មិនខ្វល់ពីការទាមទារឲ្យចេញពីតំណែង តែលោក ប្រាយុទ្ធប្រាប់សភាថា បាតុកម្មខុសច្បាប់នៅថៃត្រូវតែគ្រប់គ្រងឲ្យបាន
នាយករដ្ឋមន្ត្រី Prayut Chan-o-cha បាននិយាយថា ប្រទេសថៃចាំបាច់ត្រូវតែនាំពួកបាតុករខុសច្បាប់ ឲ្យស្ថិតការគ្រប់គ្រង នេះជាការថ្លែងរបស់លោក ក្នុងកិច្ចប្រជុំសភាបន្ទាន់ដោះស្រាយវិបត្តិនយោបាយកើតចេញពីបាតុកម្មរាប់ខែ កាលពីថ្ងៃទី២៦ តុលា ម្សិលមិញ។
លោក ប្រាយុទ្ធ ដែលជាអតីតមេដឹកនាំយោធាដឹកនាំរដ្ឋប្រហារកាលពីឆ្នាំ២០១៤ កំពុងប្រឈមនឹងការដាក់សំពាធ ប៉ុន្មានសប្តាហ៍ថ្មីៗនេះ ពីសំណាក់ក្រុមបាតុកររាប់ម៉ឺននាក់ ដែលទាមទារឲ្យលោកចុះចេញពីតំណែង។
លោកប្រាយុទ្ធ ចាន់អូចាថា«បើទោះបីជាប្រជាជនមានសេរីភាព ក្នុងការធ្វើបាតុកម្ម ផ្អែកតាមរដ្ឋធម្មនុញ្ញ ប៉ុន្តែអាជ្ញាធរចាំបាច់គ្រប់គ្រងបាតុកម្មខុសច្បាប់»។ លោកបន្ថែមថា «យើងមិនចង់ឃើញការប៉ះទង្គិច ឬកុប្បកម្មក្នុងប្រទេសទេ» លោកចោទប្រកាន់បាតុករមួយចំនួនធ្វើសកម្មភាពមិនត្រឹមត្រូវតាមច្បាប់ទេ៕ ប្រភពពី AFP
