មនុស្សយ៉ាងហោច២៦នាក់បានស្លាប់និងរងរបួស ដោយសារមីននិងរងគ្រោះដោយសំណល់ជាតិផ្ទុះពី សង្គ្រាមរយៈពេល៦ខែដើមឆ្នាំ២០២១នេះ។ របាយការណ៍របស់ប្រព័ន្ធព័ត៌មានជនរងគ្រោះដោយសារមីន និង សំណល់ជាតិ ផ្ទុះពីសង្គ្រាមនៅកម្ពុជា CMVIS បានឲ្យដឹងថារវាងពីខែមករា ដល់ខែមិថុនា ឆ្នាំ២០២១ ឧប្បត្តិហេតុ គ្រោះថ្នាក់ ដោយសារមីន និងសំណល់ជាតិផ្ទុះពីសង្គ្រាម មានចំនួន ២២លើក ដែលបានបណ្តាលឲ្យមានប្រជាពលរដ្ឋស្លាប់ និងរបួសសរុបចំនួន ២៦នាក់។

ស្នងការដ្ឋាននគរបាលជាតិ បានបន្តពង្រឹងវិធានការពួនស្ទាក់និងការបង្ក្រាបបទល្មើសឧក្រិដ្ឋនានា ក្រោយបទ ល្មើសនានា ត្រូវបានសមត្ថកិច្ចរាជធានីធ្វើការបង្ក្រាបជាបន្តបន្ទាប់។ លោកសម វិច្ឆិកា មានសេចក្តីរាយការណ៍ ជុំវិញបញ្ហានេះពីស្នងការដ្ឋាននគរបាលរាជធានីភ្នំពេញ ។

សហរដ្ឋអាមេរិក បានបន្តដាក់កម្ពុជាក្នុងចំណាត់ Tier Two Watch list ក្នុងកិច្ចការប្រយុទ្ធប្រឆាំងអំពើជួញដូរ មនុស្សក្នុងឆ្នាំ២០២១នេះ ដែលជាចំណាត់ថ្នាក់កម្រិតទាបរយៈពេល៣ឆ្នាំជាប់ៗគ្នាកន្លងមកនេះ។ សេចក្តីប្រកាសដាក់ចំណាត់ថ្នាក់ទាបចំពោះកម្ពុជាក្នុងកិច្ចប្រឹងប្រែងការបង្ក្រាបអំពើជួញដូរមនុស្ស បានបញ្ជាក់ ក្នុងសេចក្តីប្រកាសមួយសរសេរក្នុងបណ្តាញសង្គមជាផ្លូវការរបស់ស្ថានទូតប្រចាំព្រះរាជាណាចក្រកម្ពុជា នៅថ្ងៃ នេះ។

ក្រសួងប្រៃសណីយ៍ បានប្រកាសដាក់លក់ឧបករណ៍តេស្តរហ័សអង់ទីហ្សែនកូវីដ-១៩ បន្ទាប់ពីមានប្រសាសន៍ ណែនាំរបស់ប្រមុខរាជរដ្ឋាភិបាលម្សិលមិញដែលអនុញ្ញាតឲ្យស្ថាប័នរដ្ឋ និងឯកជន ប្រើប្រាស់តេស្តរហ័សដោយ ខ្លួនឯងក្នុងការស្វែងរកមេរោគកូវីដ១៩លើមន្ត្រី និងបុគ្គលិករបស់ខ្លួន ដើម្បីការបង្កា ទប់ស្កាត់ជំងឺកូវីដ១៩បាន ទាន់ពេលវេលា។ យោងតាមក្រសួងប្រៃសណីយ៍និងទូរគមនាគមន៍ឧបករណ៍តេស្តរហ័សអង់ទីហ្សែនកូវីដ-១៩ ត្រូវបានក្រសួងនាំចូលពីប្រទេសកូរ៉េ ដើម្បីចែកចាយបន្តក្នុងតម្លៃដើម ៣ដុល្លារ៧សេន ក្នុងមួយឧបករណ៍។ ក្រសួងបញ្ជាក់ថាឧបករណ៍តេស្តរហ័សនោះ នឹងត្រូវលក់ជូនក្នុងគោលដៅយកទៅប្រើប្រាស់តែប៉ុណ្ណោះ ដោយ មិនត្រូវយកទៅលក់បន្តឡើយ។