អស្ចារ្យ! ហាងកាហ្វេមួយនៅជប៉ុនប្រើមនុស្សយន្តបម្រើអតិថិជន
ជប៉ុន៖ នៅហាងកាហ្វេតូក្យូមួយ លោក មីឈីអូ អ៊ីម៉ៃ (Michio Imai) បានទទួលស្វាគមន៍អតិថិជនម្នាក់ ប៉ុន្តែមិនមែនស្វាគមន៍ដោយផ្ទាល់ទេ។ លោកស្ថិតនៅចម្ងាយរាប់រយគីឡូម៉ែត្រ ដោយគ្រាន់តែបញ្ជាអ្នកបម្រើរ៉ូបូតមួយគ្រឿងប៉ុណ្ណោះ។ ដែលនេះជាផ្នែកមួយនៃការពិសោធន៍ក្នុងការងារ។
លោក អ៊ីម៉ៃ គឺស្ថិតនៅពីក្រោយការបញ្ជារ៉ូបូតពីផ្ទះរបស់គាត់នៅទីក្រុងហ៊ីរ៉ូស៊ីម៉ា ដែលមានចម្ងាយ៨០០គីឡូម៉ែត្រពីក្រុងតូក្យូ ហើយគាត់ជាបុគ្គលិកម្នាក់ក្នុងចំណោមបុគ្គលិក ៥០ នាក់ដែលមានពិការភាពផ្លូវកាយ និងផ្លូវចិត្ត ដែលធ្វើការជាអ្នកបញ្ជាបុគ្គលិករ៉ូបូតរបស់ហាងកាហ្វេ Dawn។ រ៉ូបូតមានឈ្មោះថា អូរីហ៊ីមី(OriHime) មានបំពាក់កាមេរ៉ា ម៉ៃក្រូហ្វូន និងឧបករណ៍បំពងសំឡេង ដើម្បីអនុ ញ្ញាតឱ្យប្រតិបត្តិករធ្វើទំនាក់ទំនងជាមួយអតិថិជនពីចម្ងាយ។
រ៉ូបូតរបស់ហាងកាហ្វេ Dawn មានគោលបំណងលើសពីការទាក់ទាញចំណាប់អារម្មណ៍អតិថិជនទៅទៀត ដោយផ្តល់ឱកាសការងារដល់មនុស្សដែលពិបាកធ្វើការនៅក្រៅផ្ទះ។ ហាងកាហ្វេខាងលើនេះ បានបើកដំណើរការនៅសង្កាត់នីហុនបាស៊ី ស្ថិតនៅភាគកណ្តាលទីក្រុងតូក្យូ កាលពីខែមិថុនា ហើយជួលបុគ្គលិកនៅទូទាំងប្រទេសជប៉ុន និងនៅក្រៅប្រទេស ព្រមទាំងបុគ្គលិកមួយចំនួនដែលធ្វើការនៅនឹងកន្លែងផងដែរ៕ ប្រភព៖ Bangkok Post