សម្តេចតេជោ ហ៊ុន សែន បានទទួលជួបពិភាក្សាជាមួយរដ្ឋមន្ត្រីការពារជាតិជប៉ុនលោកគីស៊្ហី ណូប៊ុអូ នៅថ្ងៃទី២២មិថុនានេះនៅវិមានសន្តិភាព។ រដ្ឋមន្ត្រីការពារជាតិជប៉ុនបានថ្លែងគាំទ្រ កម្ពុជាក្នុងកិច្ចសហប្រតិបត្តិការវិស័យការពារជាតិ។

យុទ្ធនាការចាក់វ៉ាក់សាំងដូសទី៥ រយៈពេល ១៣ថ្ងៃមកនេះ មានពលរដ្ឋទៅចាក់បានចំនួន ២១ម៉ឺន ៧ពាន់ ៦២២នាក់ហើយ ។ កម្ពុជាដោយសារគោលនយោបាយចាក់វ៉ាក់សាំងរបស់រាជ រដ្ឋាភិបាលនេះហើយ, បាននាំឲ្យតួលេខឆ្លង និងស្លាប់បានធ្លាក់ក្នុងចំណុចសូន្យ ប្រមាណជិត ២ខែមកហើយ។

តួលេខអ្នកឆ្លងជំងឺកូវីដ១៩ក្នុងប្រទេសកម្ពុជារយៈពេល២៤ម៉ោងនេះ បានស្ថិតក្នុងចំណុច សូន្យជាដដែល ដែលនាំឱ្យការមិនឆ្លងសោះមានចំនួន៤៥ថ្ងៃជាប់គ្នាជាបន្តបន្ទាប់។

តម្លៃប្រេងសាំងនៅថេរ ប៉ុន្តែតម្លៃប្រេងម៉ាស៊ូត បានកើនឡើងថែមទៀត សម្រាប់ក្នុងការលក់រយៈពេល១០ថ្ងៃខាងមុខនេះ។

បាតុភូតភ្លៀង ផ្គរ រន្ទះ និងខ្យល់កន្ត្រាក់ នៅតែបន្ដកើតមានថែមទៀតក្នុងសប្ដាហ៍ទៅមុខនេះ ខណៈកម្ពុជា បានទទួលរងនូវឥទ្ធិពលពីជ្រលងនៃប្រព័ន្ធសម្ពាធទាបដែលអូសបន្លាយ នៅ លើភាគខាងជើងប្រទេសថៃ ប្រទេសឡាវ និងប្រទេសវៀតណាម ជាមួយនឹងខ្យល់មូសុង និរតីបក់ក្នុងល្បឿនពីមធ្យមទៅបង្គួរ ។

អគ្គិភ័យបានកើតឡើង២ថ្ងៃជាប់គ្នាក្នុងរាជធានីភ្នំពេញដោយបានឆេះផ្ទះសរុបចំនួន៤០ខ្នង។ ករណីឆេះទី១ ដែលមានផ្ទះ៣៧ខ្នងបានឆេះ កើតឡើងនៅខណ្ឌច្បារអំពៅត្រូវគេបន្ទោសថា ដោយសារមនុស្សឆេះគ្រឿងញៀន បានដុតផ្ទះខ្លួនឯង, ចំណែកការឆេះមួយផ្សេងទៀត បាន កើតឡើងក្នុងខណ្ឌឫស្សីកែវ ដែលមានផ្ទះ៣ខ្នងបានឆេះ។ ការឆេះនោះ ត្រូវបានគេបន្ទោស ថាមកពីការឆ្លងចរន្តអគ្គិសនី។

បេក្ខជនគណបក្សភ្លើងទៀនម្នាក់ដែលទើបជាប់ឆ្នោតជាមេឃុំក្នុងខេត្តកំពង់ធំ ត្រូវសមត្ថកិច្ច ចាប់ខ្លួនយោងតាមដីកាពាក់ព័ន្ធនឹងបទល្មើសប្លន់កាលពី២០ឆ្នាំមុន។ ឈ្មោះ ឌុក សារ៉ុម ហៅ ញឹម សារ៉ុម ហៅ ឌុប វ៉ាន់ ឬហៅ ឌុប រ៉ុម ត្រូវបានចោទប្រកាន់ពីបទ «ប្លន់» ប្រព្រឹត្តនៅភូមិត្រពាំងជ័រ ឃុំចំណារលើ ស្រុកស្ទោង ខេត្តកំពង់ធំ កាលពីថ្ងៃទី៣១ ខែតុលា ឆ្នាំ២០០២។

ការវាយលុករបស់រុស្ស៊ីកាន់តែបន្តពង្រីកទឹកដីកាន់កាប់ភាគខាងកើតអ៊ុយក្រែន។ កងកម្លាំង​រុស្ស៊ី បានដណ្ដើមយកទឹកដីតាម​ដង​ទន្លេ​ជាសមរភូមិមុខ ហើយ​បង្កើនសម្ពាធ​មក​ដាក់លើទី ក្រុងចំនួនពីរទៀត​ ។ ទោះជាយ៉ាងណាក៏ដោយ, រុស្ស៊ីបានបង្ហាញប្រៀបលើសមរភូមិនៃ ផ្នែកភាគខាងកើតតែប៉ុណ្ណោះ ប៉ុន្តែភាគខាងត្បូងប្រទេសនោះវិញ, ទាហានអ៊ុយក្រែនបាន បង្ហាញការវាយលុករំកិលមក កាន់ក្រុង Kherson ដែលរុស្ស៊ីគ្រប់គ្រង។

សម្តេចពិជ័យសេនា ទៀ បាញ់ បានទទួលជួបពិភាក្សាជាមួយសមភាគីឥណ្ឌូណេស៊ីដែលកំពុង បំពេញទស្សនកិច្ចក្នុងប្រទេសកម្ពុជា។