ប្រមុខរាជរដ្ឋាភិបាលបានអំពាវនាវមន្ត្រីរាជការទាំងអស់ត្រូវប្រញាប់ចាក់វ៉ាក់សាំងបង្កាកូវីដ១៩ ជាមួយនឹងការ ព្រមានថា មន្ត្រីរាជការណាដែលមិនចាក់វ៉ាក់សាំងបង្កាជម្ងឺកូវីដ១៩នោះទេ នឹងមិនត្រូវបានអនុញ្ញាតឲ្យចូលក្នុង កន្លែងធ្វើការឡើយ។ ប្រសាសន៍របស់សម្តេចតេជោហ៊ុនសែននាល្ងាចថ្ងៃទី៦មេសា បានធ្វើឡើងក្នុងស្ថានការណ៍ ដែលការឆ្លងវីរុសកូវីដ១៩ចូលក្នុងសហគមន៍កំពុងតែមានលក្ខណៈធ្ងន់ធ្ងរជាពិសេសក្នុងរាជធានីភ្នំពេញដែលជា បេះដូងនៃការដឹកនាំក្បាលម៉ាស៊ីនរបស់រាជរដ្ឋាភិបាលកម្ពុជា។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន១ម៉ឺន៣ពាន់៦៤ ករណី និងការស្លាប់ថ្មីមានចំនួន៣៣៤នាក់

រាជធានីភ្នំពេញ គឺជាកន្លែងដែលមានការឆ្លងច្រើនជាងគេបំផុតក្នុងចំណោមការផ្ទុះឆ្លងក្នុងសហគមន៍រយៈពេល ២៤ម៉ោងចុងក្រោយនេះ។ ក្នុងចំណោមការឆ្លងថ្មីក្នុងសហគមន៍ចំនួន៩០ករណី រាជធានីភ្នំពេញមានការឆ្លងច្រើន ដល់៧៨ករណី ក្នុងចំណោមការឆ្លងទាំង៨ខេត្តនិងរាជធានីនៅថ្ងៃនេះ។

នាយករដ្ឋមន្ត្រីថ្មីនៃប្រទេសវៀតណាម ដែលទើបឡើងកាន់តំណែង លោក ផាម មិញជិញ បានធ្វើកិច្ចពិភាក្សា លើកដំបូងបំផុតជាមួយនឹងនាយករដ្ឋមន្ត្រីកម្ពុជាតាមរយៈប្រព័ន្ធទូរស័ព្ទ ដោយកិច្ចពិភាក្សាបានផ្តោតលើកិច្ច សហប្រតិបត្តិការរវាងប្រទេសទាំង២ ជាពិសេសកិច្ចសហការទប់ស្កាត់ការឆ្លងរាលដាលជម្ងឺកូវីដ១៩។ លោក ផាម មិញជិញ បានក្លាយជានាយករដ្ឋមន្ត្រីថ្មីនៃប្រទេសវៀតណាមជំនួសលោក ង្វៀង សួនហ៊្វុក ដែលត្រូវបានជ្រើសតាំងជាប្រធានរដ្ឋនៃប្រទេសវៀតណាម។

រាជរដ្ឋាភិបាលបានតម្លើងកម្រិតរឹតបន្តឹងបន្ថែមទៀតក្នុងប្រទេស ក្នុងស្ថានការណ៍ដែលការផ្ទុះឡើងនៃជម្ងឺកូវីដ ១៩ នៅមិនទាន់អាចគ្រប់គ្រងស្ថានការណ៍បាន។ ការឆ្លងចូលក្នុងសហគមន៍រយៈពេល២៤ម៉ោងចុងក្រោយនេះ មានចំនួន៩០ករណីដែលជាចំនួនខ្ពស់ជាងម្សិលមិញដែលមានតែ៧១ករណីតែប៉ុណ្ណោះ។

អាជ្ញាធរកំពុងស្វែងរក វរនាវីឯក និងសហការីម្នាក់ ដែលបានបាត់នៅក្នុងទឹកសមុទ្ទក្រោយហេតុការណ៍ផ្ទុះឆេះ អូប័រមួយគ្រឿងផ្ទុកមនុស្ស៦នាក់ និងសម្ភារៈជាច្រើន។ សម្តេចពិជ័យសេនាទៀបាញ់ បានប្រាប់អ្នកសារព័ត៌មាន នៅថ្ងៃនេះថាការស្វែងរកអ្នកបាត់ខ្លួនទាំង២នាក់នោះ នៅមិនទាន់រកឃើញនៅឡើយទេ។

ជនសង្ស័យឃាតករសម្លាប់ក្មេងប្រុសអាយុ១០ឆ្នាំក្នុងហេតុការណ៍មួយកើតឡើងនៅខណ្ឌច្បារអំពៅ រាជធានីភ្នំពេញ ត្រូវបានចាប់ខ្លួនហើយក្រោយការតាមដាន និងស៊ើបអង្កេតរយៈពេលច្រើនថ្ងៃមកនេះ

សីតុណ្ហភាពកម្តៅអតិបរមា នឹងធ្លាក់ចុះពី៣៩អង្សាសេ មកនៅក្នុងរង្វង់៣៥និង៣៦អង្សាសេវិញក្នុងរយៈពេល ១សប្តាហ៍ទៅមុខទៀតនេះ ជាមួយនឹងការព្យាករណ៍ការធ្លាក់ភ្លៀងពីក្នុងកម្រិតមធ្យមទៅច្រើនផងដែរ។