ជេក ម៉ា ធ្វើទស្សនកិច្ចសិក្សាកសិកម្មនៅទ្វីបអឺរ៉ុប ដំណើរទៅក្រៅប្រទេសលើកដំបូងរយៈពេល១ឆ្នាំ
ស្ថាបនិកក្រុមហ៊ុនពានិជ្ជកម្មអនឡាញអាលីបាបាលោក ជេក ម៉ា (Jack Ma) ធ្វើទស្សនកិច្ចទៅទ្វីបអឺរ៉ុបសម្រាប់ដំណើរទស្សនកិច្ចសិក្សាផ្នែកកសិកម្ម និងបច្ចេកវិទ្យាទាក់ទងនឹងបញ្ហាបរិស្ថាននៅអេស្ប៉ាញ ក្នុងដំណើរកម្សាន្តទៅក្រៅប្រទេសលើកដំបូងបន្ទាប់ពីបាត់មុខជាងមួយឆ្នាំ។
អ្នកនាំពាក្យរបស់អាលីបាបា បដិសេធមិនធ្វើអត្ថាធិប្បាយអំពីដំណើររបស់លោក Ma ទេ ដោយបញ្ជាក់ថា លោកមិនបានចូលរួមក្នុងប្រតិបត្តិការប្រចាំថ្ងៃរបស់ក្រុមហ៊ុនទេ ចាប់តាំងពីចូលនិវត្តន៍នៅខែកញ្ញា ឆ្នាំ ២០១៩។
យ៉ាងណាមិញ ការស្នាក់នៅហុងកុងមុនទៅអឺរ៉ុប បានបង្ហាញពីការអភិវឌ្ឍន៍ដ៏សំខាន់មួយសម្រាប់ក្រុមហ៊ុនអាលីបាបា បន្ទាប់ពីចិនដាក់ក្រុមហ៊ុននេះឱ្យស្ថិតក្រោមការត្រួតពិនិត្យរបស់ខ្លួនអស់រយៈពេលជិតមួយឆ្នាំ ហើយពិន័យជាទឹកប្រាក់ចំនួន ២,៨ ប៊ីលានដុល្លារនៅក្នុងខែមេសាចំពោះអាកប្បកិរិយាផ្តាច់មុខ។
ភាគហ៊ុនរបស់អាលីបាបាដែលធ្លាក់ចុះ ៣៥ ភាគរយនៅទីក្រុងញូវយ៉ក និងហុងកុង ចាប់ខែធ្នូ ឆ្នាំ ២០២០ បានកើនឡើង ២០ ភាគរយចាប់តាំងពីចុងខែកញ្ញា ដោយសារមានសុទិដ្ឋិនិយមដែលថាការត្រួតពិនិត្យរបស់រដ្ឋាភិបាលចិនចំពោះការអនុវត្តអាជីវកម្មរបស់ក្រុមហ៊ុន កំពុងឈានដល់ទីបញ្ចប់ហើយ។
ការត្រួតពិនិត្យលើក្រុមហ៊ុនអាលីបាបាចាប់ផ្តើមនៅចុងខែធ្នូ ជិតពីរខែបន្ទាប់ពីនិយតករមូលបត្ររារាំងការចុះបញ្ជីទ្វេដងចំនួន ៣៩ ប៊ីលានដុល្លាររបស់សម្ព័ន្ធក្រុមហ៊ុន Ant Group នៅសៀងហៃ និងហុងកុងនៅដើមខែវិច្ឆិកា ប្រមាណជា ៤៨ ម៉ោងមុនពេលភាគហ៊ុនរំពឹងថានឹងចាប់ផ្តើមជួញដូរ។ ចាប់តាំងពីពេលនោះមក លោក Ma មិនសូវជាចេញមុខទេ ដោយគ្រាន់តែចេញតាមរយៈសន្និសីទវីដេអូ និងបង្ហាញជាសាធារណៈតិចជាងពីរបីដងប៉ុណ្ណោះ។
ប្រភព៖ SCMP
