កម្ពុជាបានស្នើសមាគមស្ថាប័នរៀបចំការបោះឆ្នោតពិភពលោក ហៅកាត់ថា A-WEB ដើម្បីមកសង្កេតការណ៍បោះឆ្នោតសកលកម្ពុជាក្នងខែកក្កដាឆ្នាំ២០២៣។ សមាជិកគជប លោកឌឹម សុវណ្ណារុំ បានលើកឡើងជុំវិញការអញ្ជើញសមាគមស្ថាប័នរៀបចំការបោះឆ្នោត ពិភពលោកនោះក្នុងឳកាសដែលលោកបានដឹកនាំគណៈប្រតិភូគជប វិលត្រឡប់ មកពីការ ចូលរួមមហាសន្និបាតលើកទី៥ របស់ A-WEB នោះ។

ការពិនិត្យបញ្ជីឈ្មោះ និងការចុះឈ្មោះបោះឆ្នោតថ្មីបានឈានចូលដល់ថ្ងៃទី៥ហើយ ។ សេចក្តីរាយការណ៍បានបង្ហាញថាក្នុងរយៈពេល២៤ម៉ោងចុងក្រោយនេះ ពលរដ្ឋដែលបាន មកចុះបញ្ជីឈ្មោះមានចំនួន ១ម៉ឺន៦ពាន់៨៧៤នាក់ ដែលនាំឲ្យ ចំនួនអ្នកមកចុះឈ្មោះ ៥ថ្ងៃ បន្តបន្ទាប់ជាប់គ្នាមកនេះ បានកើន ដល់ជាង៨ម៉ឺននាក់ហើយ។ ការពិនិត្យបញ្ជីឈ្មោះ និងការ ចុះឈ្មោះបោះឆ្នោតរយៈពេល៥០ថ្ងៃ បានចាប់ផ្តើម តាំងពីថ្ងៃទី ២០ខែតុលា និងគ្រោងបញ្ចប់ នៅថ្ងៃទី៨ខែធ្នូឆ្នាំ២០២២។

កម្ពុជាត្រៀមនឹងកសាងផ្លូវល្បឿនលឿនមួយកន្លែងទៀត ខណៈផ្លូវល្បឿនលឿនលើកដំបូងភ្នំពេញ-ខេត្តព្រះសីហនុ បាននិងកំពុងដាក់សាកល្បងប្រើប្រាស់។ ផ្លូវល្បឿនលឿនទី២ ដែលកម្ពុជានឹងត្រៀមបើកការដ្ឋានសាងសង់នាពេលខាងមុខនេះ គឺផ្លូវល្បឿនលឿនភ្នំពេញ-បាវិត។

សម្តេចតេជោហ៊ុនសែនបានស្ថិតក្នុងខេត្តពោធិ៍សាត់នៅថ្ងៃទី២៥តុលានេះ ដែលជាខេត្តមាន ពលរដ្ឋប្រមាណជាងមួយម៉ឺន៣ពាន់គ្រួសាររងភាពប៉ះពាល់នឹងទឹកជំនន់។

នៅក្នុងខេត្តពោធិ៍សាត់នោះវិញ, ជំនួយនៃស្បៀងអាហាររបស់សម្តេចតេជោហ៊ុនសែន ត្រូវ បានចែកជួនពលរដ្ឋដែលរងគ្រោះដោយសារជំនន់ទឹកភ្លៀងក្នុងស្រុកបាកាន។ ជំនួយជា ស្បៀងដែលបានចែកចាយជួនពលរដ្ឋក្នុងស្រុកបាកាន មានសរុបជាង៨០០គ្រួសារហើយ នៅក្នុងឃុំបឹងបត់កណ្ដោល, ឃុំអូរតាប៉ោង, ឃុំរំលេច, ឃុំមេទឹក និងឃុំស្វាយដូនកែវ ។

ពលរដ្ឋរងគ្រោះដោយជំនន់ទឹកភ្លៀងចំនួន៥០គ្រួសារក្នុងខេត្តកំពង់ឆ្នាំងបានទទួលអំណោយ និងការចុះសាកសួរសុខទុក្ខនៅថ្ងៃទី២៤តុលារតាមរយៈរដ្ឋលេខាធិការក្រសួងបរិស្ថានលោក សាបូ អូស្សាណូ។

សមត្ថកិច្ចកម្ពុជា បន្តទទួលបានបណ្តឹង ១១ទៀត ដែលស្នើឱ្យជួយសង្គ្រោះជនបរទេស ១៦នាក់ ក្នុងរយ:ពេល២៤ម៉ោងកន្លងមកនេះ។ កម្ពុជាកំពុងស្ថិតក្នុងយុទ្ធការបង្ក្រាបអំពើ ជួញ ដូរមនុស្ស ក្រោយមានសេចក្តីរាយការណ៍ថា មានក្រុមទុច្ចរិតដែលមានប្រភពមកពីក្រៅ ប្រទេស បានសហការជាមួយនឹងបក្ខពួកក្នុងប្រទេសកម្ពុជា បង្កនូវអំពើចាប់ បង្ខាំងមនុស្ស ក្រោមរូបភាពល្បួងមកធ្វើការក្នុងប្រទេសកម្ពុជាដោយសន្យាឱ្យកម្រៃពលកម្មច្រើន។