អ.ស.ប៖ សមាជិកជាច្រើននៃក្រុមប្រឹក្សាសន្តិសុខអង្គការសហប្រជាជាតិ នៅថ្ងៃទី៨ ខែតុលានេះ បានថ្កោលទោសក្រុមសកម្មប្រយុទ្ធប៉ាឡេស្ទីនហាម៉ាស ចំពោះការវាយលុកដ៏ធំរបស់ខ្លួនប្រឆាំងនឹងអ៊ីស្រាអែល ប៉ុន្តែសហរដ្ឋអាមេរិកមានការសោកស្តាយចំពោះកង្វះការរួបរួមគ្នាឆ្លើយតបនឹងបញ្ហានេះ។ នៅក្នុងសម័យប្រជុំបន្ទាន់មួយនៃក្រុមប្រឹក្សាសន្តិសុខអង្គការសហប្រជាជាតិ សហរដ្ឋអាមេរិកបានជំរុញឱ្យមានការថ្កោលទោសយ៉ាងខ្លាំងក្លាចំពោះពួកអ៊ីស្លាមប៉ាឡេស្ទីន ដែលគ្រប់គ្រងតំបន់ហ្គាហ្សាស្ទ្រីប ដែលបានបើកការវាយប្រហារ និងចាប់ពង្រាត់ដ៏គួរឱ្យភ្ញាក់ផ្អើលមួយកាលពីថ្ងៃសៅរ៍សប្តាហ៍មុន។ អ្នកការទូតជាន់ខ្ពស់អាមេរិក លោក Robert Wood បានប្រាប់អ្នកយកព័ត៌មានបន្ទាប់ពីកិច្ចប្រជុំបិទទ្វារថា មានប្រទេសមួយចំនួនប៉ុណ្ណោះ ដែលបានថ្កោលទោសការវាយប្រហាររបស់ក្រុមហាម៉ាស់ប្រឆាំងនឹងអ៊ីស្រាអែល។ ចំណែកឯកអគ្គរដ្ឋទូតរុស្ស៊ី លោក Vassily Nebenzia បាននិយាយថា សាររបស់ខ្ញុំ គឺបញ្ឈប់ការប្រយុទ្ធគ្នាជាបន្ទាន់ ហើយឆ្ពោះទៅរកបទឈប់បាញ់ និងការចរចាប្រកបដោយអត្ថន័យ ដែលត្រូវបានណែនាំអស់ជាច្រើនទសវត្សរ៍មកហើយ ដោយក្រុមប្រឹក្សាសន្តិសុខ។ ទន្ទឹមគ្នា ក្រុមអ្នកការទូតបានបញ្ជាក់ថា ក្រុមប្រឹក្សាសន្តិសុខមិនបានពិចារណាលើសេចក្តីថ្លែងការណ៍រួមណាមួយឡើយ ប៉ុន្តែសមាជិកដែលដឹកនាំដោយរុស្ស៊ីសង្ឃឹមថា នឹងមានការផ្តោតអារម្មណ៍ទូលំទូលាយទៅលើជម្លោះនេះ ជាជាងការថ្កោលទោសក្រុមហាម៉ាស់៕ ប្រភព៖ AFP ប្រែសម្រួលដោយ៖ ឈឹម ទីណា

យោធាអ៊ីស្រាអែល បាននិយាយថា ទាហាន បានរឹមអូសមកវិញទីតាំង ចំនួន ២២ និងធានាឡើងវិញនូវសន្តិសុខ នៅព្រឹកថ្ងៃអាទិត្យ ប៉ុន្តែ នៅតែបន្តវាយលុករហូតដល់ ៨កន្លែង ទៀត។ ការវាយប្រហារដ៏គួរឱ្យភ្ញាក់ផ្អើលដោយខ្មាន់កាំភ្លើងរាប់រយនាក់ ដែលចេញមកពីក្រុមហាម៉ាស់ ដោយមានការវាយប្រហារដោយគ្រាប់រ៉ុក្កែតយ៉ាងខ្លាំងក្លានោះ តាមសេចក្តីរាយការណ៍ បានសម្លាប់មនុស្សយ៉ាងហោចណាស់ 600 នាក់នៅក្នុងប្រទេសអ៊ីស្រាអែល។ បន្ទាប់មក មានមនុស្សជាង ៣៧០ នាក់ នៅហ្គាហ្សា ត្រូវបានសម្លាប់ក្នុងការវាយប្រហារសងសឹក របស់ អ៊ីស្រាអែលផងដែរ។ បើយោងតាមយោធាអ៊ីស្រាអែល ខ្មាន់កាំភ្លើងប៉ាឡេស្ទីន ៤០០ នាក់ត្រូវបានសម្លាប់ និងរាប់សិបនាក់ទៀត ត្រូវបានចាប់ខ្លួនក្នុងអំឡុងពេលប្រយុទ្ធគ្នាក្នុងប្រទេសអ៊ីស្រាអែល នេះ។ សូមបញ្ចាក់ថា ប្រតិបត្តិការវាយប្រហារ ដ៏ សាហាវ បំផុត របស់កងទ័ព អ៊ីស្រាអែល បានរៀបចំឡើង មិនធ្លាប់មាន ចាប់ តាំងពីសង្រ្គាម Yom Kippur កាលពី ៥០ឆ្នាំមុន បន្ទាប់ពីមានការវាយប្រហារពីក្រុមហាម៉ាស់ ៕ (BBC News)