បើលោកអ្នកធ្វើដំណើរចេញពីភ្នំពេញតំម្រង់ទៅស្ពានព្រែកក្តាម ប្រមាណ ៣០គីឡូ លោកអ្នកនឹងឃើញទិដ្ឋភាពនៃសិប្បករជាច្រើនតាមផ្ទះរៀងៗខ្លួន រវល់ដំប៉ូងបាំងៗ លើចម្លាក់ស្ពាន់ទៅជាវត្ថុផ្សេងគួរឲ្យកោតសរសើរ​អាចនិយាយថា ទីណាមានចម្លាក់ស្ពាន់ គឺគេគិតដល់ស្ពានព្រែកក្តាមមុនគេ។  ប៉ុន្តែសិប្បកម្មដែលធ្វើដោយដៃនេះ មិនសូវមានទីផ្សារខ្លាំងឡើយ គឺលក់ពឹងផ្អែកតាមអ្នកដំណើរចូលតំបន់នោះតែប៉ុណ្ណោះ។ ដោយសារមានទឹកចិត្តស្រលាញ់​​ មានបងប្អូនជាអ្នកឆ្លាក់ស្រាប់នៅតំបន់នោះ និងចង់ស្វែងរកទីផ្សារឲ្យកាន់តែច្រើន លោកស្រី ឈឺន ពុទ្ធារី ម្ចាស់ហាងម៉ាដាមច្នៃ បានឆក់ឪកាសនេះ យកចម្លាក់ស្ពាន់មកលក់នៅភ្នំពេញ និង លក់តាមអនឡាយ ហើយសន្ទុះនៃការទិញពីភ្ញៀវក៏រាងគួរសម កំឡុងពេលលោកស្រី ពុទ្ធារីព្យាយាមផ្សព្វផ្សាយលក់តាមហ្វេសប៊ុក។

វីរៈប៊ុនថាំ ជាឈ្មោះដែលយើងបានលឺ ញឹកញាប់ជាងគេ ខ្ទង់ឆ្នាំ ២០០៤ ដែលផ្តាច់មុខលើការដឹកជញ្ចូនភ្ញៀវពីតំបន់មួយទៅតំបន់មួយ។ ប៉ុន្តែស្ថិតក្នុងឆ្នាំ ២០២១ អាជីវកម្មមួយនេះ​បានវិវឌ្ឍខ្លួនបង្កើនសេវាកម្មផ្នែកដឹកជញ្ចូនទំនិញ បែបឆាប់រហ័ស ក៍ដូចជាផ្សារអនឡាយ ដែលមានទំនិញរាប់រយមុខផងដែរ។ លោក សូរ វីរៈ ស្ថាបនិកនៃក្រុមហ៊ុនឯកទេសផ្នែកដឹកជញ្ចូនលើកឡើងថា លោកមិនចង់ឲ្យប្រជាពលរដ្ឋនៅនឹងថ្កល់មួយកន្លែងទេ ត្រូវតែផ្លាស់ប្តូរ និងដើរឲ្យនឹងបច្ចេកវិទ្យាសម័យថ្មី។

ប្រអប់ខ្លឹម គឺជា អាជីវកម្មក្មេងខ្ជីមួយ តែប្រកបដោយការច្នៃប្រឌិត ក្នុងការផលិត​ឧបករណ៍ ឆ្លាតវៃ ដើម្បីផ្សារភ្ជាប់ការអនុវត្ត ផ្នែកវិទ្យាសាស្ត្រជាមួយនឹងមេរៀនក្នុងសាលានៅកម្រិតមធ្យមសិក្សា។ យុវជនដែលផលិតប្រអប់ខ្លឹមនេះ មានគ្នាត្រឹមតែបីនាក់ប៉ុណ្ណោះ តែពួកគេបានចំណាយពេលអភិវឌ្ឍផលិតផលអោយថ្មីជានិច្ច និងស្វះស្វែងរកថវិកាពីមូលនិធិផ្សេងៗ ដើម្បីធានាថា អាជីវកម្មរបស់ពួកគេនឹងមានដង្ហើមជានិច្ចនៅប្រទេសកម្ពុជា។

Smart Farm Assistance គឺជា​ប្រព័ន្ធ​ដែល​អាច​បញ្ជា​ការ​បិទ បើកទឹក​ស្រោច​ដំណាំ​បាន​ពី​ចម្ងាយ នៅ​លើ​អេប (App) ស្មាតហ្វូន។ ក្រុមយុវជនដែលមានសមាជិក៦នាក់ ដែលមានឪពុកម្តាយជាកសិករ តាមបែបបុរាណចំណាយទាំងពេលវេលាខ្វះបច្ចេកទេស និងកំលាំងពលកម្មជាច្រើន ដូច្នេះ ពួកគេនាំគ្នាស្វែងរកដំណោះស្រាយតាមបែបទំនើប ដោយប្រើប្រាស់ប្រពន្ធ័បច្ចេកវិទ្យា។