រដ្ឋមន្ត្រីក្រសួងបរិស្ថាន លោក ​សាយ សំអាល់ តាមរយៈហ្វេសប៊ុកផ្លូវការបានបង្ហោះវីឌេអូក្លីបស្តីពីខេត្តរតនៈគិរីដែលជាតំបន់សក្តានុពលផ្នែកធនធានធម្មជាតិ និងទេសចរណ៍។ ជាពិសេសតំបន់អភិរក្សអណ្តូងក្រឡឹង។​ ក្នុងតំបន់អភិរក្សអណ្តូងក្រឡឹងក្នុងខេត្តគឺជាតំបន់សក្តានុពលដែលប្រជុំទៅដោយសត្វព្រៃកម្រជាង៦០ប្រភេទ ជាពិសេសស្វាកន្ទុយសរ និងជម្រំសត្វទោចជាដើម។ ក្នុងសហគមន៍អណ្តូងក្រឡឹងនេះ ក្រៅពីការមើលសត្វកម្រជិតផុតពូជហើយនោះ​តំបន់ទឹកធ្លាក់មិនតិចជាង១០កន្លែងមានភាពស្រស់ស្អាតដែលកំពុងរងចាំភ្ញៀវទេសចរណ៍ប៉ុន្តែពុំសូវមានអ្នកស្គាល់ឡើយ។​ អ្វីដែលសំខាន់នោះគឺ ប្រជាពលរដ្ឋក្នុងសហគមន៍ដែលសុទ្ធសឹងតែជាជនជាតិភាគតិច បានកែប្រែជីវភាពឱ្យកាន់តែប្រសើរតាមរយៈដំណើរកម្សាន្តរបស់ភ្ញៀវទេសចរដែលភាគច្រើនជាជនបរទេស។ នេះគឺជាយុទ្ធសាស្ត្រពង្រីកចំណូលឱ្យពលរដ្ឋ​និងបន្តរក្សាព្រៃឈើ និងសត្វកម្រក៏ដូចជាធនធានធ​ម្មជាតិ៕​

ក្រុមហ៊ុនកសិកម្មហ័ងអាញ់ មានមហិច្ឆតាចង់នាំផ្លែចេកចេញទៅប្រទេសចិនឱ្យបាន៥០ម៉ឺនតោនក្នុងឆ្នាំ២០២០នេះ​ដើម្បីបំពេញតម្រូវការ​ទីផ្សារនិងបង្កើតឱកាសការងារ។ ប្រធានគ្រប់គ្រងទីផ្សារ បញ្ជាក់ថាថា បច្ចុប្បន្នផលិតផលចេករបស់កម្ពុជាមានហាងឆេងខ្ពស់នៅប្រទេសចិនទើបធ្វើឱ្យក្រុមហ៊ុនសម្រេចដាក់ចេញជាយុទ្ធសាស្ត្រពង្រីកការនាំចេញបន្ថែម។ បច្ចុប្បន្ន ក្រុមហ៊ុនមានសមត្ថភាពផលិតនិងនាំចេញចេកតែមួយមុខ បានតែ២៥ម៉ឺនតោនតែប៉ុណ្ណោះក្នុងរយៈពេល១ឆ្នាំ ហើយកំពុងប្រើប្រាស់កម្មករប្រមាណត្រឹម២០០នាក់។ ជាមួយនឹងមហិច្ឆិតានាំចេញ៥០ម៉ឺនតោននេះ ក្រុមហ៊ុន ត្រូវការកម្មករ១ម៉ឺន៥ពាន់នាក់ដើម្បីបម្រើសង្វាក់ផលិតកម្មនិងការដាំដំណាំ ខណៈដែលផ្ទៃដីដាំកើនដល់១ម៉ឺន៨ពាន់ហិកតាដោយចេកអំបូងលឿងចំនួន៧ពាន់ហិកតា ហើយសល់ពីនោះ ក្រុមហ៊ុនកំពុងដាំដំណាំ ស្វាយ ​ក្រូច ស្រកានាគ និងខ្នុរជាដើមដើម្បីនាំចេញព្រោះជាទំនិញមានតម្រូវការក្នុងទីផ្សារចិន និងជប៉ុន។ ក្រុមហ៊ុនគ្រោងដាក់ទុនឱ្យដល់៤០០លានដុល្លារដើម្បីបម្រើមហិច្ឆតានេះ៕​