សហរដ្ឋអាមេរិកដាក់ទណ្ឌកម្មថ្មីទៀតប្រឆាំងនឹងមន្រ្តីជាន់ខ្ពស់ និងក្រុមហ៊ុនប្រេងធំៗរបស់អ៊ីរ៉ង់
អាមេរិក៖ សហរដ្ឋអាមេរិក នៅថ្ងៃចន្ទនេះ បានដាក់ទណ្ឌកម្មថ្មីទៀតប្រឆាំងនឹងបុគ្គល និងក្រុមហ៊ុនប្រេងរបស់ប្រទេសអ៊ីរ៉ង់ ដែលសកម្មភាពនេះ ជាការបង្កើនទ្វេដងនូវយុទ្ធនាការដាក់សម្ពាធជាអតិបរមារបស់ខ្លួនប្រឆាំងនឹងទីក្រុងតេហេរ៉ង់ នេះបើតាមសារព័ត៌មានស៊ីនហួរនៅថ្ងៃទី២៧ ខែតុលា ឆ្នាំ២០២០ ។
ជាមួយគ្នានេះ ក្រសួងរតនាគារជាតិអាមេរិកបានបញ្ជាក់នៅក្នុងសេចក្តីថ្លែងការណ៍របស់ខ្លួនថា ក្រសួងប្រេងអ៊ីរ៉ង់, ក្រុមហ៊ុនប្រេងជាតិអ៊ីរ៉ង់ NIOC, ក្រុមហ៊ុនដឹកនាំប្រេងជាតិអ៊ីរ៉ង់ NITC ត្រូវបានជាប់ទណ្ឌកម្ម ដោយចោទពីបទគាំទ្រផ្នែកហិរញ្ញវត្ថុរបស់ពួកគេដល់កងកម្លាំងបដិវត្តន៍ឥស្លាមអ៊ីរ៉ង់ (IRGC-QF) ។ បន្ថែមលើនេះ រដ្ឋមន្រ្តីក្រសួងប្រេងអ៊ីរ៉ង់លោក ប៊ីចាន ណាមដា ហ្សានហ្គាណេ និងនាយកប្រតិបត្តិជាន់ខ្ពស់របស់ក្រុមហ៊ុន NIOC និង NITC ក៏ត្រូវបានកត់ឈ្មោះក្នុងបញ្ជីទណ្ឌកម្មផងដែរ ។
ការដាក់ទណ្ឌកម្មថ្មីនេះ បានកើតមានឡើងប៉ុន្មានថ្ងៃបន្ទាប់ពីរដ្ឋបាលរបស់ប្រធានាធិបតីអាមេរិកលោក ដូណាល់ ត្រាំ បានកត់ឈ្មោះឯកអគ្គរដ្ឋទូតអ៊ីរ៉ង់ប្រចាំប្រទេសអ៊ីរ៉ាក់ទៅក្នុងបញ្ជីខ្មៅរបស់ខ្លួន ដោយសហរដ្ឋអាមេរិកបានអះអាងថា កំពុងបម្រើ ឬជាអ្នកតំណាងកងកម្លាំងបដិវត្តន៍ឥស្លាមអ៊ីរ៉ង់ ៕