ព្រះវិហារ: ក្មេងប្រុស២នាក់ បានលង់ទឹកស្រះស្លាប់ គួរឲ្យអណោចអាធ័ម ខណៈពេលដែលម្តាយរបស់ពួកគេជាបរវល់ទៅស្ទូងស្រូវ។ ហេតុការណ៍នេះបានកើតឡើងកាលពីរសៀលម៉ោង០៣ ថ្ងៃទី១០ ខែកក្កដា ឆ្នាំ២០១៨ នៅភូមិក្របៅ ឃុំគូលែនត្បូង ស្រុកគូលែន ខេត្តព្រះវិហារ។ លោកវរៈសេនីយ៍ទោ ឡាញ់លី ស៊ីឡេង អធិការនគរបាលស្រុកគូលែន បានប្រាប់ឲ្យដឹងថា មុនពេលកើតហេតុ ម្តាយរបស់ក្មេងប្រុសជាជនរងគ្រោះទាំង២ បានប្រវាស់គ្នាស្ទូងស្រូវ ដោយពួកគាត់បាននាំកូនៗរបស់ពួកគាត់រៀងៗខ្លួន ទៅជាមួយដែរ។ ស្របពេលដែលកំពុងស្ទូងស្រូវ ពួកគាត់មិនបានចាប់អារម្មណ៍ទេ ក្រោយមកក៏ស្ងាត់មាត់ក្មេងទាំង២នាក់ ពួកគាត់ខំស្រែកហៅ ក៏ស្រែកហៅមិនឮ ពួកគាត់បានដើរទៅទឹកស្រះដែលនៅជិតនោះ ស្រាប់តែប្រទះឃើញសាកសពក្មេងទាំង២នាក់នោះអណ្តែត ទៅហើយ។ លោកអធិការបានបន្តថា សាកសពក្មេងប្រុសទី១ឈ្មោះ ផា ផាត់ ភេទប្រុសអាយុ៤ឆ្នាំ និងសាកសពក្មេងប្រុសទី២ឈ្មោះ ឆូយ រ៉ាឆាត ភេទប្រុសអាយុ៤ឆ្នាំ រស់នៅភូមិឃុំខាងលើ។ ក្រោយពិនិត្យសាកសពរួចសមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យរៀងៗខ្លួនតាមប្រពៃណី៕ដោយៈ សួនលីណា

ភ្នំពេញ ៖ បុរសជនជាតិចិនពីរនាក់ ត្រូវបានរថយន្តសាមុយដឹកយកទៅសង្គ្រោះនៅឯមន្ទីពេទ្យឯកជនភ្លាមៗ បន្ទាប់ពីរូបគេជិះម៉ូតូឌុបគ្នាឆ្លងផ្លូវមិនប្រយ័ត្ន ហើយត្រូវរថយន្តកូរ៉េដឹកត្រីបុកចំពីមុខយ៉ាងពេញទំហឹង កាលពីវេលាម៉ោង៣ និង១០នាទីរំលងអាធ្រាត  ឈានចូលថ្ងៃទី១១ ខែកក្កដា ឆ្នាំ២០១៨ នៅតាមបណ្ដោយផ្លូវព្រះស៊ីសុវត្ថិ  (ជួរផ្លូវមាត់ទន្លេ) កែងនិងផ្លូវលេខ១១៨ ស្ថិតក្នុងសង្កាត់ផ្សារកណ្ដាលទី១ ខណ្ឌដូនពេញ រាជធានីភ្នំពេញ ។

ភ្នំពេញ ៖ ក្រុមជនដៃស្អិតដែលតែងតែធ្វើសកម្មភាពឆក់យកទ្រព្យសម្បត្តិអ្នកធ្វើដំណើរតាមផ្លូវ ត្រូវអស់ល័ក្ខ បន្ទាប់ពីធ្វើសកម្មភាពឆក់យកទូរស័ព្ទដៃពីអ្នកគ្រូពេទ្យម្នាក់បានសម្រេចហើយ តែរត់មិនរួច ត្រូវអ្នកគ្រូពេទ្យនោះជិះម៉ូតូប្រដេញតាមបំបុកម៉ូតូជនសង្ស័យដួល ហើយស្រែកឲ្យគេជួយ ក៏ត្រូវប្រជាពលរដ្ឋក្បែរនោះព័ទ្ធចាប់បានទាំង២នាក់ ។  ករណីនេះបានកើតឡើងកាលពី ថ្ងៃអង្គារ ១៣រោច ខែស្រាពណ៏ ឆ្នាំច សំរឹទ្ធិស័ក្រ ព.ស ២៥៦២ ត្រូវនឹងថ្ងៃទី១០ ខែកក្កដា ឆ្នាំ២០១៨ វេលាម៉ោង៤និង៣០នាទីល្ងាច ស្ថិតនៅតាមផ្លូវ១០០៣ ភូមិពោងពាយ សង្កាត់ភ្នំពេញថ្មី ខណ្ឌសែនសុខ ។

ទោះបីបដិវត្តន៍ពណ៌ដែលពួកឈ្លានពានបរទេស និងអាយ៉ងក្នុងស្រុកចង់យកមកសាកល្បងនៅកម្ពុជា ត្រូវបរាជ័យយ៉ាងអាម៉ាស់យ៉ាងណាក៏ដោយ ក៏មហិច្ឆតាពួកគេនៅតែមានដដែល។ទោះបីរូបភាពឧបាយកលធំៗ ត្រូវបានកាត់បន្ថយ តែនៅមានឧបាយកលថ្មីៗទៀត ដើម្បីបំផ្លាញការបោះឆ្នោតដែលជិតឈានមកដល់នាពេលឆាប់ៗនេះ ។ ពួកបណ្តាញ ទាំងក្រៅស្រុក ទាំងក្នុងស្រុកនៅបន្តសកម្មភាពយ៉ាងមមាញឹកក្នុងចេតនារារាំង និងបំផ្លាញការបោះឆ្នោត។ ពួកគេខ្លះបានប្រកាសថាមិនចូលរួមសង្កេតការណ៍បោះឆ្នោត ដែលគេខ្លាចថាមានឈ្មោះដែលគេហៅថាប្រថាប់ត្រាឲ្យគណបក្សប្រជាជនកម្ពុជាឈ្នះឆ្នោតដោយស្របច្បាប់នោះ តែមហិច្ឆតាគេនៅតែចូលរួមសង្កេតការណ៍ដដែល តែតាមរូបភាពប្រយោល គេចវេសពីការទទួលខុសត្រូវជាផ្លូវការ តែបែរជាធ្វើសកម្មភាពបែបឧទ្ទាមនិយម ដោយចាត់តាំងបណ្តាញសង្កេតការណ៍ក្រៅច្បាប់ ដោយប្រើប្រាស់ឈ្មោះមហាជនមកបិទបាំងពីមុខទៅវិញ ។ នេះបញ្ជាក់ពីឧបាយកលថ្មីទៀតរបស់ពួកបណ្តាញស៊ីឈ្នួលបរទេសដើម្បីបំផ្លាញលទ្ធិប្រជាធិបតេយ្យនៅកម្ពុជា អាលនឹងចោទថានៅកម្ពុជា គ្មានលទ្ធិប្រជាធិបតេយ្យ ដូចពួកគេធ្លាប់លាបពណ៌កន្លងមកស្រាប់ ។ ផ្អែកលើទឡ្ហីករណ៍ខាងលើនេះ គួរតែសមត្ថកិច្ចតាមដាន និងគួរមានវិធានការណ៍សមស្រប កុំឲ្យដង្ហើមនៃបដិវត្តន៍ពណ៌របស់ពួកឈ្លានពានងើបក្បាលរួច និងកុំឲ្យពួកវាបង្កើតអំពើអនាធិបតេយ្យក្នុងសង្គមកម្ពុជាបាន។ដោយៈ សុខ ឥសាន

ព្រះវិហារ: នាយទាហាន នាយទាហានរង និងពលទាហាន ចំនួន៣៨២នាក់ ក្នុងទិសទី១ប្រាសាទប្រាសាទព្រះវិហារ ត្រូវបានបំពាក់ឋានន្តរស័ក្កិជូននៅក្នុងពិធីបិទវគ្គហ្វឹកហ្វឺនបំប៉នជំនាញយុទ្ធវិធីទ័ពព្រៃ ក្រោមអធិបតីភាព ឯកឧត្តម នាយឧត្តមសេនីយ៍ គីម ប៊ុនថាន  អគ្គមេបញ្ជាការរង នៃកងយោធពលខេមរភូមិន្ទ នាព្រឹកថ្ងៃទី១០ ខែកក្កដា ឆ្នាំ២០១៨ ក្នុងអគារមហោស្រប ទីបញ្ជាការកងពលធំអន្តរាគមន៍លេខ៣។