សេអ៊ូល៖ ក្រសួងការបរទេសកូរ៉េខាងជើងបានលើកឡើងថា សម្ព័ន្ធភាពថ្មីរវាងអាមេរិក អង់គ្លេស និងអូស្ត្រាលី ដែលនឹងការផ្តល់បច្ចេកវិទ្យាដើម្បីជួយអូស្ត្រាលីក្នុងការផលិតនាវាមុជទឹកដើរដោយថាមពលននុយក្លេអ៊ែរនោះ អាចនឹងបង្កឲ្យមាន «ការប្រកួតប្រជែងអាវុធនុយក្លេអ៊ែរ»នៅក្នុងតំបន់។

ប៉ារីស៖ បារាំងបានសម្រេចចិត្តលុបចោលកិច្ចប្រជុំមួយដែលនឹងធ្វើឡើងរវាងរដ្ឋមន្ត្រីការ​ពារ​ជាតិ​បារាំង​ លោកស្រី ផ្លរ៉ង់ ប៉ាលី និងសមភាគីអង់គ្លេសរបស់លោកស្រី ដែលគ្រោងធ្វើនៅសប្តាហ៍នេះ ក្រោយអូស្ត្រាលីបានលុបចោលការបញ្ជាទិញនាវាមុជទឹកមួយគ្រឿងជាមួយទីក្រុងប៉ារីស ដើម្បីគាំទ្រកិច្ចព្រមព្រៀងជាមួយទីក្រុងវ៉ាស៊ីនតោន និងទីក្រុងឡុងដ៍។

ឡុងដ៍៖ នាយករដ្ឋមន្ត្រីអង់គ្លេសលោក បូរីស ចនសុន នៅថ្ងៃអាទិត្យម្សិលមិញ បានចេញមុខបន្ធូរបន្ថយកម្តៅការទូតជាមួយនឹងបារាំង ទាក់ទិនកិច្ចព្រមព្រៀងសន្តិសុខថ្មីរវាងអូស្រ្តាលី និងសហរដ្ឋអាមេរិក ដោយលោកបាននិយាយថា ក្តីស្រលាញ់របស់អង់គ្លេសចំពោះបារាំង គឺមិនអាចកាត់ថ្លៃបានឡើយ។

ប៉ារីស៖ ប្រធានាធិបតីអាមេរិក និងបារាំង នឹងជជែកគ្នាតាមទូរស័ព្ទនៅប៉ុន្មានថ្ងៃខាងមុខទៀតនេះ ដែលវានឹងក្លាយជាការពិភាក្សាលើកដំបូងរបស់ពួកលោក ចាប់តាំងពីជម្លោះការទូតបានផ្ទុះឡើង ជុំវិញការសម្រេចចិត្តរបស់អូស្ត្រាលី ក្នុងការលុបចោលកិច្ចព្រមព្រៀងនាវាមុជទឹករបស់ខ្លួនជាមួយបារាំង។

ស៊ីដនី៖ នាយករដ្ឋមន្ត្រីអូស្ត្រាលី លោក ស្កុត ម៉ូរីសុន នៅថ្ងៃអាទិត្យម្សិលមិញបានចេញមុខការពារការសម្រេចចិត្តលុបចោលកិច្ចព្រមព្រៀងទិញនាវាមុជទឹកពីបារាំង ពីព្រោះការធ្វើបែបនេះគឺដើម្បីប្រយោជន៍ជាតិ។

ប៉ារីស៖ បារាំងបានចោទប្រកាន់អូស្រាលី និងសហរដ្ឋអាមេរិកថា បានបំពានទំនុកចិត្ត និងជាការប្រមាថដ៏ធំមួយ ពាក់ព័ន្ធនឹងកិច្ចព្រមព្រៀងទិញនាវាមុជទឹក ដែលជាការសងសឹកនោះ បារាំងបានកោះហៅឯកអគ្គរដ្ឋទូតប្រចាំក្រុងកង់បេរ៉ា និងវ៉ាស៊ីនតោនត្រឡប់មកកាន់មាតុប្រទេសវិញ។