អ្នកជំនាញខ្មែរអាចហ្វឹកហ្វឺនសុនខហិតដឹងអ្នកមានជំងឺកូវីដ១៩បានហើយ
ភ្នំពេញ៖ អ្នកជំនាញ អាចស្រាវជ្រាវ ហ្វឹកហ្វឺនសុនខខ្មែរ ហិតអ្នកជំងឺកូវីដបានដោយជោគជ័យហើយ ដែលនេះគឺជាជំហានមួយដ៏សំខាន់ និងឃើញថាសុនខកម្ពុជាមានសម្ថភាពក្នុងការចូលរួមប្រយុទ្ធប្រឆាំងទៅនិងជំងឺកូវដី១៩បាន។ នេះបើតាមការបញ្ជាក់ឡើងនៅលើទំព័រហ្វេសបុកផ្លូវការ របស់ ឯកឧត្តម ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា បានសរសេរនៅលើបណ្តាញសង្គមហ្វេសបុក បន្ទាប់ពីឯកឧត្តម បានអញ្ជើញចុះពិនិត្យដោយផ្ទាល់ នៅវិទ្យាស្ថានបច្ចេកទេសសកម្មភាពកំចាត់មីនខេត្តកំពង់ឆ្នាំងកាពីថ្ងៃទី២៧ ខែតុលា ឆ្នាំ២០២១។
ឯកឧត្តម បានបន្ថែមថា ការចុះពិនិត្យវឌ្ឍនភាពការស្រាវជ្រាវនិងអភិវឌ្ឍន៍សុនខហិតអ្នកជម្ងឺវីរុសកូវីដ១៩ ដែលយើងខ្ញុំអាចវាយតំលៃប្រកបដោយក្តីរំភើបរីករាយដែលអ្នកជំនាញសុនខខែ្មរ អាចស្រាវជ្រាវ អាចហ្វឹកហ្វឺនសុនខហិតអ្នកជម្ងឺកូវីដ១៩បានដោយជោគជ័យក្នុងជំហានដ៍សំខាន់នេះ និងឃើញថាសុនខកម្ពុជាមានសមត្ថភាពនិងអាចចូលរួមសកម្មភាពប្រយុទ្ធប្រឆាំងកូវីដ១៩បាន។ ការហ្វឹកហ្វឺនបន្តនឹងអនុវត្តក្នុងសប្តាហ៍ខាងមុខនេះនៅពេលបានទទួលសំណាកបន្ថែមទៀតពីសាកលវិទ្យាល័យវិទ្យាសាស្ត្រសុខាភិបាល។
ឯកឧត្តម បានបញ្ជាក់បន្ថែមថា សុនខខែ្មរអាចហិតអ្នកជម្ងឺកូវីដ១៩បាន និងអាចហិតក្នុងចំងាយសុវត្ថិភាពផងដែរ! សុនខអាចមានអត្ថប្រយោជន៍ហិតរហ័ស (១០-១៥វិនាទី) អាចហិតស្វែងរកមុខសញ្ញាអ្នកមានជម្ងឺកូវីដ១៩ក្នុងចំណោមមនុស្សច្រើ (ហ្វូងមនុស្ស) ដែលជាឧបករណ៍អាចប្រើជាជំនួយក្នុងការស្វែងរកអ្នកជម្ងឺកូវីដ១៩ នៅតាមកន្លែងមួយចំនួនដូចជា តាមច្រកទ្វារអន្តរជាតិ ព្រលានយន្តហោះ ព្រឹតិ្តការណ៍ធំៗ ដូចជាការប្រកួតកីឡា កម្មវិធីមហាជនជាដើម។ ល។ នេះជាយុទ្ធសាស្ត្ររើសគ្រួសចេញពីអង្ករ! ចំពោះមុខសញ្ញាសង្ស័យអាចចាត់វិធានការសុខាភិបាល! នេះគឺពិតជាមានមោទនភាពជាមួយមន្ត្រីជំនាញសុនខដែលបានខិតខំប្រឹងប្រែងស្រាវជ្រាវ ចងក្រងឯកសារ និងផ្តល់ការហ្វឹកហ្វឹនសុនខយ៉ាងសកម្មបំផុត! អរគុណមន្ត្រីជំនាញសុខាភិបាលនៃសាកលវិទ្យាល័យវិទ្យាសាស្ត្រសុខាភិបាលដែលបានសហការគាំទ្រយ៉ាងពេញទំហឹង!។