អំបិលចំនួនជាង៥តោនបាននាំពីប្រទេសឥណ្ឌាចូលមកកម្ពុជាដើម្បីបំពេញតម្រូវការក្នុងស្រុក។ ពាណិជ្ជករលោក ប៊ុន បារាំង ដែលនាំអំបិលឥណ្ឌា ចូលមកក្នុងស្រុក បានថ្លែងនៅថ្ងៃទី១៨ តុលានេះថា ការផលិតអំបិល នៅខេត្តកំពតនិងខេត្តកែប ក្នុងប៉ុន្មានឆ្នាំចុងក្រោយនេះ មិនបាន ទទួលផល ដោយសារមកពីកត្តាភ្លៀងធ្លាក់ស្ទើរគ្រប់រដូវកាល។

ក្រសួងធនបានទឹក និងឧតុនិយមបានព្យាករណ៍ថា ភ្លៀងបានធ្លាក់ចុះខ្សោយហើយ និង កន្លែងខ្លះក៏ស្ទើរតែគ្មានភ្លៀងផងដែរ។ ការព្យាករណ៍របស់ក្រសួងធនបានទឹក និងឧតុនិយម បានឱ្យដឹងថា នៅតំបន់ទំនាបកណ្ដាល ចាប់ពីថ្ងៃទី១៩ដល់២១ ខែតុលា ស្ទើរតែគ្មានភ្លៀង ប៉ុន្តែបើមាន គឺក្នុងកម្រិតតិចតួចតែប៉ុណ្ណោះ ។

ពលរដ្ឋរងគ្រោះដោយទឹកជំនន់ចំនួន២០៦គ្រួសារ នៅក្នុងខេត្តកំពង់ឆ្នាំង បានទទួល អំណោយកាកបាទក្រហមខេត្ដនៅថ្ងៃទី១៨តុលានេះ។ ខេត្តកំពង់ឆ្នាំង គឺជាខេត្តមួយ ដែលរងនឹងការលិចតាម កន្លែងខ្លះដោយសារជំនន់ទឹកភ្លៀងផងដែរ។

អាវរងារចំនួន២៣៧អាវ បានចែកជូនដល់កងកម្លាំងបញ្ជាការរដ្ឋានក្នុង តំបន់ប្រតិបត្តិការ សឹករងកំពង់ឆ្នាំង នាថ្ងៃ១៨តុលានេះក្នុងពេលដែលអាកាសធាតុចុះត្រជាក់បានឈានមក ដល់។

កម្ពុជា-ធនាគារអភិវឌ្ឍន៍អាល្លឺម៉ង់ បានចុះកិច្ចព្រមព្រៀងហិរញ្ញប្បទានឥតសំណង ប្រមាណ ១៥លាន៥សែនដុល្លារ សម្រាប់អនុវត្តគម្រោងលើកកម្ពស់គុណភាព និងសមធម៌សុខាភិបាល នៅកម្ពុជា។

តួលេខភ្ញៀវទេសចរបានកើនឡើងខ្លាំងក្នុងសប្តាហ៍កន្លងមកនេះ។ យោងតាមក្រសួងទេសចរណ៍ក្នុងមួយសប្តាហ៍គិតចាប់តាំងពីថ្ងៃទី១០ដល់១៦តុលា តួលេខទេសចរណ៍ មានចំនួន ៩៣ម៉ឺន៨ពាន់៩២៨នាក់ ដែលកើនឡើង១៥០.៤៥% ប្រៀបធៀបនឹងសប្តាហ៍កន្លង មក។ ក្នុង តួលេខភ្ញៀវទេសចរណ៍ជិត៩៤ម៉ឺននាក់នោះ រួមមានភ្ញៀវជាតិចំនួន៩១ម៉ឺន៤ពាន់៥៤៣នាក់ និងភ្ញៀវបរទេសផ្ទៃក្នុងចំនួន២ម៉ឺន៤ពាន់៣៨៥នាក់។

គណៈកម្មាធិការជាតិរៀបចំការបោះឆ្នោត បានប្រាប់មន្ត្រីក្រោមបង្គាប់ ត្រូវស្នើសុំ កិច្ចអន្ត រាគមន៍ពីកម្លាំងមានសមត្ថកិច្ច ក្នុងករណីមានការអុកឡុករំខាន, ការគំរាមកំហែង ឬការ ប្រព្រឹត្តអំពើល្មើសច្បាប់ផ្សេងៗណាដែលបង្កការរំាងស្ទះដល់ដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោត។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងនៅថ្ងៃអង្គារិ៍ទី១៨តុលាថា សម្តេច នឹងប្រើពេល៥ថ្ងៃ៤យប់ នៅតាមខេត្តភាគពាយព្យប្រទេស ដើម្បីដោះស្រាយបញ្ហាដែលពល រដ្ឋកំពុងប្រឈមនឹងការលិចលង់ដំណាំដោយសារជំនន់ទឹកភ្លៀង។ ដំណើររបស់សម្តេចតេ ជោ គ្រោងនឹងធ្វើនៅតាមបណ្តាខេត្តដែលរងនឹងទឹកជំនន់ទាំងនោះ ក្រោយការបំពេញកាតព្វ កិច្ចជាតិជួបថ្នាក់ដឹកនាំនៃប្រទេសទីម័ររួចរាល់។

ប្រធានាធិបតីទីម័រខាងកើត បណ្ឌិត ហូសេ រ៉ាមូស ហ័រតា (Jose Ramos-Horta) គ្រោងនឹង ដឹកនាំគណៈប្រតិភូ បំពេញទស្សនកិច្ចរយៈពេល៣ថ្ងៃនៅកម្ពុជាចាប់ពីថ្ងៃស្អែកនេះហើយ ដែលក្នុងដំណើរទស្សនកិច្ចនោះ នឹងមានការចុះហត្ថលេខាទ្វេភាគីជាមួយ នឹងប្រមុខដឹកនាំ រាជរដ្ឋាភិបាលកម្ពុជាផងទៀត។

សមាជិកការិយាល័យនយោបាយ និងជាលេខាធិការអចិន្ត្រៃយ៍នៃគណៈលេខាមជ្ឈឹមបក្ស វៀតណាម លោកវ៉ូ វ៉ាន់ធឿង បានអញ្ជើញជួបប្រមុខដឹកនាំរាជរដ្ឋាភិបាលកម្ពុជានៅថ្ងៃអង្គារ៍ ទី១៨តុលាឆ្នាំ២០២២។