កម្ពុជាបានរំកិលថ្ងៃសម្ពោធពហុកីឡាដ្ឋានមរតកជាតិពីថ្ងៃទី២០ធ្នូមកថ្ងៃទី១៨ធ្នូវិញដែលពិធីសម្ពោធចំថ្ងៃសៅរ៍ សប្តាហ៍ក្រោយនោះ នឹងអញ្ជើញចូលរួមដោយសម្តេចនាយករដ្ឋមន្ត្រី ហ៊ុន សែន។

នៅតែប៉ុន្មានថ្ងៃទៀតតែប៉ុណ្ណោះ គឺជាថ្ងៃដែលកម្ពុជា នឹងប្រារព្ធខួបនៃទិវានយោបាយឈ្នះ ឈ្នះ របស់សម្តេចតេជោហ៊ុនសែន បំបាត់សង្គ្រាមស៊ីវិលទាំងស្រុងក្នុងប្រទេសកម្ពុជា ។

អាវរងារនិងគ្រឿងឧបភោគបរិភោគជាច្រើនដែលជាអំណោយរបស់កាកបាទក្រហមកម្ពុជា ត្រូវបានចែកជួន ដល់ពលរដ្ឋចាស់ជរាក្នុងស្រុកស្នួលនៃខេត្តក្រចេះនៅថ្ងៃទី៨ធ្នូនេះ។ ខេត្តក្រចេះដែលស្ថិតក្នុងតំបន់ខ្ពង់រាប ឥសានគឺជាតំបន់មួយដែលការព្យាករណ៍ឧតុនិយមក្រសួងធនធានទឹក បានឳ្យដឹងថាសីតុណ្ហភាពត្រជាក់អប្ប បរមានឹងមានរវាងពី ១៧ទៅ២០ អង្សាសេ៕

ចំការអំពៅទំហំប្រមាណជាង ១២០ហិកតា របស់ក្រុមហ៊ុនផលិតស្កសរមួយកន្លែងនៅស្រុកសំបូរ ខេត្តក្រចេះ បានរងនឹងភ្លើងឆាបឆេះអស់ជាច្រើន។ សមត្ថកិច្ចបានថ្លែងថាចំការអំពៅដែលភ្លើងបានឆេះកាលពីថ្ងៃទី ៧ធ្នូ កន្លងមកនេះ គឺជាអតីតក្រុមហ៊ុនឥណ្ឌាឈ្មោះ កាមាដឺនូ ដែលបច្ចុប្បន្នគ្រប់គ្រងដោយម្ចាស់ជាតិវៀតណាម។ 

ផ្លូវរត់អត្តពលកម្មនៃជំនួយរបស់ប្រទេសជប៉ុនតម្លៃប្រមាណ៩ម៉ឺនដុល្លារអាមេរិក រួមនិងអាងហែលទឹក អគារ លំហាត់ប្រាណ ត្រូវបានប្រគល់ជូនដល់វិទ្យាស្ថានជាតិអប់រំកាយ និងកីឡាកម្ពុជា។ ពិធីប្រគល់និងទទួលបាន ធ្វើនៅថ្ងៃទី៨ធ្នូនេះក្រោមវត្តមានរបស់រដ្ឋមន្ត្រីក្រសួងអប់រំ យុវជន និងកីឡា បណ្ឌិតសភាចារ្យ ហង់ជួន ណារ៉ុន និងឯកអគ្គរាជទូតជប៉ុនប្រចាំកម្ពុជាលោក MIKAMI Masahiro។

សមត្ថកិច្ចរាជធានីភ្នំពេញ បានបង្ហាញករណីបង្ក្រាបគ្រឿងញៀនក្នុងរយៈពេល១ខែដែលមានការចាប់ខ្លួន ជនសង្ស័យ១២៤នាក់ក្នុងបទល្មើសគ្រឿងញៀន៧១លើក។

កម្ពុជា និងធនាគារអភិវឌ្ឍន៍អាស៊ី បានចុះហត្ថលេខាលើកញ្ចប់ហិរញ្ញប្បទានជាង៣៣២លានដុល្លារអាមេរិក ដើម្បីបង្កើនការងើបឡើងវិញនៃសេដ្ឋកិច្ចប្រកបដោយនិរន្តរភាព។ កម្ពុជាបានបើកប្រទេសសាឡើងវិញចាប់ពី ដើមខែវិច្ឆិកា និងតួលេខឆ្លងកូវីដ១៩ក្នុងប្រទេសបា​នបន្តធ្លាក់ចុះជាលំដាប់ក្រោមនយោបាយចាក់វ៉ាក់សាំងនៅ ទូទាំងប្រទេសដែលគិតមកទល់ថ្ងៃទី៨ធ្នូនេះ បានសម្រេចជិត៩០ភាគរយហើយ។

ចំនួនសរុបចាក់វ៉ាកសាំងលើប្រជាពលរដ្ឋទូទាំងប្រទេសគិតត្រឹមថ្ងៃទី០៨ ខែធ្នូ បានកើនដល់១៤លាន១សែន៨ ម៉ឺន៣ពាន់៦៤៣នាក់ហើយ បន្ទាប់ពីតួលេខចាក់វ៉ាក់សាំង២៤ម៉ោងចុងក្រោយនេះ មានចំនួន៦ពាន់៣៦១នាក់។

តួលេខឆ្លងជំងឺកូវីដ១៩ក្នុងប្រទេសកម្ពុជា ក្នុងរយៈពេល២៤ម៉ោងចុងក្រោយនេះមានចំនួន១៤ករណីជាដដែល បើប្រៀបធៀបនឹងម្សិលមិញ។ យោងតាមក្រសួងសុខាភិបាល ក្នុងចំណោមការឆ្លងថ្មីចំនួន១៤ករណីនោះ ការ ឆ្លង ក្នុងសហគមន៍ មានចំនួន១២ករណី និងការឆ្លងមកពីក្រៅប្រទេសមានចំនួន២ករណីផងដែរ។