អាមេរិក៖ សភាតំណាងរាស្រ្តអាមេរិកបានអនុម័តលើវិក័យប័ត្រមូលនិធិមួយ ដែលមានគោលបំណងផ្តល់មូលនិធិដល់រដ្ឋាភិបាលសហព័ន្ធ រហូតដល់ពាក់កណ្តាលខែកុម្ភៈខាងមុខនេះ ដោយបញ្ជូនវាទៅព្រឹទ្ធសភាដើម្បីអនុម័ត ឬប្រឈមមុខនឹងការបិទរដ្ឋាភិបាលមួយផ្នែក។

បរទេស៖ រដ្ឋមន្ត្រីការបរទេសអាមេរិក លោក អាន់តូនី ប្លីងខិន បានព្រមានសមភាគីរុស្ស៊ីលោក សឺហ្គៃ ឡាវរូវ ថា ទាហានរុស្ស៊ីចាំបាច់ត្រូវដកថយពីព្រំដែនជាមួយអ៊ុយក្រែន ហើយថា ទីក្រុងមូស្គូ អាចប្រឈមនឹង “ផលវិបាកធ្ងន់ធ្ងរ”។

បរទេស៖ សហភាពអឺរ៉ុប កាណាដា ចក្រភពអង់គ្លេស និងសហរដ្ឋអាមេរិក​បានដាក់បន្ថែមទណ្ឌកម្មថ្មីប្រឆាំងនឹងប្រទេសបេឡារុស ចំពោះការបង្ក​វិបត្តិជនភៀសខ្លួន​ដោយ​ហេតុផល​នយោបាយ នៅតាមព្រំដែនប្រទេសប៉ូឡូញដែលជាសមាជិករបស់សហភាពអឺរ៉ុប។

ប៉េកាំង៖ អ្នកនាំពាក្យក្រសួងការបរទេសចិនលោក Wang Wenbin បានរិះគន់កិច្ចប្រជុំកំពូលដើម្បីលទ្ធិប្រជាធិបតេយ្យ ដែលគ្រោងនឹងធ្វើឡើងនៅសហរដ្ឋអាមេរិក ហើយបាននិយាយថា ព្រឹត្តិការណ៍នេះគឺជាឧបករណ៍ និងគ្របដណ្តប់ដើម្បីជំរុញគោលបំណងភូមិសាស្ត្រនយោបាយរបស់ទីក្រុងវ៉ាស៊ីនតោន។

ប៉េកាំង៖ ក្រសួងការបរទេសចិនបានលើកឡើងថា ពិធីសារដើម្បីបន្តកិច្ចព្រមព្រៀងរវាងចិន និងរុស្ស៊ី ដើម្បីជូនដំណឹងដល់គ្នាទៅវិញទៅមកអំពីការបាញ់បង្ហោះកាំជ្រួចមីស៊ីលផ្លោង និងនាវាផ្ទុកគ្រាប់រ៉ុក្កែតក្នុងរយៈពេល ១០ឆ្នាំបានចូលជាធរមាន នៅក្នុងថ្ងៃ ពុធ សប្តាហ៍នេះ។