នារីម្នាក់ស្លាប់ និងបុរសម្នាក់ទៀតរបួសធ្ងន់ ខណៈកំពុងជិះម៉ូតូស្របគ្នាត្រូវរថយន្តកុងតឺន័របើកឡើងសួនពុះចែកទ្រូងផ្លូវ២១៧ មកបុករះទាំងកំរោល
អត្ថបទដោយ៖
Kien Sereyvuth
ភ្នំពេញ ៖ រថយន្តសណ្ដោងកុងតឺន័រមួយគ្រឿងបានបើកបុកឃឿនសួនច្បារពុះចែកទ្រូងផ្លូវ និងឆ្លងទៅផ្លូវម្ខាងទៀតបុករះម៉ូតូពីរគ្រឿងទាំងកំរោល បណ្ដាលឲ្យនារីម្នាក់ស្លាប់ពេលបញ្ចូនទៅកាន់មន្ទីរពេទ្យ និងបុរសម្នាក់ទៀតរងរបួសធ្ងន់ កាលវេលាម៉ោង១០ និង១០នាទីយប់ថ្ងៃសៅរិ៍ ទី២៥ ខែធ្នូ ឆ្នាំ២០២១ ស្ថិតនៅតាមបណ្ដោយផ្លូវ២១៧ ត្រង់ចំណុចជិតច្រកចូលទីលានចាក់សំរាម ក្នុងសង្កាត់ជើងឯក ខណ្ឌដង្កោ ។
សពនារីរងគ្រោះនៅមិនទាន់ស្គាល់អត្តសញ្ញាណនៅឡើយទេ ។
បេីតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់បើករថយន្ត ធុនធំ ប្រភេទសណ្ដោងកុងតឺន័រ ក្បាលពណ៌ខៀវ ពាក់ស្លាកលេខភ្នំពេញ3C-2670 បានធ្វេីដំណើរតាមបណ្ដោយផ្លូវ២១៧ ទិសដៅពីជើងទៅត្បូងក្នុងល្បឿនយ៉ាងលឿន ខណះមកដល់ចំណុចកើតហេតុខាងលើសង្ស័យតែតៃកុងស្រវឹងស្រា ទេីបបានរេចង្កូតទៅបុកឃឿនសួនច្បារពុះចែកទ្រូងផ្លូវ និងឆ្លងទៅផ្លូវម្ខាងទៀត បុករះម៉ូតូពីរគ្រឿងកំពុងធ្វើដំណើរបញ្ច្រាស់គ្នាពីត្បូងមកជើង បណ្ដាលឲ្យនារីម្នាក់ជិះម៉ូតូ Zoomer X ពណ៌ខ្មៅ ពាក់ស្លាកលេខ កណ្ដាល1AB -7324 បានស្លាប់ពេលបញ្ចូនជិតដល់មន្ទីរពេទ្យ និងបណ្ដាលឲ្យបុរសម្នាក់ជិះម៉ូតូហុងដាឌ្រីម ស៊េរីឆ្នាំ២០១៩ ពាក់ស្លាកលេខ តាកែវ1P-4870រងរបួសធ្ងន់ និងត្រូវបានរថយន្តសាម៉ុយរបស់មន្ទីរពេទ្យឯកជនដឹកទៅសង្គ្រោះភ្លាមៗ។
ក្រោយកើតហេតុ សមត្ថកិច្ចមូលដ្ឋានខណ្ឌដង្កោ បានចុះមកដល់ចំណុចកើតហេតុ និងបានទាក់ទងបន្តទៅសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ មកវាស់វែងយករថយន្តបង្ក និងម៉ូតូជនរងគ្រោះទៅរក្សាទុក រង់ចាំដោះស្រាយតាមច្បាប់នាពេលក្រោយ ៕ ដោយ ៖ ជីម ភារ៉ា