សមាគមអ្នកស្រាវជ្រាវវឌ្ឍនភាពកម្ពុជា-ចិន ប្រគល់ម៉ាស់ចំនួន១ម៉ឺនបន្ទះជូនដល់រដ្ឋបាលក្រុងបានលុង ខេត្តរតនគិរី
ភ្នំពេញ៖ កាលពីរសៀលថ្ងៃទី១៩ ខែកញ្ញា ឆ្នាំ២០២១ នៅស្នាក់ការសមាគមអ្នកស្រាវជ្រាវវឌ្ឍនភាពកម្ពុជា-ចិនមានរៀបចំកម្មវិធីប្រគល់ម៉ាស់ចំនួន១០០០០បន្ទះជូនដល់រដ្ឋបាលក្រុងបានលុង ខេត្តរតនគិរី ដើម្បីចូលរួមចំណែកនៅក្នុងការប្រយុទ្ធប្រឆាំងនឹងជំងឺCovid-19។
លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន បានជម្រាបជូនដល់អង្គពិធីថា ព្រះតេជគុណ ចាវ ស៊ីន អនុប្រធានសមាគមពុទ្ធសាសនិកកម្ពុជា-ចិនតែងបានសហការយ៉ាងជិតស្និទ្ធជាមួយសមាគមអ្នកស្រាវជ្រាវវឌ្ឍនភាពកម្ពុជា-ចិន និងបណ្តាសង្គមស៊ីវិលនានានៅក្នុងប្រទេសកម្ពុជា សំដៅចូលរួមចំណែកចែករំលែកនូវធនធានសម្ភារៈ និងធនធានពុទ្ធិដើម្បីលើកកម្ពស់សុខុមាលភាពជូនដល់ប្រជាជនកម្ពុជា ហើយថ្ងៃនេះ សមាគមទាំងពីរបានរួមសហការគ្នាក្នុងការបរិច្ចាគនូវម៉ាស់ចំនួន១០០០០បន្ទះ ជូនដល់រដ្ឋបាលក្រុងបានលុង។
លោក ទុយ ស៊ីនណា តំណាងក្រុមការងារចុះជួយក្រុងបានលុង បានថ្លែងអំណរគុណដល់សមាគមទាំងពីរដែលបានចូលរួមវិភាគទានដ៏មានតម្លៃ និងឆ្លើយតបបានទាន់ពេលវេលានូវតម្រូវការជាក់ស្តែងរបស់ប្រជាជន ជាពិសេសគឺការចូលរួមនៅក្នុងការប្រយុទ្ធប្រឆាំងនឹងជំងឺCovid-19 ហើយលោកបន្តលើកទឹកចិត្តដល់សមាគមទាំងពីរក្នុងការចូលរួមចំណែកជួយដល់កិច្ចអភិវឌ្ឍជាតិក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕