លោក លីម ប៉េងហេង គ្រូជំនួយជម្រើសជាតិរបស់សហព័ន្ធកីឡាវាយសីកម្ពុជា បានបញ្ជាក់ប្រាប់អ្នកយកព័ត៌មានទូរទស្សន៍អប្សរា ក្នុងបទសម្ភាសន៍ នាព្រឹកថ្ងៃទី២១ ខែមេសា ឆ្នាំ២០២២នេះថា ការចូលរួមប្រជែងដណ្តើមមេដាយ ក្នុងព្រឹត្តិការណ៍កីឡាស៊ីហ្គេម លើកទី៣១ នៅប្រទេសវៀតណាម នាអំឡុង ខែ ឧសភា ឆ្នាំ២០២២ខាងមុខនេះ អត្តពលិកជម្រើសជាតិកីឡាវាយសីកម្ពុជា មានសង្ឈឹមខ្ពស់ជាងបណ្តាស៊ីហ្គេមមុនៗ ខណៈការត្រៀមខ្លួនទៅចូលរួមប្រជែងក្នុងព្រឹត្តិការណ៍កម្រិតតំបន់មួយនេះ អត្តពលិកជម្រើសជាតិមានពេលគ្រាប់គ្រាន់ ក្នុងការហ្វឹកហាត់ ពិសេស មានគ្រូចិនជាអ្នកជួយបន្ថែមបច្ចេកទេសផងដែរ។គ្រូជំនួយរូបនេះ អះអាងថា ចាប់តាំងពីអត្តពលិកជម្រើសជាតិប្រមូលផ្តុំហ្វឹកហាត់ នៅជំរុំបិទខ្ទប់ ក្នុងពហុកីឡដ្ឋានមរតកតេជោ ដោយសារតែការពារជំងឺកូវីដ១៩ អត្តពលិកជម្រើសជាតិបានបង្កើនការហ្វឹកហាត់ទ្វេរដងជាមួយនឹងការគោរពវិន័យយ៉ាងខ្ជាប់ខ្ជួន។តាមរយៈការហ្វឹកហាត់ក្នុងជំរុំបិទខ្ទប់នេះ លោក លីម ប៉េងហេង ជឿជាក់ថា អត្តពលិកមានសង្ឈឹម៥០% ស្វែងរកមេដាយបានជូនកម្ពុជា ក្នុងព្រឹត្តិការណ៍កីឡាស៊ីហ្គេម លើកទី៣១ នៅប្រទេសវៀតណាម ។សូមបញ្ជាក់ថា ព្រឹត្តិការណ៍ស៊ីហ្គេម នៅប្រទេសវៀតណាម នាអំឡុង ខែឧសភា ឆ្នាំ២០២២ខាងមុខនេះ សហព័ន្ធកីឡាវាយសីកម្ពុជាបានត្រៀមបញ្ជូនកីឡាករកីឡាការិនីជម្រើសជាតិចូលរួមចំនួន៩រូប កីឡាករ៧រូប និងកីឡាការិនី២រូប ដោយធ្វើការប្រកួតលើ៤វិញ្ញាសា ឯកត្តជនបុរស -ឯកត្តជននារី វាយគូរបុរស-វាយគូនារី វាយចំរុះបុរស-នារី និងវិញ្ញាសាវាយជាក្រុមបុរស- នារី៕…