វៀតណាមរឹបអូសថ្នាំញៀនជាង១០០គីឡូក្រាម ជនសង្ស័យ១៧នាក់អាចត្រូវប្រហារជីវិត
នគរបាលក្រសួងសន្តិសុខសាធារណៈប្រទេសវៀតណាមបានចាប់ខ្លួនជនសង្ស័យ១៧នាក់ ពាក់ព័ន្ធនឹងការជួញដូរគ្រឿងញៀន ក្រោយការបង្ក្រាបទ្រង់ទ្រាយដ៏ធំ នាថ្ងៃទី២៧ តុលា ២០២០។
ការចាប់ខ្លួនក្រោយពេលនគរបាលជាង១០០នាក់បានឆ្មក់ទីតាំងរាប់សិបកន្លែង ក្នុងក្រុងហូជីមិញ និងខេត្តក្បែរៗខាង គឺខេត្ត Binh Duong និង Tay Ninh រឹបអូសថ្នាំញៀនជាង១០០គីឡូក្រាម រួមមានទាំងហេរ៉ូអ៊ីន មេតំហ្វេតាមីន និងថ្នាំញៀនផ្សេងៗទៀត នេះបើតាមនគរបាលប្រាប់ទីភ្នាក់ងារសារព័ត៌មាន VnExpress។
ហូជីមិញត្រូវបានចាត់ទុកជាទីតាំងផ្ទេរថ្នាំញៀន ពីតំបន់ត្រីកោណមាស ដោយនគរបាលថា ថ្នាំញៀនមានប្រភពពីតៃវ៉ាន់ ហ្វីលីពីន ម៉ាឡេស៊ី កូរ៉េខាងត្បូង សូម្បីតែអឺរ៉ុប ព្រមទាំងអូស្ត្រាលី និងតំបន់អាមេរិកឡាទីនទៀតផង។
វៀតណាមគឺជាប្រទេសដែលមានច្បាប់គ្រឿងញៀនដ៏តឹងរឹងមួយ ក្នុងពិភពលោក ដោយក្នុងនោះ ជនជួញដូរគ្រឿងញៀន ច្រើនជាង៦០០ក្រាម នៃហេរ៉ូអ៊ីន ឬជាង២.៥គីឡូក្រាមនៃមេតំហ្វេតាមីន ត្រូវប្រឈមនឹងការកាត់ទោសប្រហារជីវិត៕