កៀវ ៖ ប្រទេសអ៊ុយក្រែនកំពុងចុះកិច្ចសន្យាទិញមីស៊ីលស្ទាក់ចាប់របស់សំណាញ់មេឃ Patriot ដែលផលិតដោយសហរដ្ឋអាមេរិកចំនួន ១,០០០ គ្រាប់ ដោយមានជំនួយពីប្រទេសសម្ព័ន្ធមិត្ត និងតាមរយៈកម្ចីពីសហភាពអឺរ៉ុប។ រដ្ឋមន្រ្តីការពារជាតិអ៊ុយក្រែន លោក Yevhenii Khmara នៅថ្ងៃ អង្គារ និយាយថា មីស៊ីលសំណាញ់មេឃដែលបញ្ជាទិញទាំងនេះ ភាគច្រើននឹងត្រូវប្រគល់នៅឆ្នាំបន្តបន្ទាប់ៗ ដូច្នេះអ៊ុយក្រែននៅតែត្រូវការជំនួយបន្ទាន់បន្ថែម ដើម្បីទប់ទល់នឹងការវាយប្រហារតាមអាកាសរបស់រុស្ស៊ី។ លោក Khmara បញ្ជាក់ថា អ៊ុយក្រែនក៏កំពុងស្នើឱ្យប្រទេសលោកខាងលិចផ្តល់ មីស៊ីលសំណាញ់មេឃពីស្តុកដែលមានស្រាប់ ដើម្បីបំពេញតម្រូវការបន្ទាន់ ខណៈកិច្ចសន្យាទិញថ្មីនេះ ត្រូវការពេលវេលាយូរ ដើម្បីផលិត និងដឹកជញ្ជូន។ ទន្ទឹមគ្នា ប្រមុខការពារជាតិអ៊ុយក្រែនរូបនេះ ក៏ទទួលស្គាល់ផងដែរថា ទីក្រុងកៀវក៏កំពុងប្រឈមមុខនឹងកង្វះថវិកាប្រមាណ ២៧០ លានដុល្លារ សម្រាប់ការផ្គត់ផ្គង់យន្តហោះដ្រូន ដែលជាអាវុធយុទ្ធសាស្រ្តសំខាន់មួយក្នុងសង្គ្រាមបច្ចុប្បន្ន។ លោក Khmara អះអាងថា រុស្ស៊ីមិនទាន់អាចសម្រេចបាននូវផលប្រយោជន៍ជាយុទ្ធសាស្ត្រសំខាន់ៗ តាមខ្សែត្រៀមជួរមុខប្រវែង ១,២០០ គីឡូម៉ែត្រនៅឡើយទេ ប៉ុន្តែទីក្រុងមូស្គូកំពុងប៉ះប៉ូវការបរាជ័យនៅលើសមរភូមិ តាមរយៈការប្រព្រឹត្តអំពើភេរវកម្មប្រឆាំងនឹងប្រជាជនអ៊ុយក្រែន។ មកទល់ពេលនេះ ភ្លើងសង្គ្រាមរវាងរុស្ស៊ី និងអ៊ុយក្រែន ដែលឆាបឆេះឡើងក្រោយរុស្ស៊ីបញ្ជូនទ័ពចូលលុកលុយទឹកដីអ៊ុយក្រែន កាលពីខែកុម្ភៈ ឆ្នាំ២០២២ នៅមិនទាន់បង្ហាញសញ្ញារលត់ទៅវិញ ឬលទ្ធផលចាញ់ឈ្នះច្បាស់លាស់នៅឡើយទេ…

កៀវ ៖ យន្តហោះគ្មានមនុស្សបើក Shahed របស់រុស្ស៊ី បានវាយប្រហាររថភ្លើងដឹកអ្នកដំណើរ ដែលចាកចេញពីទីក្រុង Kyiv ទៅកាន់ទីក្រុង Sumy កាលពីថ្ងៃអង្គារ។ នេះបើតាមក្រុមហ៊ុនផ្លូវដែកជាតិអ៊ុយក្រែន។ យោងតាមការបង្ហោះនៅលើបណ្តាញ Telegram របស់ក្រុមហ៊ុនផ្លូវដែកជាតិអ៊ុយក្រែន Ukrzaliznytsia, កងកម្លាំងរុស្ស៊ីបានកំណត់គោលដៅវាយប្រហារលើរថភ្លើងដឹកអ្នកដំណើរមួយខ្សែដែលធ្វើដំណើរពីទីក្រុង Kyiv ទៅកាន់ទីក្រុង Sumy ដោយប្រើប្រាស់យន្តហោះគ្មានមនុស្សបើក ប្រភេទ Shahed ចំនួនពីរគ្រឿង កាលពីថ្ងៃអង្គារ ទី៨ ខែកញ្ញា ប៉ុន្តែ ការជូនដំណឹងជាមុនបានអនុញ្ញាតឱ្យអ្នកដំណើរ និងបុគ្គលិកទាំងអស់ជម្លៀសខ្លួនចេញបានទាន់ពេលវេលា មុនពេលការវាយប្រហារកើតឡើង។ ក្រុមហ៊ុនផ្លូវដែកជាតិអ៊ុយក្រែនអះអាងថា ក្រុមការងារត្រួតពិនិត្យរបស់ក្រុមហ៊ុនបានបញ្ឈប់រថភ្លើងនោះនៅឯស្ថានីយមួយ មុនពេលការវាយប្រហារកើតឡើង។ អ្នកដំណើរទាំងអស់ រួមទាំងបុគ្គលិកបម្រើការលើរថភ្លើង និងអ្នកបើកបរ បានជម្លៀសខ្លួនចេញបានទាន់ពេលវេលា។ លោក Oleksandr Pertsovskyi នាយកប្រតិបត្តិក្រុមហ៊ុន Ukrzaliznytsia បានមានប្រសាសន៍ថា «ការវាយប្រហារដោយចេតនាលើរថភ្លើងដឹកអ្នកដំណើរ គឺជាឧក្រិដ្ឋកម្មសង្គ្រាមដ៏អាក្រក់មួយ» ដោយលោកបានអំពាវនាវឱ្យដៃគូរបស់អ៊ុយក្រែនបង្កើនសម្ពាធលើប្រទេសរុស្ស៊ី។ បើតាម kyivpost, ការវាយប្រហារនេះបានកើតឡើងបន្ទាប់ពីហេតុការណ៍មួយផ្សេងទៀត កាលពីថ្ងៃពុធ ទី២ ខែកញ្ញា នៅពេលដែលយន្តហោះគ្មានមនុស្សបើករបស់រុស្ស៊ីបានវាយប្រហារនៅក្បែររថភ្លើងដឹកអ្នកដំណើរលេខ 53/54…

វ៉ាស៊ីនតោន ៖ ប្រមុខការទូតអាមេរិក លោក Marco Rubio អះអាងកាលពីថ្ងៃអង្គារថា សហរដ្ឋអាមេរិកនឹងបន្តវាយប្រហារលើនាវាដឹកប្រេងរបស់អ៊ីរ៉ង់។ រដ្ឋមន្ត្រីការបរទេសអាមេរិក លោក Marco Rubio បានថ្លែងថា សហរដ្ឋអាមេរិកនឹងបន្តកំណត់គោលដៅវាយប្រហារសងសឹកទៅលើនាវាដឹកប្រេងរបស់អ៊ីរ៉ង់ បន្ទាប់ពីអាជ្ញាធរអាមេរិកបានឱ្យដឹងថា នាវាចំនួន ៥ គ្រឿងត្រូវបានវាយប្រហាររួចហើយ។ លោកបានប្រាប់អ្នកសារព័ត៌មាន ក្នុងអំឡុងពេលបំពេញទស្សនកិច្ច នៅប្រទេសកូឡុំប៊ីថា «អ៊ីរ៉ង់នៅតែបន្តព្យាយាមវាយប្រហារនាវាចម្បាំង របស់សហរដ្ឋអាមេរិក ហើយរាល់ពេលដែលពួកគេធ្វើ ឬ ព្យាយាមធ្វើសកម្មភាពបែបនេះ ពួកគេនឹងត្រូវបាត់បង់នាវាដឹកប្រេង ហើយខ្ញុំគិតថា អ្នកនឹងឃើញហេតុការណ៍បែបនេះកើតឡើងម្តងទៀត នៅថ្ងៃនេះ»។ ការអះអាងនេះ ធ្វើឡើង បន្ទាប់ពីយោធាអាមេរិកបានឱ្យដឹងថា កងកម្លាំងអាមេរិកបានបំផ្លាញនាវាដឹកប្រេងរបស់អ៊ីរ៉ង់ចំនួន ៥ គ្រឿង កាលពីថ្ងៃអង្គារ បន្ទាប់ពីទីក្រុងតេហេរ៉ង់បានបាញ់មីស៊ីលផ្លោង ទៅលើនាវាចម្បាំងអាមេរិកចំនួន ២ លើក ក្នុងរយៈពេលប៉ុន្មានថ្ងៃ ថ្មីៗនេះ។ ទីបញ្ជាការកណ្តាលសហរដ្ឋអាមេរិក ឬ US Central Command បានចេញសេចក្តីថ្លែងការណ៍មួយ ដោយបញ្ជាក់ថា «កងកម្លាំងអាមេរិកបានណែនាំឱ្យនាវិក ចាកចេញពីនាវា មុនពេលនាវាទាំងនោះត្រូវបានវាយប្រហារ និងធ្វើឱ្យលែងអាចដំណើរការបាន»។ សេចក្តីថ្លែងការណ៍ដដែលបានបន្ថែមថា…

ព្រុចសែល ៖ ប្រទេសអឺរ៉ុបចំនួន ១១ និងកាណាដា នៅថ្ងៃ អង្គារ បានប្តេជ្ញាចិត្តរួមគ្នាដាក់កំហិតថ្នាក់ជាតិ និងបម្រាមលើការធ្វើពាណិជ្ជកម្មទំនិញ ដែលមានប្រភពចេញពីក្រុមអ្នកតាំងទីលំនៅជ្រុលនិយមរបស់អ៊ីស្រាអែលនៅតំបន់ West Bank ដែលកាន់កាប់ដោយខុសច្បាប់អន្តរជាតិ។ បើតាម អាណាឌូលូ, ប្រទេសទាំង១២នេះ រួមមាន បារាំង អង់គ្លេស កាណាដា ដាណឺម៉ាក អេស្ប៉ាញ ហ្វាំងឡង់ អៀរឡង់ អ៊ីស្លង់ ន័រវែស ប៉ូឡូញ ព័រទុយហ្គាល់ និងស៊ុយអែត។ យោងតាមសេចក្តីថ្លែងការណ៍រួម, ប្រទេសទាំងនេះបានរិះគន់យ៉ាងចាស់ដៃចំពោះសកម្មភាពរបស់អ៊ីស្រាអែលនៅតំបន់ West Bank ដោយចាត់ទុកថា ការពង្រីកការតាំងទីលំនៅ និងអំពើហិង្សានៅទីនោះ កំពុងដុតបំផ្លាញលទ្ធភាពសម្រេចបាននូវដំណោះស្រាយរដ្ឋពីរ។ ប្រទេសទាំងនេះ ថែមទាំងបានសម្តែងការព្រួយបារម្ភជាពិសេសចំពោះគម្រោងតាំងទីលំនៅ E1 ដែលត្រូវបានចាត់ទុកថា អាចប៉ះពាល់យ៉ាងខ្លាំងដល់ការរក្សាទឹកដីប៉ាឡេស្ទីនឱ្យមានលក្ខខណ្ឌ សម្រាប់បង្កើតរដ្ឋនាពេលអនាគត។ សេចក្តីថ្លែងការណ៍រួម ក៏បានប្រឆាំងយ៉ាងដាច់អហង្ការ ចំពោះការកាត់យកទឹកដីប៉ាឡេស្ទីន និងការបណ្តេញប្រជាជនប៉ាឡេស្ទីនចេញពីទឹកដីកំណើតពួកគេ ព្រមទាំងជំរុញឱ្យអ៊ីស្រាអែលបញ្ឈប់ការពង្រីកការតាំងទីលំនៅ និងសកម្មភាពរដ្ឋបាលស៊ីវិលដែលពាក់ព័ន្ធ។ បន្ថែមលើនេះ ប្រទេសទាំង១២ក៏ទាមទារឱ្យមានការស៊ើបអង្កេត និងផ្តន្ទាទោសតាមច្បាប់ ចំពោះអ្នកតាំងទីលំនៅអ៊ីស្រាអែល ដែលពាក់ព័ន្ធនឹងការបង្កអំពើហិង្សា ក៏ដូចជាស៊ើបអង្កេតការចោទប្រកាន់នានា…

អ.ស.ប ៖ អ្នកនាំពាក្យ ប្រមុខអង្គការសហប្រជាជាតិ កាលពីថ្ងៃអង្គារ បានប្រកាសថ្កោលទោសការវាយប្រហាររបស់ក្រុមប្រដាប់អាវុធហ៊ូធីមកលើប្រទេសអារ៉ាប៊ីសាអូឌីត ដែលបង្កឲ្យតម្លៃប្រេងកាន់តែឡើងថ្លៃខ្លាំង បន្ថែមពីលើសង្គ្រាមរវាងអាមេរិក និងអ៊ីរ៉ង់។ ការថ្កោលទោសនេះ ធ្វើឡើង បន្ទាប់ពីក្រុមឧទ្ទាមហ៊ូធីបានវាយប្រហារ លើហេដ្ឋារចនាសម្ព័ន្ធប្រេង របស់ប្រទេសអារ៉ាប់ប៊ី សាអ៊ូឌីត ដែលបណ្តាលឱ្យមនុស្សជាច្រើននាក់រងរបួស។ លោក Stephane Dujarric មានប្រសាសន៍ថា «យើងថ្កោលទោសការវាយប្រហារឆ្លងព្រំដែនរបស់ក្រុមហ៊ូធី ទៅលើទីតាំងជាច្រើននៅភាគខាងត្បូងប្រទេសអារ៉ាប៊ីសាអូឌីត។ ការវាយប្រហារទាំងនេះបានប៉ះពាល់ដល់ជនស៊ីវិល និងហេដ្ឋារចនាសម្ព័ន្ធថាមពល ហើយជាការពិតណាស់ យើងសម្តែងការព្រួយបារម្ភយ៉ាងខ្លាំងចំពោះសេចក្តីរាយការណ៍អំពីការរងរបួសរបស់ជនស៊ីវិល»។ ជាការកត់សម្គាល់ ហេដ្ឋារចនាសម្ព័ន្ធថាមពលមួយចំនួន ក្នុងប្រទេសអារ៉ាប៊ីសាអូឌីត ត្រូវបានផ្អាក កាលពីថ្ងៃទី៨ ខែកញ្ញានេះ ក្រោយពីមានការវាយប្រហារ ដោយក្រុមហ៊ូធី នៅយេម៉ែន ជាក្រុមដែលមានទំនាក់ទំនងជាមួយអ៊ីរ៉ង់។ ការវាយប្រហារលើប្រទេសនាំចេញប្រេងធំបំផុតលើលោកមួយនេះបានបណ្តាលឱ្យមនុស្ស ៧៣ នាក់រងរបួស ហើយត្រូវបានអាជ្ញាធរអារ៉ាប៊ី សាអូឌីត ចាត់ទុកថា ជាការកើនឡើងនៃភាពតានតឹងដ៏គ្រោះថ្នាក់។ ជាក់ស្តែង តម្លៃប្រេង កាលពីថ្ងៃអង្គារនេះ បានឡើងដល់កម្រិតខ្ពស់បំផុត មិនធ្លាប់មាន ក្នុងរយៈពេលជាច្រើនសប្តាហ៍ ពោលគឺបន្ទាប់ពីក្រុមប្រដាប់អាវុធ ហ៊ូធី បានវាយប្រហារលើហេដ្ឋារចនាសម្ព័ន្ធថាមពល របស់អារ៉ាប៊ី សាអូឌីត ដែលជាប្រទេសនាំចេញប្រេងធំជាងគេបំផុត…

តេហេរ៉ង់, សេអ៊ូល៖ ប្រទេសអ៊ីរ៉ង់ បានប្រកាសព្រមានកូរ៉េខាងត្បូង ជួបផលវិបាកធ្ងន់ធ្ងរ និង ផ្លាស់ប្តូរពីមិត្តល្អនឹងគ្នា រយៈពេល៦៤ឆ្នាំ មកជាប្រទេសគាំទ្រដល់ការឈ្លានពានអាមេរិក ប្រសិនទីក្រុងសេអ៊ូលហ៊ានតែបញ្ជូនកម្លាំងយោធាទៅបំពេញបេសកម្មនៅច្រកសមុទ្រហ័រមូសដ៏ចម្រូងចម្រាស់ តាមការដាក់សំពាធរបស់លោកប្រធានាធិបតី ដូណាល់ ត្រាំ ។ លោក Esmaeil Baqaei អ្នកនាំពាក្យក្រសួងការបរទេសអ៊ីរ៉ង់ បានសរសេរនៅលើបណ្តាញសង្គម X ជាភាសាកូរ៉េ កាលពីថ្ងៃចន្ទថា «ទំនាក់ទំនងរវាងអ៊ីរ៉ង់ និងសាធារណរដ្ឋកូរ៉េ មានរយៈពេលជាង ៦៤ ឆ្នាំមកហើយ ហើយតែងតែផ្អែកលើការគោរពគ្នាទៅវិញទៅមក។ អ៊ីរ៉ង់ផ្តល់តម្លៃយ៉ាងខ្លាំងចំពោះទំនាក់ទំនងមិត្តភាពជាមួយសាធារណរដ្ឋកូរ៉េ»។ លោក Baqaei បានសរសេរបន្តថា «ទោះជាយ៉ាងណាក៏ដោយ វាច្បាស់ណាស់ថា នៅក្នុងស្ថានភាពបច្ចុប្បន្ន រាល់ការចូលរួមក្នុងប្រតិបត្តិការ ឬ វត្តមានយោធាដោយភាគីផ្សេងទៀត នៅក្នុងឈូងសមុទ្រពែរ្ស និងច្រកសមុទ្រហ័រមូស នឹងត្រូវបានចាត់ទុកថា ជាការគាំទ្រដោយផ្ទាល់ដល់អ្នកឈ្លានពាន ហើយនឹងបង្កឱ្យមានផលវិបាកធ្ងន់ធ្ងរ»។ លោកបានបន្ថែមថា «គ្មានរដ្ឋាភិបាលដែលមានអធិបតេយ្យភាព និងការទទួលខុសត្រូវណាមួយគួរតែចុះចាញ់នឹងអ្វីដែលលោកបានពណ៌នាថា ជាសម្ពាធ និងការគំរាមកំហែង របស់សហរដ្ឋអាមេរិក ដើម្បីចូលរួមក្នុងសកម្មភាពឈ្លានពានប្រឆាំងនឹងអ៊ីរ៉ង់នោះទេ។ បើតាម koreatimes, ការបង្ហោះនេះត្រូវបានគេមើលឃើញថា ជាសារផ្ទាល់ទៅកាន់ទីក្រុងសេអ៊ូល ដោយសង្កត់ធ្ងន់លើទំនាក់ទំនងដ៏យូរអង្វែងរវាងប្រទេសទាំងពីរ…

កៀវ ៖ ប្រធានាធិបតីអ៊ុយក្រែន លោក Volodymyr Zelensky បានប្រកាសនៅថ្ងៃ អង្គារ ថា អ្នកចរចាមកពីអ៊ុយក្រែន រុស្ស៊ី និងសហរដ្ឋអាមេរិក អាចនឹងជួបប្រជុំគ្នាយ៉ាងឆាប់បំផុតនៅក្នុងខែកញ្ញានេះតែម្តង ដើម្បីពិភាក្សាអំពីការស្វែងរកដំណោះស្រាយបញ្ចប់សង្គ្រាម។ ការអះអាងនេះ ធ្វើឡើងប៉ុន្មានម៉ោងបន្ទាប់ពីរុស្ស៊ីបានបើកការវាយប្រហារយ៉ាងចាស់ដៃលើទីក្រុងកៀវ ដោយប្រើប្រាស់មីស៊ីល និងយន្តហោះដ្រូន។ អាជ្ញាធរអ៊ុយក្រែនឱ្យដឹងថា ការវាយប្រហារពេញមួយយប់នេះ បានសម្លាប់ជីវិតមនុស្សចំនួន ៣ នាក់ស្លាប់ និងបង្កឱ្យមានអគ្គិភ័យជាច្រើនកន្លែង។ យ៉ាងណា លោក Zelensky សង្កត់ធ្ងន់ថា ទីក្រុងកៀវកំពុងព្យាយាមជំរុញឱ្យមាន កិច្ចប្រជុំត្រីភាគីរវាងអ៊ុយក្រែន រុស្ស៊ី និងសហរដ្ឋអាមេរិក ហើយលោកសង្ឃឹមថា ការចរចាដោយផ្ទាល់រវាងទីក្រុងមូស្គូ និងទីក្រុងកៀវ អាចត្រូវបានស្តារឡើងវិញនៅប៉ុន្មានសប្តាហ៍ខាងមុខទៀត។ ទោះបីជាពុំទាន់មានរបកគំហើញភ្លាមៗ ក្នុងការខិតខំប្រឹងប្រែងបញ្ចប់សង្គ្រាមដ៏ធំបំផុតនៅទ្វីបអឺរ៉ុប ចាប់តាំងពីសង្គ្រាមលោកលើកទី២ក៏ដោយ តែមេដឹកនាំអ៊ុយក្រែនរូបនេះ និយាយថា ប្រសិនបើគ្រប់ភាគីយល់ព្រម កិច្ចប្រជុំនេះអាចធ្វើឡើងក្នុងខែកញ្ញានេះតែម្តង ដោយលោកសង្កត់ធ្ងន់ថា “កាន់តែឆាប់ កាន់តែល្អ”។ គួរបញ្ជាក់ថា ការចរចាជាច្រើនជុំកន្លងទៅ មិនអាចធ្វើឱ្យរុស្ស៊ី និងអ៊ុយក្រែនឈានដល់ដំណោះស្រាយបញ្ចប់សង្គ្រាមជាផ្លូវការបានទេ ខណៈដែលទំនុកចិត្តរវាងភាគីជម្លោះទាំងពីរនៅមានកម្រិតទាប ហើយមិនទាន់មានសញ្ញាច្បាស់លាស់ថា ភាគីណាមួយបានផ្លាស់ប្តូរជំហររបស់ខ្លួនឡើយ៕ ប្រភព ៖…

ប៉េកាំង ៖ រដ្ឋមន្ត្រីការបរទេសចិន លោក វ៉ាង យី នៅថ្ងៃ អង្គារ បានបញ្ជាក់ច្បាស់ៗថា សម្ពាធយោធាមិនមែនជាដំណោះស្រាយអាចឈានដល់ការបញ្ចប់ជម្លោះរវាងសហរដ្ឋអាមេរិក និងអ៊ីរ៉ង់បានឡើយ ផ្ទុយទៅវិញ មានតែការចរចាដោយសន្តិវិធីប៉ុណ្ណោះ។ លោក វ៉ាង បានអះអាងបែបនេះ ក្នុងជំនួបជាមួយនាយករដ្ឋមន្ត្រី និងជារដ្ឋមន្ត្រីការបរទេសកាតា លោក អាប់ឌុលរ៉ាម៉ាន់ អាល់ ថានី នៅទីក្រុងប៉េកាំង នេះបើតាមសេចក្តីថ្លែងការណ៍របស់ក្រសួងការបរទេសចិន។ ផ្អែកតាម អាណាឌូលូ, ប្រមុខការទូតទាំងពីរបានពិភាក្សាអំពីស្ថានការណ៍នៅមជ្ឈិមបូព៌ា និងតំបន់ឈូងសមុទ្រ ដោយលោក វ៉ាង និយាយថា កំពុងប៉ះពាល់យ៉ាងធ្ងន់ធ្ងរដល់សន្តិសុខតំបន់ និងបន្តរំខានដល់លំហូរថាមពល ការដឹកជញ្ជូនតាមផ្លូវសមុទ្រ និងស្ថិរភាពនៃខ្សែច្រវាក់ផ្គត់ផ្គង់ពិភពលោក។ លោក វ៉ាង បន្ថែមថា ការសន្ទនា និងការចរចា គឺជាច្រកចេញតែមួយគត់ដែលអាចបញ្ចប់សង្គ្រាមបាន ដោយលោកសង្កត់ធ្ងន់ថា អធិបតេយ្យភាព និងសន្តិសុខរបស់ប្រទេសទាំងអស់នៅក្នុងតំបន់ គួរតែត្រូវបានគោរពយ៉ាងពេញលេញ។ លោកថា កង្វល់ស្របច្បាប់របស់ភាគីទាំងអស់ គួរតែត្រូវបានដោះស្រាយឱ្យបានសមស្រប ហើយគោលការណ៍គ្រឹះនៃច្បាប់អន្តរជាតិ និងបទដ្ឋានដែលគ្រប់គ្រងទំនាក់ទំនងអន្តរជាតិក៏គួរតែត្រូវបានប្រកាន់ខ្ជាប់។ ប្រមុខការទូតកំពូលចិនរូបនេះ សង្កត់ធ្ងន់ថា ទីក្រុងប៉េកាំងនឹងធ្វើការដើម្បីស្តារសន្តិភាព និងស្ថិរភាពតំបន់ឡើងវិញឱ្យបានឆាប់តាមដែលអាចធ្វើទៅបាន ក៏ដូចជាបង្កើតរចនាសម្ព័ន្ធសន្តិសុខតំបន់ថ្មីមួយ…