ករណីពុលស្រាក្នុងខេត្តកំពតបានកើនដល់៧នាក់ហើយ។ អ្នកស្លាប់ទី៧ជាបុរសអាយុ៣៥ឆ្នាំនៃភូមិដូនយ៉យ ឃុំដូនយ៉យ ក្នុងស្រុកឈូក បានស្លាប់កាលពីយប់ថ្ងៃទី២៨កក្កដា។ អាជ្ញាធរបានថ្លែងថាករណីពុលស្រាសក្នុង ខេត្តកំពតរវាងពីថ្ងៃទី២៦ដល់២៨កក្កដា ចំនួនមនុស្សស្លាប់មានសរុប៧នាក់និងដោយឡែកបុរស២រូបទៀត កំពុងស្ថិតក្នុងការជួយសង្គ្រោះជីវិតនៅឡើយទេ។ កម្ពុជាក្នុងឆ្នាំ២០២១នេះ មានមនុស្សប្រមាណ៣០នាក់ហើយ ដែលបានស្លាប់ដោយសារពុលស្រាស និងស្រាថ្នាំ រួមមាននៅខេត្តកណ្តាល, ខេត្តកំពត និងនៅខេត្តព្រៃវែង។  ការពុលស្រាដែលរកឃើញកន្លងមកត្រូវ ក្រុមជំនាញបញ្ជាក់ថាដោយសារតែការបិតស្រាមិនមាន បច្ចេកទេស ត្រឹមត្រូវដោយការបិតស្រាបានលាយ សារធាតុមេតាណុលកម្រិតខ្ពស់ជាង១០ភាគរយដែលធម្មតាគេអនុញ្ញាត ឲ្យមានជាតិមេតាណុលនោះត្រឹមតែ ក្រោម០.២%តែប៉ុណ្ណោះ។

គ្រឿងញៀនប្រមាណជាង៦០គីឡូក្រាម ដែលបង្រ្កាបបានពីបទល្មើសក្នុងខេត្តចំនួន៦ភាគពាយ័ព្យប្រទេស ត្រូវ បានដុតកម្ទេចនៅក្នុងពិធីមួយក្នុងខេត្តបាត់ដំបងនាថ្ងៃទី២៩កក្កដានេះ។ ការដុតកម្ទេចគ្រឿងញៀនប្រមាណ ៦៣ គីឡូក្រាម នៅទីលានបាល់ទាត់ ស្ថិតភូមិរំចេក សង្កាត់រតន: ក្នុងក្រុងបាត់ដំបង បានធ្វើឡើងដោយមានការចូល រួមពីអគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន នាយឧត្តមសេនីយ៍ មាស វិរិទ្ធ។ មន្ត្រីដែលចូលរួម បានបញ្ជាក់ថាគ្រឿងញៀនដែលបានដុតបំផ្លាញចោលនោះ គឺគឺជាគ្រឿងញៀនបង្ក្រាបក្នុងខេត្តបាត់ដំបង, ខេត្ត បន្ទាយមានជ័យ, សៀមរាប, ឧត្តរមានជ័យ, ពោធិសាត់  និងខេត្តប៉ៃលិន។  មន្ត្រីប្រឆាំងគ្រឿងញៀន បានថ្លែង ថាក្នុងរយៈពេល៦ខែ ក្នុងឆ្នាំ២០២១នេះសមត្ថកិច្ចបានប្រតិបត្តិការបង្ក្រាបបទល្មើសគ្រឿងញៀននៅទូទាំងប្រ ទេសបានចំនួនជាង៣ពាន់ករណី ឃាត់ខ្លួនជនសង្ស័យជាង៧ពាន់នាក់ និងចាប់យកគ្រឿងញៀនបានសរុបជាង ៨៥០គីឡូក្រាម៕

ក្តីព្រួយបារម្ភនឹងវីរុសបំប្លែងថ្មី Delta បានប្រញាប់ឲ្យស្នងការដ្ឋាននគរបាលរាជធានី បានដាក់បទបញ្ជាដល់មន្ត្រី នគរបាលក្រោមបង្គាបត្រូវត្រួតពិនិត្យនិងណែនាំអ្នកធ្វើដំណើរតាមថ្នល់ណាដែលមិនបានពាក់ម៉ាស់។ រាជធានី ភ្នំពេញនិងបណ្តាខេត្តទូទាំងប្រទេស បានដាក់បំរាមគោចរសាជាថ្មីនិងដោយឡែកខេត្តដែលជាប់នឹងព្រំដែនថៃ ក៏ត្រូវបានបិទខ្ទប់ការចេញចូលនិងរឹតបន្តឹងការធ្វើសកម្មភាពផងដែរ។

រដ្ឋមន្ត្រីក្រសួងព័ត៌មានបានលើកទឹកចិត្តឲ្យបុគ្គលឲ្យប្តឹងអ្នកសារព័ត៌មានណាដែលគេយល់ថាបានផ្សាយរំលោភ លើសិទ្ធិឯកជនបស់ខ្លួន។ ប្រសាសន៍របស់រដ្ឋមន្ត្រីក្រសួងព័ត៌មាន លោក ខៀវ កញារីទ្ធ បានធ្វើឡើងក្នុងឳកាស ដែលលោកអញ្ជើញជាអធិបតីក្នុងកិច្ចពិភាក្សាសារព័ត៌មានស្តីពីក្រមសីលធម៌តាមកិច្ចប្រជុំ Online ថ្ងៃទី២៩កក្កដា ឆ្នាំ២០២១។ លោករដ្ឋមន្ត្រី ខៀវ កាញារីទ្ធ បានលើកឡើងថា កាលណាបុគ្គលណាយល់ឃើញថាបុគ្គល ឬអង្គ ភាពសារព័ត៌មាននោះ បានផ្សាយបំពានប៉ះពាល់ដល់ជីវិតឯកជនរបស់ខ្លួន ធ្វើឲ្យខ្លួនខាតបង់ ធ្វើឲ្យខ្លួនមានការ អាម៉ាស់ គឺអាចប្តឹងទៅតុលាការផ្ទាល់ដោយខ្លួនឯង ពីព្រោះនោះមិនមែនជាសេរីភាពសារព័ត៌មានទេ ។  ប្រសាសន៍លើកឡើងរបស់រដ្ឋមន្ត្រីក្រសួងព័ត៌មាន បានធ្វើឡើងបន្ទាប់ពីមានការរិះគន់លើអ្នកសារព័ត៌មានគ្មាន វិជ្ជាជីវៈមួយចំនួន ដែលតែងតែប្រើប្រាស់តួនាទីរបស់ខ្លួន ធ្វើការផ្សាយ ឬផ្សាយបន្តផ្ទាល់តាមហ្វេសប៊ុកដែលប៉ះ ពាល់និងរំលោភទៅលើសិទ្ធិឯកជនរបស់អ្នកដទៃដូចជាករណីឈ្លោះគ្នារវាងគូភាគីឬជម្លោះក្នុងគ្រួសារ ជាដើម។ លោករដ្ឋមន្ត្រីក្រសួងព័ត៌មាន បានបញ្ជាក់ថា សព្វថ្ងៃអ្នកកាសែតមួយចំនួនមិនបានរៀនសូត្រវិជ្ជាជីវៈ ត្រឹមត្រូវ នោះទេ។ លោករដ្ឋមន្ត្រីក្រសួងព័ត៌មានបានពន្យល់ទៀតថា កន្លងមកដោយសារច្បាប់សេរីភាពសារព័ត៌ មាន បើកទូលាយពេក ដែលធ្វើឲ្យមានចន្លោះប្រហោងសម្រាប់អ្នកសារព័ត៌មានមិនមានវិជ្ជាជីវៈ និងក្រមសីលធម៌ អាចប្រកបរបរជាអ្នកសារព័ត៌មានបាន។ រដ្ឋមន្ត្រីក្រសួងព័ត៌មានបានសង្កត់ធ្ងន់ថា បើសិនជាមានការទាមទារ ពីស្ថាបន័ និងអ្នកប្រកបវិជ្ជាជីវៈសារព័ត៌មានច្រើន នោះក្រសួងអាចនឹងពិនិត្យមើលលទ្ធភាព ធ្វើវិសោធនកម្មលើ ចំណុចមួយចំនួនដើម្បីរឹតបន្តឹងចំពោះអ្នកដែលធ្វើការជាអ្នកសារព័ត៌មានគ្មានវិជ្ជាជីវៈ។

ខេត្តកោះកុងបានរកឃើញអ្នកឆ្លងថ្មីថ្ងៃនេះចំនួន២៣នាក់។ នេះជាតួលេខឆ្លងកើន២នាក់បើប្រៀបធៀបនឹងម្សិល មិញ។ យោងតាមរដ្ឋបាលខេត្ត ការឆ្លងថ្មី២៣នាក់ថ្ងៃនេះ បានកើតនៅក្រុមខេមរភូមិន្ទ៧នាក់, ស្រុកមណ្ឌលសីមា ៤នាក់, ស្រុកកោះកុង៦នាក់ និងស្រុកគីរីសាគរចំនួន៦នាក់។ ខេត្តកោះកុងថ្ងៃនេះ បានព្យាបាលជាសះស្បើយ អ្នកជម្ងឺកូវីដ១៩បានចំនួន៨៣នាក់។

ខេត្តក្រចេះ បានរកឃើញអ្នកឆ្លងកូវីដ១៩ថ្មីចំនួន៤នាក់ក្នុងរយៈពេល២៤ម៉ោងចុងក្រោយនេះ។ យោងតាមរដ្ឋ បាលខេត្ត អ្នកឆ្លងថ្មីទាំង៤នាក់នោះ គឺជាពលរដ្ឋរស់នៅក្នុងស្រុកព្រែកប្រសព្វម្នាក់, និងស្រុកឆ្លូង៣នាក់។ ខេត្ត ក្រចេះ មានអ្នកឆ្លងកូវីដ១៩សរុប២៨៥នាក់, ព្យាបាលជាសះស្បើយ១៧៩នាក់និងការស្លាប់មានចំនួន៥នាក់។

ខេត្តកំពតបានរកឃើញការឆ្លងថ្មីចំនួន១៧នាក់និងស្លាប់២នាក់នៅថ្ងៃនេះ។ នេះ ជាតួលេខឆ្លង ថយចុះ១៥ នាក់បើប្រៀបធៀប នឹងម្សិលមិញ។ យោងតាមរដ្ឋបាលខេត្តការឆ្លងថ្មីថ្ងៃនេះ រួមមាននៅក្រុងកំពត១៦នាក់ និងម្នាក់ទៀតគឺជាការឆ្លងលើ អ្នកដំណើរមកពីខេត្តកំពង់ស្ពឺ។ ចំណែកអ្នកស្លាប់ថ្មី២នាក់នោះ គឺជាស្ត្រីអាយុ៨២ និង៥៣ឆ្នាំ ដែលរស់នៅក្រុងកំពត។ ខេត្តកំពតមានអ្នកឆ្លងសរុប២ពាន់៩៨៦នាក់, ព្យាបាលជាសះស្បើយ ២ពាន់៦៣២នាក់ និងអ្នកស្លាប់បានកើនដល់៤៥នាក់។

ខេត្តព្រះវិហារ ក្នុងរយៈពេល ២៤ម៉ោង ចុងក្រោយនេះ បានរកឃើញអ្នកឆ្លងជំងឺកូវីដ១៩ ចំនួន ៤នាក់ ដែលជា ចំនួនឆ្លងថយចុះចំនួន ៨នាក់ ធៀបនឹងការរកឃើញកាលពីម្សិលមិញ។ យោងតាមរដ្ឋបាលខេត្ត អ្នកឆ្លងថ្មីនៅ ថ្ងៃនេះ គឺជាពលរដ្ឋរស់នៅក្នុងស្រុកសង្គមថ្មីចំនួនម្នាក់, ស្រុកជ័យសែន ម្នាក់, និងស្រុកជាំក្សាន្ត ចំនួន ២នាក់ ។ ខេត្តព្រះវិហារគិតត្រឹមថ្ងៃនេះ មានអ្នកឆ្លងជំងឺកូវីដ១៩ សរុបចំនួន ៥១១នាក់ ក្នុងនោះមានអ្នកជាសះស្បើយចំនួន ២៩៨នាក់ ក្រោយមានអ្នកជំងឺកូវីដ១៩ បានជាសះស្បើយចំនួន ២៣នាក់ នៅថ្ងៃនេះ និងមានអ្នកស្លាប់ចំនួន ១នាក់៕

ខេត្តឧត្តរមានជ័យ បានបន្តរកឃើញអ្នកឆ្លងជំងឺកូវីដ១៩ចំនួន ២០១នាក់ ថែមទៀតហើយ ក្នុងរយៈពេល ២៤ ម៉ោងចុងក្រោយនេះ ដែលជាតួលេខឆ្លងកើនខ្ពស់ចំនួន១៣នាក់ ប្រៀបធៀបនឹងម្សិលមិញ។ យោងតាមរដ្ឋបាល ខេត្ត ក្នុងចំណោមអ្នកឆ្លងថ្មីទាំងនោះ រួមមាន២០នាក់ ជាករណីឆ្លងនៅក្នុងសហគមន៍ ដែលជាពលរដ្ឋរសនៅក្នុង ស្រុកត្រពាំងប្រាសាទ៨នាក់, ស្រុកអន្លង់វែង ៧នាក់ និងពលរដ្ឋនៅក្នុងក្រុងសំរោង ចំនួន ៥នាក់ ។ ចំណែកអ្នក ឆ្លងថ្មីចំនួន១៨១នាក់ ដទៃទៀតនោះវិញ គឺជាករណីឆ្លងលើពលករដែលទើបត្រឡប់មកពីប្រទេសថៃ និងពលករ ដែលកំពុងធ្វើចត្តាឡីស័ក ។ ខេត្តឧត្តរមានជ័យ គិតរហូតមកទល់នឹងពេលនេះ មានអ្នកឆ្លងជំងឺកូវីដ១៩ បានកើន ដល់ចំនួន៤ពាន់ ៥៦៥នាក់ ដែលក្នុងនោះភាគច្រើនបំផុតជាករណីនាំចូលពីបរទេសដែលមានចំនួន ៤ពាន់ ២៤៩នាក់ ។ ក្នុងចំណោមអ្នកឆ្លងក្នុងខេត្តឧត្តរមានជ័យទាំង៤ពាន់ ៥៦៥នាក់នោះ ការព្យាបាលជាសះស្បើយ មានចំនួន៧២៤នាក់ និងមានអ្នកស្លាប់ចំនួន ៨នាក់ ៕

ខេត្តកំពង់ធំ បានបន្តរកឃើញអ្នកឆ្លងជំងឺកូវីដ១៩ ចំនួន ២៨នាក់ និងមានអ្នកស្លាប់ម្នាក់ថែមទៀត ក្នុងរយៈពេល ២៤ម៉ោង ចុងក្រោយនេះ ។ នេះជាតួលេខឆ្លងកើនខ្ពស់ចំនួន ៨នាក់ ធៀបនឹងម្សិលមិញ ដែលបានរកឃើញ អ្នកឆ្លងចំនួន ២០នាក់ ។ យោងតាមរដ្ឋបាលខេត្ត អ្នកឆ្លងជំងឺកូវីដ១៩ ដែលទើបរកឃើញឆ្លងថ្មីទាំងនោះ គឺជា ពលរដ្ឋមានទីលំនៅក្នុងក្រុងស្ទឹងសែន ចំនួន ៥នាក់, ស្រុកសន្ទុក ៤នាក់, ស្រុកស្ទោង ៤នាក់, ស្រុកកំពង់ស្វាយ ៧នាក់, ស្រុកបារាយណ៍៤នាក់, ស្រុកតាំងគោក ៣នាក់ និងពលរដ្ឋនៅស្រុកប្រាសាទបាល្ល័ង្គចំនួន ម្នាក់ ។ ចំណែកអ្នកស្លាប់ថ្មីម្នាក់ទៀតនោះវិញ គឺជាបុរសជាតិកូរ៉េខាងត្បូងម្នាក់ រស់នៅស្រុកប្រាសាទបាល្ល័ង្គ។ ខេត្តកំពង់ធំ គិតរហូតមកទល់នឹងពេលនេះ មានអ្នកឆ្លងជំងឺកូវីដ១៩ សរុបចំនួន ១ពាន់ ៧៧៨នាក់, ព្យាបាល ជា សះស្បើយចំនួន ១ពាន់១១៨នាក់ និងអ្នកស្លាប់បានកើនដល់ចំនួន ៤០នាក់ ហើយ ៕