សាខាគណបក្សប្រជាជនកម្ពុជាក្នុងខេត្តកំពង់ចាម ទទួលបានសមាជិកថ្មីចំនួនជិត១ពាន់៥០០ នាក់បន្ថែមទៀតខណៈការបោះឆ្នោតឃុំនិងសង្កាត់កាន់តែឈានជិតមកដល់នាពេលខាងមុខនេះ។

គណៈកម្មាធិការជាតិរៀបចំការបោះឆ្នោត បានអំពាវនាវឲ្យប្រជាពលរដ្ឋត្រូវត្រៀមលក្ខណៈ សម្បត្តិឱ្យបានរួចរាល់ដើម្បីចូលរួមការបោះឆ្នោតឃុំនិងសង្កាត់ដែលនឹងមកដល់រយៈពេល ២០ថ្ងៃទៀតតែប៉ុណ្ណោះ។

រដ្ឋមន្ត្រីការបរទេសកម្ពុជា និងរដ្ឋមន្ត្រីការបរទេសសហរដ្ឋអាមេរិក បានពិភាក្សាលើបញ្ហាជា ច្រើនដើម្បីការផ្តល់ជំនឿទុកចិត្តគ្នាទៅវិញទៅមក បន្ទាប់ពីការយល់ច្រឡំខ្លះដោយរដ្ឋាភិបាល ក្រុងវ៉ាស៊ីនតោននាពេលកន្លងមកនេះ។ កិច្ចពិភាក្សាគ្នារវាងលោក ប្រាក់ សុខុន និងលោក អែន ថូនី ប្ល៊ីងខឹន បានធ្វើឡើងដោយត្រង់រវាងគ្នាទៅវិញទៅមក លើបញ្ហាសិទ្ធិមនុស្ស និងប្រជាធិបតេយ្យ, បញ្ហាកោះរាមដែលមានការចោទជុំវិញលើវត្តមានកងទ័ពបរទេស និងបញ្ហានានាជា ច្រើនទៀត។

ពលរដ្ឋខ្មែររស់នៅក្នុងទ្វីបអឺរ៉ុប បានថ្លែងបង្ហាញក្តីនឹករលឹកនិងត្រៀមទទួលស្វាគមន៍ដំណើរ សម្តេចតេជោ ហ៊ុន សែន ដែលនឹងអញ្ជើញបំពេញទស្សនកិច្ចការងារជាផ្លូវការ ក្នុងប្រទេសស្វីស។

មេដឹកនាំអាស៊ាននិងប្រធានាធិបតីសហរដ្ឋអាមេរិក បានបញ្ជាក់ការប្តេជ្ញាចិត្តរួមគ្នាក្នុងការ ពង្រឹងនិងកសាងទំនាក់ទំនងដៃគូសន្ទនាអាស៊ានអាមេរិកឱ្យកាន់តែទូលំទូលាយនិងចាត់ទុក កិច្ចសហប្រតិបត្តិការជាដៃគូនេះ ជាការដែលមិនអាចខ្វះបានឡើយ។ ការបញ្ជាក់ការប្តេជ្ញាចិត្តនេះ បានប្រកាសតាមរយៈសេចក្តីប្រកាសព័ត៌មានរបស់ក្រសួងការបរទេសកម្ពុជា ក្រោយកិច្ច ប្រជុំកំពូលពិសេសអាស៊ានអាមេរិកបានបញ្ចប់។

តួលេខឆ្លងកូវីដ១៩ ក្នុងប្រទេសអាស៊ាន ក្នុងរយៈពេល ២៤ម៉ោងចុងក្រោយនេះ មានចំនួន ១ម៉ឺន ៩ពាន់ ៥៩១ករណី និងការស្លាប់ថ្មីមានចំនួន ៩៥នាក់ ។ តួលេខឆ្លងនៅថ្ងៃនេះ មានការ កើនឡើងចំនួន ៧៤០ករណី និងការស្លាប់មានការកើនឡើងចំនួន ១៦នាក់ បើប្រៀបធៀបនឹង ម្សិលមិញ ។ ប្រទេសថៃគឺជាប្រទេសដែលមានតួលេខឆ្លងច្រើនជាងគេដដែលថ្ងៃនេះ។ ដោយ ឡែកប្រទេសកម្ពុជា គឺជាប្រទេសដែលមិនមានករណីឆ្លងថ្មីនោះឡើយ ។

កម្ពុជាបានបន្តសម្រុកការចាក់វ៉ាក់សាំងដូសជំរុញបើទោះបីជាកម្ពុជាគ្មានការឆ្លងកូវីដ១៩ រយៈ ៦ថ្ងៃជាប់គ្នាមកនេះក៏ដោយ។ យោងតាមក្រសួងសុខាភិបាល តួលេខអ្នកចាក់វ៉ាក់សាំងដូស ទី៣ ក្នុងរយៈពេល ២៤ម៉ោង មកនេះបានចំនួន ៤ម៉ឺន ៥៨នាក់ ដែលជាតួលេខចាក់កើន ឡើងចំនួន ២ពាន់ ២២៣នាក់ បើប្រៀបធៀបនឹងម្សិលមិញ ។ តួលេខពលរដ្ឋដែលបានចាក់វ៉ាក់សាំងដូសទី៣ សរុបទូទាំងប្រទេស គិតត្រឹមថ្ងៃនេះមានចំនួន ៨លាន ៩២ម៉ឺន ៩ពាន់ ៤៣៣នាក់ ។

កម្មករចំនួនជាង៥ពាន់នាក់នៅក្នុងខេត្តកំពង់ឆ្នាំង បានចូលរួមក្នុងពិធីសំណេះសំណាល មួយ ជាមួយនឹងសម្តេចចៅហ្វាវាំង គង់ សំអុល នៅថ្ងៃទី១៣ឧសភានេះ។ ក្នុងឳកាសនោះ សម្តេច ចៅហ្វាវាំង បានថ្លែងលើកទឹកចិត្តកម្មករ និងកម្មការិនីទាំងអស់ កុំភ្លេចចូលរួមការបោះឆ្នោត ឃុំនិងសង្កាត់នាពេលខាងមុខនេះ ដើម្បីជ្រើសថ្នាក់ដឹកនាំតាមមូលដ្ឋានរបស់ខ្លួនដែលគេ ពេញចិត្ត។