ប៉េកាំង៖ ក្រោយធ្វើដំណើរឡើងពីផ្ទៃផែនដី កាលពីវេលាយប់រំលងអធ្រាត្រថ្ងៃសៅរ៍សប្តាហ៍មុន យាន ហ្សិនចូវ ១៣ (Shenzhou-13) បានចូលចតនៅឯបន្ទប់ស្ថានីយអវកាស ធានហឺ (Tianhe) ដោយជោគជ័យ ជាមួយក្រុមអវកាសយានិកចិន ដែលនឹងត្រូវស្នាក់នៅទីនោះរយៈពេលដល់ទៅ៦ខែ។

តាមដំណឹងនៃការិយាល័យវិស្វកម្មអវកាសដឹកមនុស្សចិនឱ្យដឹងថា បន្ទាប់ពីចូលទៅក្នុងគន្លងតារាវិថី យានអវកាសដឹកមនុស្ស ហ្សិនចូវ ១៣ សម្រេចបាននូវការកំណត់សភាពចូលទៅក្នុងតារាវិថី ហើយបានប្រើប្រាស់រូបមន្តស្វយ័ប្រវត្តិតភ្ជាប់ជាមួយបន្ទប់ស្នូល ធានហឺ រួមជាយានអាវកាសដឹកទំនិញ Tianzhou ២ និង Tianzhou ៣ ផ្តុំជាមួយផ្នែកនៃស្ថានីយអវកាសនៅវេលាម៉ោង ៦ និង ៥៦ នាទី ថ្ងៃទី១៦ ខែតុលា ឆ្នាំ ២០២១។ ដំណើរការតភ្ជាប់ទាំងមូលបានចំណាយពេលប្រមាណ ៦ម៉ោង និង ៣០នាទី។ បេសកកម្មយាន ហ្សិនចូវ ១៣ គឺជាបេសកកម្មទី៥ ក្នុងកិច្ចប្រឹងប្រែងសាងសង់ស្ថានីយអវកាសផ្ទាល់ខ្លួនរបស់ចិន ដែលបានចាប់ផ្តើមដំបូង កាលពីខែមេសា ឆ្នាំ២០២១ នៅពេលកំណាត់បន្ទប់ស្នូល ធានហឺ (Tianhe) ត្រូវបានបញ្ជូនឡើងទីអវកាស។ វាក៏ជាបេសកកម្មបញ្ជូនមនុស្សជើងទី ២ ផងដែរ ដោយក្រុមអវកាសយានិកជើងទី ១ ទើបតែបានត្រឡប់មកដល់ផ្ទៃផែនដីវិញ កាលពីពាក់កណ្តាលខែមុន ក្រោយបំពេញបេសកកម្មរយៈពេល៩០ថ្ងៃ។

សូមបញ្ជាក់ថា យាន ហ្សិនចូវ ១៣ ត្រូវបានដឹកនាំដោយគ្រាប់រ៉ុក្កែត Long March-2F ចេញពីមូលដ្ឋានបាញ់បង្ហោះ ជីវក្វាន់ ស្ថិតក្នុងតំបនវាលខ្សាច់ ហ្គោពី ខេត្ត កាន់ស៊ូ ភាគពាយ័ព្យប្រទេសចិន កាលពីវេលាម៉ោង ១២៖២៣នាទីអធ្រាត្រ (ម៉ោងក្នុងតំបន់)។ មានអវកាសយានិកចិនទាំង៣រូប មានដូចជា លោក ចាយ ជីហ្គាង អាយុ ៥៥ឆ្នាំ លោកស្រី វ៉ាង យ៉ាងពីង អាយុ ៤១ឆ្នាំ និងលោក យែ ក្វាងហ៊្វូ អាយុ ៤១ឆ្នាំ៕ ប្រភព៖ The Guardian