សៀមរាប៖ ដើម្បីសម្រួលដល់ភ្ញៀវទេសចរដែលនិយមការជិះកង់កម្សាន្តក្នុងរមណីយដ្ឋានអង្គរ អាជ្ញាធរជាតិអប្សរាបានចាប់ផ្តើមសង់ផ្លូវកង់នៅឆ្នាំ២០២០ដែលមានប្រវែងជាង២៣គីឡូម៉ែត្រ ។ក្នុងនោះក៏មានផ្លូវស្ពានឆ្លងស្ទឹងចំនួន៤ទីតាំងផងដែរ។ ក្នុងចំណោមស្ពានផ្លូវកង់ទាំង៤ ស្ពាននៅប្រាសាទតាកែវបានទទួលភាពទាក់ទាញខ្លាំងពីទេសចរ។ ប្រភពអាជ្ញាធរជាតិអប្សរាបានឱ្យដឹងថាស្ពានផ្លូវកង់ប្រាសាទតាកែវ ដែលអាជ្ញាធរជាតិអប្សរាសាងសង់សម្រួលដល់អ្នកជិះកង់ ដោយចង់បែងចែកឱ្យដាច់រវាងផ្លូវឬស្ពានធ្វើដំណើរទូទៅ និងផ្លូវកង់។ ស្ពាននេះមានទទឹង២.៥ម៉ែត្រ និងបណ្ដោយ៦៥ម៉ែត្រ។ ចំណែកស្ពានកង់៣ទីតាំងទៀត រួមមាន ស្ពានអង្គរ ស្ពានក្រាំងក្រូច និងស្ពាននាគព័ន្ធ។ ក្រៅពីនេះ ក៏មានស្ពានខ្នាតតូចឆ្លងកាត់២ទីតាំងទៀត ដូចជាកសិន្ធុយសោធរ និងអតីតទ្វារទឹកនាគព័ន្ធ។ អាជ្ញាធរជាតិអប្សរាបានបញ្ជាក់នៅថ្ងៃទី១៦ ខែមករានេះថា គោលបំណងសំខាន់នៃការបង្កើតផ្លូវកង់ក្នុងរមណីយដ្ឋានអង្គរ គឺការចង់បែងចែកឱ្យដាក់ពីគ្នារវាងផ្លូវ ចរាចរណ៍ធម្មតា និងផ្លូវកង់ ដើម្បីលើកកម្ពស់កីឡាជិះកង់ ការកាត់បន្ថយគ្រោះថ្នាក់នៅលើដងផ្លូវរវាងអ្នកជិះយានយន្ត និងអ្នកជិះកង់ ពិសេសកាត់បន្ថយផ្សែងយានយន្តដែលប៉ះពាល់ដល់ថ្មប្រាសាទ។ ចំពោះរចនាបថនៃការសង់ស្ពានកង់នេះ បានជ្រើសរើសការរៀបចំបែបសាមញ្ញស្រដៀងនឹងធម្មជាតិជុំវិញ ដោយមិនបង្កើតអ្វីដែលថ្មីលេចធ្លោពេកទេ គឺស្របតាមគោលគំនិតរបស់ថ្នាក់ដឹកនាំថា ការអភិរក្សដើរស្របនឹងការអភិវឌ្ឍ។ សូមជម្រាបថា ពេញមួយឆ្នាំ២០២៣ គ្រឹះស្ថានអង្គរបានរកចំណូលពីការលក់សំបុត្រជូនអ្នកទេសចរបរទេសចូលទស្សនារមណីយដ្ឋានអង្គរចំនួនជាង ៣៧លានដុល្លារអាមេរិក ដោយមានកំណើនស្មើនឹងជាង២០០ភាគរយ បើធៀបទៅនឹងឆ្នាំ២០២២៕អត្ថបទៈស៊ាន សុផាត,រូបថតៈអាជ្ញាធរជាតិអប្សរា

ភ្នំពេញ៖ សិក្ខាកាមជាគ្រូឧទ្ទេស និងមន្រ្តីការិយាល័យចំនួន២២រូបរបស់វិទ្យាស្ថានជាតិអប់រំកាយ និងកីឡាបានចូលរួមវគ្គបំប៉ន ពីអង្គការក្រៅរដ្ឋាភិបាល បេះដូងមាស តាមរយៈសិក្ខាសាលា ការផ្ទេរក្រឌីត នៅវិទ្យាស្ថានជាតិអប់រំកាយ និងកីឡា ។ លោក Nishiyama Naoki អគ្គលេខាធិការ នៃអង្គការក្រៅរដ្ឋាភិបាលរ បេះដូងមាស ប្រចាំប្រទេសជប៉ុន បានមានប្រសាសន៍ឱ្យដឹងថា សិក្ខាសាលា ការផ្ទេរក្រឌីត នៅវិទ្យាស្ថានជាតិអប់រំកាយ និងកីឡា ដែលអង្គការក្រៅរដ្ឋាភិបាល បេះមាស បានរៀបចំឡើងរយៈពេល២ថ្ងៃ ក្នុងគោលបំណង បណ្តុះបណ្តាលសិក្ខាកាមឱ្យយល់ដឹងពីនិតិវិធីនៃការដំឡើងគុណវុឌ្ឍិគ្រូបង្រៀនអប់រំកាយដែលមានសញ្ញាបត្រកម្រិតមូលដ្ឋានឱ្យក្លាយជាគ្រូបង្រៀនកម្រិតបរិញ្ញាបត្រ និងព្រៀងនូវសេចក្តីប្រកាស ក៏ដូចជាក្របខណ្ឌកម្មវិធីសិក្សាថ្នាក់បរិញ្ញាបត្រសិល្បៈមនុស្សសាស្ត្រ ឯកទេសអប់រំកាយ ។ លោក អគ្គលេខាធិការ បានគូសបញ្ជាក់ទៀតថា តាមរយៈសិក្ខាសាលានេះ សិក្ខាកាមដែលជាសមាជិកអនុគណៈកម្មការជ្រោមជ្រែងការបញ្ចប់ការសិក្សា បានចងក្រងនូវសេចក្តីព្រៀងប្រកាស ព្រមទាំងក្របខ័ណ្ឌកម្មវិធីសិក្សាដោយមានការពិភាក្សា និងសម្រេចនូវសេចក្តីព្រៀងចុងក្រោយ រួចស្នើបញ្ជូនទៅកាន់ការិយាល័យ និងនាយកដ្ឋានពាក់ព័ន្ធរហូតដល់ឧបនាយករដ្ឋមន្រ្តី ដើម្បីទទួលបានការទទួលស្គាល់ពីក្រសួងអប់រំយុវជននិងកីឡា ។ លោក ដៀន វិបុល ប្រធានការិយាល័យរដ្ឋបាល នៃវិទ្យានជាតិអប់រំកាយ និងកីឡា ដែលជាសិក្ខាកាមមួយរូបបានលើកឡើងថា ឆ្លងកាត់សិក្ខាសាលារយៈពេល២ថ្ងៃ លោកទទួលបាននូវចំណុចសំខាន់ៗធំ២ គឺទី១. ទទួលបានការពិភាក្សាគ្នាស្តីពីការព្រៀងសេចក្តីប្រកាសការដំឡើងគុណវុឌ្ឍិគ្រូបង្រៀនសញ្ញាបត្រកម្រិតមូលដ្ឋានឯកទេសអប់រំកាយ…