ការដោះដូរពាណិជ្ជកម្មរវាងកម្ពុជាជាមួយនឹងទីផ្សារអន្តរជាតិក្នុងរយៈពេល៤ខែដើមឆ្នាំនេះ មានទំហំទឹកប្រាក់ជាង១ម៉ឺន៧ពាន់ ៦០០លានដុល្លារ ។ យោងតាមអគ្គនាយកដ្ឋានគយ, ទំហំ ដោះដូរពាណិជ្ជកម្មនេះ បានកើនឡើងជាង ២ពាន់៣រយលានដុល្លារ ធៀបនឹង៤ខែឆ្នាំ២០២១ ក្នុងនោះទំហំនៃការនាំចេញមានទឹកប្រាក់ ៧ពាន់៦០០លានដុល្លារ ដែលកើនឡើង៣២.១% និងទំហំនៃការនាំចូល មានទឹកប្រាក់១០ពាន់លានដុល្លារ ដែលកើនឡើង៥.៤%។

សង្គ្រាមឈ្លានពានក្នុងប្រទេសអ៊ុយក្រែន បានឈានចូលដល់ថ្ងៃទី៨៣ខណៈពិភពលោកនា ពេលនេះ បានចាប់អារម្មណ៍ខ្លាំងលើជោគវាសនានៃទាហានអ៊ុយក្រែនក្រោយការដាក់អាវុធ ប្រគល់ខ្លួនចុះចាញ់នាតំបន់ រោងចក្រស្លដែក Azovstal ក្នុងក្រុងម៉ារីយូប៉ូល។

មន្ត្រីនាំពាក្យស្ថានទូតអាមេរិកប្រចាំកម្ពុជាត្រូវបានកាសែតក្នុងស្រុកបានដាក់សំណួរចំនួន ២ ដើម្បីឱ្យមន្ត្រីទូតបកស្រាយជុំវិញនូវហេតុការណ៍ដែលមានការប៉ុនប៉ងប្រើហិង្សាដាក់មកលើ នាយករដ្ឋមន្ត្រីខ្មែរសម្តេចតេជោ ហ៊ុន សែន ។ មន្ត្រីស្ថានទូតអាមេរិក បានផ្តល់ចម្លើយបីមកវិញ ប៉ុន្តែក្នុងចម្លើយទាំងនោះ គ្មានចម្លើយណាដែលឆ្លើយតបនឹងសំណួរទាំង២របស់កាសែតក្នុង ស្រុកឡើយ។

មេបញ្ជាការកងទ័ពជើងគោក នៃកងយោធពលខេមរភូមិន្ទ លោកឧត្តមសេនីយ៍ឯក ហ៊ុន ម៉ាណែត បានទទួលជួបពិភាក្សាការងារជាមួយឯកអគ្គរដ្ឋទូតសហព័ន្ធរុស្ស៊ី ប្រចាំនៅកម្ពុជា ដែលជំនួបនេះ បានកើតឡើងជាលើកដំបូង ចាប់តាំងពីមានអំពើឈ្លានពានរបស់ទាហានរុស្ស៊ី ក្នុងទឹកដីប្រទេសអ៊ុយក្រែន។ 

កម្ពុជាដែលបានឈានចូលរដូវវស្សាក្នុងសប្តាហ៍នេះ នឹងទទួលការធ្លាក់ភ្លៀងរាយប៉ាយ តាម បណ្តាខេត្តទូទាំងប្រទេសខណៈរងឥទ្ធិពលពីជ្រលងសម្ពាធទាបឥណ្ឌាក្នុងកម្រិតមធ្យម និងរង ខ្យល់មូសុងនីរតីក្នុងកម្រិតពីបង្គួរទៅខ្លាំងថែមទៀត ។

ជនសង្ស័យចោរប្លន់ម៉ូតូប្រដាប់អាវុធម្នាក់ ត្រូវនគរបាល រាជធានីភ្នំពេញ បង្រ្កាបបានក្រោយ ការធ្វើសកម្មភាពប្លន់ម៉ូតូ ក្នុងភូមិដំណាក់ធំ៣ សង្កាត់ស្ទឹងមានជ័យ នៃខណ្ឌមានជ័យ។ សមត្ថកិច្ចកំពុងបន្តតាមចាប់បក្ខពួក៣នាក់ទៀត។

គ្រោះថ្នាក់ចរាចរណ៍មួយក្នុងស្រុកឆែប ខេត្តព្រះវិហារ នៅថ្ងៃទី១៧ឧសភានេះ បានសម្លាប់ ឳពុកម្តាយតារាចម្រៀងកញ្ញា សុវត្ថិឌី ធារិកា។ យោងតាមស្នងការនគរបាលខេត្តព្រះវិហារ លោកឧត្តមសេនីយ៍ទោ សួស សុខដារ៉ា មនុស្សចំនួន៥នាក់ក្នុងរថយន្តមួយគ្រឿង បានក្រឡាប់ចូលក្នុងប្រឡាយទឹក ខណៈកំពុងធ្វើដំណើរមករាជធានីភ្នំពេញបន្ទាប់ពីបាន ចូលរួមកម្មវិធីសម្ពោធមួយនៅក្នុង ស្រុកឆែប ខេត្តព្រះវិហារនោះ។

តួលេខឆ្លងកូវីដ១៩ ក្នុងប្រទេសអាស៊ាន ក្នុងរយៈពេល ២៤ម៉ោងចុងក្រោយនេះ មានចំនួន ៩ពាន់ ៩៥៤ករណី និងការស្លាប់ថ្មីមានចំនួន ៥៥នាក់ ។ តួលេខឆ្លងនៅថ្ងៃនេះ មានការថយ ចុះចំនួន ២ពាន់ ៤៨៧ករណី ប៉ុន្តែការស្លាប់មានការកើនឡើងចំនួន ៣នាក់ បើប្រៀបធៀប នឹងម្សិលមិញ ។ ប្រទេសថៃ គឺជាប្រទេសដែលមានតួលេខឆ្លងច្រើនជាងគេដដែលថ្ងៃនេះ។ ដោយឡែកប្រទេសកម្ពុជា គឺជាប្រទេសដែលមិនមានករណីឆ្លងថ្មីនោះឡើយ ។

កម្ពុជាបានបន្តសម្រុកការចាក់វ៉ាក់សាំងបើទោះបីជាកម្ពុជាគ្មានការឆ្លងកូវីដ១៩ រយៈពេល ១០ថ្ងៃជាប់គ្នាមកនេះក៏ដោយ។ យោងតាមក្រសួងសុខាភិបាល តួលេខអ្នកចាក់វ៉ាក់សាំង ដូសមូលដ្ឋានទូទាំងប្រទេសគិតត្រឹមថ្ងៃនេះ បានកើនដល់ចំនួន ១៥លាន ៦ពាន់ ៤៦នាក់ ដែលស្មើនឹង ៩៣,៧៩ភាគរយ ។

តួលេខអ្នកឆ្លងជំងឺកូវីដ១៩ក្នុងប្រទេសកម្ពុជារយៈពេល២៤ម៉ោងនេះ បានស្ថិតក្នុងចំណុច សូន្យជាដដែល ដែលនាំឱ្យការមិនឆ្លងសោះមានចំនួន១០ថ្ងៃជាប់គ្នាជាបន្តបន្ទាប់។ សម្តេច តេជោ ហ៊ុន សែន បានថ្លែងនៅថ្ងៃនេះថា បើទោះបីជាតួលេខឆ្លងក្នុងប្រទេសកម្ពុជាបានស្ថិត ក្នុងកម្រិតសូន្យក្តី ក៏គេនឹងត្រូវរៀបចំបង្កើតមន្ទីរពេទ្យដ៏ធំមួយដើម្បី ត្រៀមសម្រាប់ទៅថ្ងៃ អនាគត ដើម្បីចៀសវាងការយកកន្លែងផ្សេងៗ ធ្វើជាមណ្ឌលចត្តាឡីស័កឬជាកន្លែងព្យាបាល។