ទីបំផុតឡានហោះ AirCar នឹងត្រូវផលិតដាក់លក់លើទីផ្សារនាពេលខាងមុខ ក្រោយទទួលបានវិញ្ញាបនប័ត្រទទួលស្គាល់ជាផ្លូវការពីអាជ្ញាធរស្លូវ៉ាគី
ប្រាទីស្លាវ៉ា៖ នៅទីបំផុត អាជ្ញាធរដឹកជញ្ជូនរបស់ប្រទេសស្លូវ៉ាគី បានចេញវិញ្ញាបនបត្រនៃភាពស័ក្តិសមសម្រាប់ការហោះហើរដល់រថយន្តម៉ូដែល AirCar ដែលជាជំហានដំបូងឆ្ពោះទៅរកការផលិតរថយន្តហោះបាននេះដើម្បីដាក់លក់លើទីផ្សារ។ ឡានហោះ AirCar បានបញ្ចប់ការហោះហើរឆ្លងទីក្រុងលើកដំបូងរបស់ខ្លួននៅខែមិថុនា ឆ្នាំ២០២១។
ប្រភពបានអោយដឹងថា ឡានហោះដ៏ទំនើបនេះត្រូវបានបំពាក់ដោយម៉ាស៊ីន BMW ចំណុះ ១,៦លីត្រ ហើយត្រូវការផ្លូវរត់ត្រឹមតែ ៣០០ម៉ែត្រប៉ុណ្ណោះដើម្បីហោះឡើង។ វាមានល្បឿនហោះហើររហូតដល់ ១៧០គីឡូម៉ែត្រក្នុងមួយម៉ោង និងអាចហោះបានចម្ងាយ ១ពាន់គីឡូម៉ែត្រ។ ដំណើរការប្រែកាយពីឡានទៅជាយន្តហោះគឺប្រើពេលមិនដល់៣នាទីនោះឡើយ។ អ្វីៗគឺស្វ័យប្រវត្តិទាំងអស់ ដូច្នេះគ្រាន់តែចុចប៊ូតុងតែមួយ វានឹងធ្វើអ្វីៗដោយខ្លួនឯង។
ស្ថាបនិក និងជានាយកប្រតិបត្តិក្រុមហ៊ុន KleinVision ជាក្រុមហ៊ុនរចនា និងផលិតគំរូនៃរថយន្តហោះ គឺលោក Stefan Klein បានបញ្ជាក់នៅក្នុងសេចក្តីប្រកាសព័ត៌មានថា វាគឺជាការបញ្ជាក់ជាផ្លូវការ និងចុងក្រោយនៃសមត្ថភាពរបស់យើង ក្នុងការផ្លាស់ប្តូរការធ្វើដំណើរចម្ងាយមធ្យមជារៀងរហូត៕ ប្រភព៖ Asianewsday