនាំ ស្របតាម ចក្ខុវិស័យរបស់រាជរដ្ឋាភិបាលកម្ពុជា៕
ប្រភព៖ ក្រសួងព័ត៌មាន