លោក ហ៊ុន ម៉ានី៖ បងធំខ្ញុំ មុខនៅក្មេងជាងគេ ប៉ុន្តែគាត់មានភាពចាស់ទុំ…
ភ្នំពេញៈនៅលើបណ្ដាញសង្គមហ្វេសប៊ុកនារសៀលថ្ងៃទី២ខែធ្នូឆ្នាំ២០២១នេះ លោក ហ៊ុន ម៉ានី ដែលជាបុត្រារបស់ សម្ដេចតេជោហ៊ុន សែន និងជាប្អូនលោក ហ៊ុន ម៉ាណែត បានសរសេរសារខ្លីមួយថា”បងធំខ្ញុំ មុខនៅក្មេងជាងគេ ប៉ុន្តែគាត់មានភាពចាស់ទុំ ដែលប្អូនៗទាំងអស់គ្នាឲ្យតម្លៃខ្ពស់ និងមានការគោរពស្រលាញ់”។
ជាមួយរូបថតចំនួនបីសន្លឹកអមផង លោក ហ៊ុន ម៉ានី ដែលជាប្រធានសហភាពសហព័ន្ធយុវជនកម្ពុជាបានបន្តដោយ ឃ្លាថា”កន្លងមក ពុកម៉ែធ្លាប់បាននិយាយថា មិនចង់ឃើញកូនៗ ធ្វើនយោបាយឡើយ ដោយយោងទៅលើភាពលំបាក ការទទួលខុសត្រូវ និងការលះបង់ ដែលពួកគាត់ផ្ទាល់បានឆ្លងកាត់។ ប៉ុន្តែបរិបទសង្គមបានផ្លាស់ប្តូរដែលនាំឲ្យយើងបាន ដើរមកដល់ចំណុចនេះ ដែលនេះប្រហែលពួកខ្ញុំទាំងអស់គ្នា មានឈាមជ័រជាអ្នកគិតគូពីបញ្ហាសង្គមចង់ឃើញភាពសុខសាន្ត របស់ប្រជាពលរដ្ឋ និងភាពរីកចម្រើនរបស់ប្រទេសជាតិ ក្រោមម្លប់នៃសន្តិភាព ដែលយើងកំពុងតែមាននេះថ្ងៃនេះនិងបន្តទៅ ថ្ងៃអនាគត។
កាលពីព្រឹកមិញក្នុងឱកាសសម្ពោធសមិទ្ធផលនានានៅក្រុងព្រះសីហនុ ដែលតម្លៃប្រមាណ៣០០លានដុល្លារ សម្តេចតេជោ
ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជាបានប្រកាសជាចំហថា “សម្តេចគាំទ្រឱ្យ លោក ហ៊ុន
ម៉ាណែត កូនប្រុសរបស់សម្តេចឈរជាបេក្ខភាពនាយករដ្ឋមន្ត្រី”។
សម្ដេចតេជោ ហ៊ុន សែន មានប្រសាសន៍ថា លោក ហ៊ុន ម៉ាណែតដែលជាកូនប្រុសច្បងរបស់សម្ដេចគឺបេក្ខភាពនាយករដ្ឋមន្ត្រី ដ៏ពេញលេញម្នាក់សម្រាប់ពេលអនាគត។សម្តេចបានបញ្ជាក់បន្ថែមថាសម្តេចគាំទ្រតែត្រូវឆ្លងកាត់ការបោះឆ្នោតព្រោះប្រទេស របស់យើងជាប្រទេសប្រជាធិបតេយ្យ ។
សម្តេចតេជោនាយករដ្ឋមន្ត្រីបន្តថា«ហ៊ុនម៉ាណែតជាបេក្ខភាពមួយក្នុងចំណោមបេក្ខភាពនាយករដ្ឋមន្ត្រីហើយឪពុករបស់វាគាំទ្រ។និយាយឲ្យចឹងច្បាស់ម៉ងទៅ កុំឱ្យឯងពិបាកវិភាគពេក»។
សម្តេចតេជោហ៊ុនសែនបានលើកឧទារហណ៍ពាក់ព័ន្ធនឹងការធ្វើនយោបាយនៅប្រទេសជប៉ុនក៏ឡើងកាន់តំណែងជានាយករដ្ឋមន្ត្រីក៏មានការតពូជដែរ ។ សម្ដេចតេជោមានប្រសាសន៍ថា«សូម្បីតែជប៉ុនគេមានពូជរបស់គេដូចជា លោក ហ្សីនហ្សូ អាបេ (អតីតនាយករដ្ឋមន្ត្រីជប៉ុន ) ជីតារបស់អាបេ គឺជានាយករដ្ឋមន្ត្រី ហើយក៏ធ្លាប់មកទស្សនកិច្ចនៅស្រុកខ្មែរ។ឪពុករបស់អាបេ ជារដ្ឋមន្ត្រីការបរទេស ដល់អាបេ ធ្វើនាយករដ្ឋមន្ត្រីធ្វើទាល់តែ អាបេសុំឈប់ខ្លួន ឯង ។ ចំណែកលោក អូកាដាក៏ដូចគ្នាដែលសុទ្ធ
តែមានពូជធ្វើនយោបាយ »។
បន្ទាប់ពីការប្រកាសរបស់សម្ដេចតេជោ ហ៊ុន សែន លើកបណ្ដាញសង្គមហ្វេសប៊ុក នៅថ្ងៃនេះគេបានសង្កេតឃើញទាំងមន្ត្រី
ស៊ីវិល កងកម្លាំងប្រដាប់អាវុធ និងប្រជាពលរដ្ឋធម្មតាបានប្រកាសគាំទ្រ និងអបអរចំពោះលោក ហ៊ុន ម៉ាណែត៕ដោយៈជម្ពូនុទ