រយៈពេល ១១ខែ ឆ្នាំ២០២១ ទុនវិនិយោគក្នុងវិស័យសំណង់នៅកម្ពុជាមានទឹកប្រាក់ជាង ៥ពាន់លានដុល្លារ
ភ្នំពេញ៖ ឯកឧត្តម ឡៅ ទិព្វសីហា រដ្ឋលេខាធិការក្រសួងដែនដី នគរូបនីយកម្ម និងសំណង់បានអោយដឹងថា ទុនវិនិយោគក្នុងវិស័យសំណង់នៅកម្ពុជា ក្នុងរយៈពេល ១១ខែ ឆ្នាំ២០២១នេះ មានតម្លៃប្រមាណជាង ៥ពាន់លានដុល្លារ ខណៈដែលរយៈពេលពេញមួយខែវិច្ឆិកាកន្លងទៅ គម្រោងសាងសង់អគារនានាបានកើនឡើងជាង ៣០០គម្រោង។
ឯកឧត្តម ឡៅ ទិព្វសីហា បន្តថា រយៈពេល ១១ខែ ឆ្នាំ២០២១ ក្រសួងរៀបចំដែនដី នគរូបនីយកម្ម និងសំណង់ និង រដ្ឋបាលរាជធានី ខេត្ត ក្រុង ស្រុក ខណ្ឌបានផ្តល់លិខិតអនុញ្ញាតសាងសង់ចំនួន ៣ពាន់៩២៥គម្រោងមានផ្ទៃក្រឡាសំណង់ ១២លានម៉ែត្រការ៉េ កើនឡើង៣២៧គម្រោង បើធៀបនឹងកាលពីឆ្នាំមុន ដែលមានចំនួន ៣ពាន់៥៩៨គម្រោង។ ចំណែកទុនវិនិយោគក្នុងវិស័យសំណង់ចាប់ពីខែមករា ដល់ខែវិច្ឆិកា មានចំនួន ៥ពាន់២១០លាន៣៥ម៉ឺន៩ពាន់៥០៩ដុល្លារ កើនឡើងជាង ៣០០លានដុល្លារ ខណៈកាលពីខែមករា ដល់ខែតុលាកន្លងទៅ ទុនវិនិយោគក្នុងវិស័យនេះមានចំនួនប្រមាណ ៤ពាន់៨៧៦លាន៨០ម៉ឺន៤ពាន់៨៩៩ដុល្លារ។ គម្រោងដែលបានស្នើសុំសាងសង់ រួមមានអគារពាណិជ្ជកម្ម អគារផ្សារ សណ្ឋាគារ សំណង់អគារលំនៅឋានលក្ខណៈបុរី ប្រភេទផ្ទះល្វែង សំណង់អគារ និងសំណង់គារពហុមុខងារសំណង់រោងចក្រឧស្សាហកម្មនានា។ ឯកឧត្តម ឡៅ ទិព្វសីហា បន្ថែមថា វិបត្តិជំងឺកូវីដ១៩មិនបានធ្វើឱ្យវិស័យអចលទ្រព្យរងផលប៉ះពាល់ខ្លាំងនោះទេក្នុងឆ្នាំ២០២១នេះ ដោយវិស័យនេះ នៅតែមានដំណើរល្អប្រសើរដែលធ្វើឱ្យវិស័យអចលនទ្រព្យស្ថិតក្នុងវិស័យចំនួនបីដែលជំរុញដល់កំណើនសេដ្ឋកិច្ចកម្ពុជាក្នុងឆ្នាំ២០២១។
សូមបញ្ជាក់ថា គិតចាប់ពីឆ្នាំ២០០៥ មកដល់រយៈពេល ១១ខែ ឆ្នាំ២០២១នេះ សំណង់អគារខ្ពស់ៗចាប់ពី ៥ជាន់ឡើងទៅ កើនឡើងរហូតជាង ២ពាន់៣៧៥អគារ ដែលក្នុងនោះ សំណង់អគារខ្ពស់ៗនៅខេត្តព្រះសីហនុមានចំនួនជាង ៦៦៦អគារ៕ ប្រភព៖ កម្ពុជាថ្មី