ប្រជាពលរដ្ឋដែលបានទទួលការចាក់វ៉ាក់សាំងក្នុងរយៈពេល២៤ម៉ោងកន្លងមកនេះ មានចំនួន១ម៉ឺន៥ពាន់ ៦១១នាក់ ។ យោងតាមក្រសួងសុខាភិបាល, តួលេខនៃចំនួនសារុបដែលប្រជាពលរដ្ឋទូទាំងប្រទេស ដែលបាន ទទួល ការ ចាក់វ៉ាក់សាំងគិតត្រឹមថ្ងៃទី១៩ ខែតុលា បានកើនដល់១៣លាន៦សែន៩ពាន់៥២១នាក់ហើយ, ក្នុង នោះអ្នកបានចាក់វ៉ាក់សាំងដូសទី២ រួចមានចំនួន១២លាន៧សែន១ម៉ឺន៤ពាន់៦៧៥នាក់, ការចាក់វ៉ាក់សាំងលើ ពលរដ្ឋអាយុពី១៨ឆ្នាំឡើង មានចំនួន៩លាន៩សែន៥ម៉ឺន៣ពាន់៦២២នាក់, ការចាក់លើយុវជនវ័យជំទង់អាយុ រវាងពី ១២ដល់១៧ឆ្នាំ មានចំនួន ១លាន៧សែន៧ម៉ឺន៦ពាន់៨១៥នាក់, ចំណែកការចាក់លើកុមារអាយុពី៦ដល់ ១២ឆ្នាំ មានចំនួន ១លាន៨សែន៧ម៉ឺន៩ពាន់៨៤នាក់ ។ ដោយឡែកការចាក់ដូសទី៣ លើពលរដ្ឋគិតមកដល់ថ្ងៃ ទី១៨ តុលា ឆ្នាំ២០២១ បានចំនួន ១លាន៤សែន៨ម៉ឺន៧៤៧នាក់ ។

ការឃើញនូវតួលេខស្លាប់កន្លងមកលើពលរដ្ឋដែលមិនបានចាក់វ៉ាក់សាំង បានជម្រុញឲ្យក្រសួងសុខាភិបាល អំពាវនាវអ្នកមិនទាន់បានចាក់ ត្រូវប្រញាប់ទៅចាក់វ៉ាក់សាំងជាបន្ទាន់។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន២ម៉ឺន៧ពាន់៦៦ ករណី និងការស្លាប់ថ្មីមានចំនួន៥២៥នាក់។ ប្រទេសដែលមានការឆ្លងថ្មី ក្នុងរយៈ ពេល២៤ម៉ោងចុង ក្រោយ នេះនៅ អាស៊ាន មាន១០ប្រទេស។ ចំណែកការស្លាប់ថ្មីមានចំនួន៩ប្រទេស។

សម្តេចនាយករដ្ឋមន្ត្រី បានថ្លែងអំពាវនាវក្នុងសារសម្លេងមួយនៅថ្ងៃទី១៩តុលាដាស់តឿនប្រជាពលរដ្ឋត្រូវរៀន រស់នៅក្នុងបរិបទនៃគន្លងថ្មីដែលមានជម្ងឺកូវីដ១៩ ដែលការដាស់តឿននេះ បានធ្វើឡើងទន្ទឹមនឹងយុទ្ធនាការ ការចាក់វ៉ាក់សាំងត្រៀមនឹងបិទបញ្ចប់នាពេលខាងមុខ និងក្នុងពេលដែលតួលេខឆ្លងនិងស្លាប់ដោយសារកូវីដ១៩ ក្នុងប្រទេសកម្ពុជា ត្រូវគេឃើញថាបានបន្តធ្លាក់ចុះជាលំដាប់។

តួលេខឆ្លងកូវីដ១៩ក្នុងរយៈពេល២៤ម៉ោងចុងក្រោយនេះ បានបន្តធ្លាក់ចុះថែមទៀតដែលជាតួលេខស្ថិត ក្រោមខ្ទង់២០០ករណីក្នុងរយៈពេល២ថ្ងៃជាប់គ្នាមកនេះ។ តួលេខឆ្លងថ្មីថ្ងៃនេះ មានចំនួន១៧៥ករណីដែលថយ ចុះ២០ករណីបើប្រៀបធៀបនឹងការឆ្លងម្សិលមិញ។

តម្លៃប្រេងឥន្ធនៈ នៅតែបន្ដកើនឡើងបន្ថែមទៀត សម្រាប់ការលក់រយៈពេល១៥ថ្ងៃខាងមុខនេះ។ យោងតាម ក្រសួងពាណិជ្ជកម្ម, តម្លៃប្រេងឥន្ធនៈ សម្រាប់ការលក់ចាប់ពី ថ្ងៃទី១៦ រហូតដល់ថ្ងៃទី៣១ ខែតុលា ឆ្នាំ២០២១នេះ គឺប្រេងសាំងធម្មតា មានតម្លៃ៤ពាន់៣០០រៀលក្នុង១លីត្រ ដែលតម្លៃនេះគឺកើនឡើងចំនួន២០០រៀល បើធៀប ទៅការ លក់រយៈពេល១៥ ថ្ងៃមុនដូចគ្នា…ចំណែកប្រេងម៉ាស៊ូតវិញ មានតម្លៃ៤ពាន់រៀល ក្នុង១លីត្រ ដែលតម្លៃ នេះ បានកើនឡើងចំនួន២០០រៀល បើធៀបទៅនឹងការលក់រយៈពេល១៥ ថ្ងៃមុន៕

សេចក្តីព្រាងច្បាប់ស្តីពីសញ្ជាតិខ្មែរតែមួយសម្រាប់ថ្នាក់ដឹកនាំកំពូល កំពុងស្ថិតក្នុងរង្វង់ការពិនិត្យពីក្រុមជំនាញ នីតិកម្មរដ្ឋសភា។ សេចក្តីព្រាងច្បាប់ស្តីពីសញ្ជាតិខ្មែរតែមួយសម្រាប់ថ្នាក់ដឹកនាំកំពូលនេះ នឹងរំពឹងរកការ ដេញដោលអនុម័តក្នុងកិច្ចប្រជុំពេញអង្គរដ្ឋសភា នាពេលអនាគតខាងមុខនេះ៕