គ.ជ.ប. ចែកលិខិតអញ្ជើញអ្នកចុះឈ្មោះបោះឆ្នោតបានចំនួនជិត៨លាន
ភ្នំពេញៈ គិតត្រឹមថ្ងៃទី១១ ខែតុលា ឆ្នាំ២០២១ គណៈកម្មាធិការជាតិរៀបចំការបោះឆ្នោត (គ.ជ.ប.) បានចែកលិខិតអញ្ជើញអ្នកចុះឈ្មោះបោះឆ្នោត បានចំនួន ៧.៩១៦.៧៤៥ ស្មើ ៨៩.៦៤ភាគរយ ហើយលិខិតអញ្ជើញនេះ នឹងរក្សាទុកនៅសាលាឃុំ សង្កាត់ដែលប្រជាពលរដ្ឋកំពុងរស់នៅ ដើម្បីបន្តចែកជូនអ្នកចុះឈ្មោះបោះឆ្នោតដែលមិនទាន់បានទទួល។ នេះបើតាមការបញ្ជាក់របស់ឯកឧត្តម មាន សទិ សមាជិក គ.ជ.ប. នៅក្នុងកិច្ចប្រជុំផ្សព្វផ្សាយជាមួយភាគីពាក់ព័ន្ធតាមប្រព័ន្ធវីដេអូអនឡាញអំពីការចាប់ផ្តើមការពិនិត្យបញ្ជីឈ្មោះ និងការចុះឈ្មោះបោះឆ្នោតតាមឃុំ សង្កាត់ នីតិវិធីចុះឈ្មោះបោះឆ្នោតនៅឃុំ សង្កាត់ ការបញ្ជូន ទិន្នន័យមក គ.ជ.ប និងលទ្ធផលបណ្តោះអាសន្ននៃការចែកលិខិតអញ្ជើញអ្នកចុះឈ្មោះបោះឆ្នោត កាលពីព្រឹកថ្ងៃទី១១ ខែតុលា ឆ្នាំ២០២១។
នៅក្នុងកិច្ចប្រជុំនោះ ឯកឧត្តម មាន សទិ សមាជិក គ.ជ.ប និងជាប្រធានដឹកនាំកិច្ចប្រជុំ បានមានប្រសាសន៍ថា ការពិនិត្យបញ្ជីឈ្មោះ និងការចុះឈ្មោះបោះឆ្នោត មានរយៈពេល ៥០ថ្ងៃ គឺចាប់ពីថ្ងៃទី១២ ខែតុលា ដល់ថ្ងៃទី៣០ ខែវិច្ឆិកា ឆ្នាំ២០២១។ ឯកឧត្តម បានបន្តថា ប្រជាពលរដ្ឋខ្មែររស់នៅក្នុងឃុំ សង្កាត់ ដែលមានអាយុយ៉ាងតិច ១៨ឆ្នាំ គិតដល់ថ្ងៃបោះឆ្នោតជ្រើសរើសក្រុមប្រឹក្សាឃុំ សង្កាត់ ដែលនឹងប្រព្រឹត្តទៅនៅថ្ងៃទី៥ ខែមិថុនា ឆ្នាំ២០២២ គឺអ្នកកើតមុន ឬត្រឹមថ្ងៃទី៦ ខែមិថុនា ឆ្នាំ២០០៤ ដែលមិនទាន់មានឈ្មោះក្នុងបញ្ជីបោះឆ្នោតនៃឃុំ សង្កាត់ដែលខ្លួនកំពុងរស់នៅ អាចទៅស្នើសុំចុះឈ្មោះបោះឆ្នោតដោយផ្ទាល់ជាមួយក្រុមចុះឈ្មោះបោះឆ្នោតបាន។
ចំពោះការបញ្ជូនទិន្នន័យនៃការចុះឈ្មោះបោះឆ្នោត ក្រុមចុះឈ្មោះបោះឆ្នោតត្រូវបញ្ជូន តាមអ៊ីនធឺណែត មក គ.ជ.ប ជារៀងរាល់ថ្ងៃ ដើម្បី គ.ជ.ប ធ្វើការត្រួតពិនិត្យការងារជាប្រចាំ។ ឯកឧត្តម មាន សទិ ក៏បានមានប្រសាសន៍អំពីលទ្ធផលនៃការចែកលិខិតអញ្ជើញអ្នកចុះ ឈ្មោះបោះឆ្នោតគិតត្រឹមថ្ងៃទី១១ ខែតុលាឆ្នាំ២០២១ ចែកបានចំនួន ៧.៩១៦.៧៤៥ ស្មើ ៨៩.៦៤%។ ហើយលិខិតអញ្ជើញនេះ នឹងរក្សាទុកនៅសាលាឃុំ សង្កាត់ដែលប្រជាពលរដ្ឋកំពុងរស់នៅ ដើម្បីបន្តចែកជូនអ្នកចុះឈ្មោះបោះឆ្នោតដែលមិនទាន់បានទទួល។
ក្នុងកិច្ចប្រជុំនោះ គ.ជ.ប. បានបំភ្លឺទៅនឹងការលើកឡើងរបស់ភាគីពាក់ព័ន្ធ ដែលបានចូលរួមមានដូចតទៅ ៖
- ករណីកូវីដ-១៩ ជាបញ្ហាប្រឈមក្នុងការចុះឈ្មោះបោះឆ្នោត ប៉ុន្តែ គ.ជ.ប. មានវិធានការ ការពាររួចហើយ ហើយ គ.ជ.ប. សូមថ្លែងអំណរគុណដល់អាជ្ញាធរដែនដី ដែលបានជួយឧបត្ថម្ភសម្ភារការពារជំងឺកូវីដ-១៩។
- ការិយាល័យចុះឈ្មោះបោះឆ្នោតបានបង្កើតថែមសម្រាប់ឃុំ សង្កាត់ដែលទើបបង្កើតថ្មី ចំនួន ៦ ដោយផ្អែកលើចំនួនប្រជាពលរដ្ឋ។
- ប្រជាពលរដ្ឋដែលបានចុះឈ្មោះបោះឆ្នោតក្រោយឆ្នាំ២០១៦ ឈ្មោះរបស់គាត់ ប្រាកដជាមានក្នុងបញ្ជីបោះឆ្នោត ដើម្បីឱ្យជាក់ច្បាស់សូមឆែកមើលក្នុងគេហទំព័រ voterlist.nec.gov.kh ឬតាម App-Voterlist KH ។ ម្យ៉ាងទៀតប្រសិនបើគាត់ទទួលបានលិខិតអញ្ជើញអ្នកចុះឈ្មោះបោះឆ្នោត ក៏ប្រាកដថាគាត់មានឈ្មោះក្នុងបញ្ជីបោះឆ្នោត ហើយដែរ។
- គ.ជ.ប. បានផលិតកម្មវិធីផ្សព្វផ្សាយជាច្រើនតាមវិទ្យុ ទូរទស្សន៍ តាមប្រព័ន្ធផ្សព្វផ្សាយ សង្គម ដើម្បីបំផុសឱ្យប្រជាពលរដ្ឋទទួលបានព័ត៌មានអំពីការចុះឈ្មោះបោះឆ្នោត។ ជាពិសេសមានការចូលរួមជួយផ្សព្វផ្សាយដោយភាគីពាក់ព័ន្ធទាំងអស់ រួមទាំងមេភូមិ និងស្មារតីចូលរួមរបស់ប្រជាពលរដ្ឋផងដែរ។
- ក្នុងករណីប្រជាពលរដ្ឋផ្លាស់ប្តូរទីលំនៅ ហើយចង់បោះឆ្នោតនៅក្នុងឃុំ សង្កាត់ដែល គាត់កំពុងរស់នៅ គាត់ត្រូវតែបំពេញលក្ខខណ្ឌ ដើម្បីសុំចុះឈ្មោះបោះឆ្នោតនៅក្នុងឃុំ សង្កាត់នោះ។
មុននឹងបញ្ចប់កិច្ចប្រជុំ ឯកឧត្តម មាន សទិ បានសំណូមពរដល់មន្ត្រីបោះឆ្នោតគ្រប់លំដាប់ថ្នាក់ ប្រជាពលរដ្ឋអ្នកចុះឈ្មោះបោះឆ្នោត និងគ្រប់ភាគីពាក់ព័ន្ធទាំងអស់ ត្រូវយកចិត្តទុកដាក់ខ្ពស់ក្នុងការថែរក្សាអនាម័យផ្ទាល់ខ្លួន ដោយអនុវត្តតាមវិធានការរបស់ក្រសួងសុខាភិបាល និង គ.ជ.ប។ ដែលបានដាក់ចេញ ឱ្យបានខ្ជាប់ខ្លួន ដើម្បីបង្ការ និងទប់ស្កាត់ការឆ្លងរាលដាលនៃជំងឺកូវីដ-១៩។
គួរបញ្ជាក់ថា ភាគីពាក់ព័ន្ធដែលបានចូលរួមកិច្ចប្រជុំតាមប្រព័ន្ធវីដេអូអនឡាញ មានតំណាងក្រុមប្រឹក្សាធម្មនុញ្ញ ព្រឹទ្ធសភា រដ្ឋសភា ក្រសួងមហាផ្ទៃ ក្រសួងព័ត៌មាន មន្ត្រីស្ថានទូតជប៉ុន តំណាងគណបក្សនយោបាយ អង្គការមិនមែនរដ្ឋាភិបាល អង្គភាពសារព័ត៌មាន និងមន្ត្រី គ.ជ.ប. សរុបអ្នកចូលរួមមាន ចំនួនប្រមាណ ៧៥នាក់៕
ដោយៈ ពលជ័យ
